2018年7月27日星期五

【親子好去處】賈炳達道公園單車徑

人人端午節去咗游龍舟水,我哋就瞓到自然醒Hea下Hea下到黃昏先出去九龍城踩單車,最正去埋隱世士多食好嘢。



最好的好去處就係同一家人唔跑景點唔趕時間,自由自在隨意的去玩,呢日我哋等到就嚟黃昏時侯先出來,去到賈炳達道公園的單車徑踩單車。

由於九龍寨城公園同埋九龍城廣場就在旁邊,其實踩完單車仲可以過去玩去食埋嘢先番屋企。



單車亭就近打鼓嶺道,我哋在附近落車,然後過條馬路就到。


呢度好多單車,唔駛怕來到冇單車租,即使我呢日嚟到超多人,都仲有咁多部可以選擇。


單車 $70 1.5時租;$90 2小時租。(可能係假日價,所以都幾貴)



單車亭旁邊仲有好多位置可以俾初學者喺度練一練Warm Up下先。





除咗單車,仲有雙座位的出租,以為海濱公園單車徑先有,估唔到普通單車場都有。



出發點仲有個道路標記及標誌,可以同小朋友溫習下俾佢哋踩單車時學習睇路標。



出發!出發!


單車徑全長約1公里,整段單車徑總共有3個亡命斜,出發冇耐就遇見第一個急彎,初哥一定要減速呀!




踩完一個圈發現有人炒車,就番嚟同我悄悄話。


芊芊就未識踩兩個轆,所以都仲係踩住輔助轆單車先。




兩個一齊喺練習場踩住圈先。



哥哥除低頭盔之後個髮型又幾好睇喎。



又見到哥哥呢個暖男行為啦,喺度教芊芊點踩單車。



最掃興時侯嚟啦,兩個話要去厠所喎。(心諗一路計緊時架,厠所又遠...一來一回冇咗15分鐘)


嚟得九龍寨城公園,一定要去南門呢邊的小食亭,如果有睇開我的文,應該都聽過我介紹呢個小食亭最出名係咩。


唔好以為細細間普普通通,其實有好多寶,呢D先稱得上係「隱世小店」。


零食汽水小玩意一定唔少得啦。


亮點嚟啦,最馳名的就係呢個魚蛋豬皮蘿蔔啦,而主角就係本土出品白蘿蔔。



完全冇根冇渣,賣$18完全對得住個價。



而且仲超入味,食咗唔會益唔會涸喉,另外魚蛋同豬皮雖然唔係主角,但同樣唔失禮。


第二樣值得介紹就係鮮榨甘筍汁,只賣$16一杯(依家外面嗰D新鮮果汁,一杯都賣廿幾蚊。)



甘筍雪凍再拎出嚟榨汁,絕對冇渣唔鯹,好creamy好smooth,完全冇溝水,飲落去冰涼又fresh又甜,除非你唔鍾意甘筍,否則冇可能話唔好飲。


但係佢哋唔識貨,都係揀番甜筒食。


我想請問一下,係咪所有男仔咁大個都仲係食到一面係。


管理員叔叔仲同佢哋講好多歷史,同埋教佢哋點玩竹(膠)蜻蜓。



之後佢哋兩個繼續玩唔停,匿埋喺舊石度玩捉依因,對小朋友來說真係邊度都可以玩一餐,其實我哋有陣時又真係唔駛刻意安排太多節目俾佢哋。



只係呢棵樹垂下來的根,兩個鬥跳得高去掂已經可以玩好耐...(真可愛)

夜晚落埋去九龍城廣場食晚飯,真係大滿足。




Photo by CANON 5D Mark IV, Len | EF 16-35mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10


呀劍評語: 來過賈炳達道公園好多次,今次第一次租單車踩,條單車徑真係幾激架!幾個亡命斜同亡命彎,衝落去都好有速度感。再去埋九龍寨城公園的小食亭,食蘿蔔飲甘筍汁,真係Perfect。

(以上資料更新至文章當日)




                 

沒有留言:

發佈留言

Related Posts Plugin for WordPress, Blogger...