2018年2月9日星期五

【親子好去處】CANDY PARK BY CINEMA CITY @D . PARK 愉景新城

全港首間兒童主題影院 ─ CANDY PARK BY CINEMA CITY登陸 D‧PARK愉景新城,我呢個爸咁好電影,今次仲要啱哂呀哥呀芊,可以率先嚟試片,點可以錯過呀!等呢兩位用家分享下睇後感啦!


就喺童趣森林裡面的 CANDY PARK,早在上年12月就開始試業,來到今天2月9日才正式開幕。這是首間兒童主題影院,以樂園式的風格設計,裝潢夢幻獨特,好似置身於糖果世界。


連整個售票處都設計到好似一個蛋糕咁樣!我突然間諗...唔通仲會繼續有下一間兒童影院,以其他Park做主題? 即刻腦裡浮出一大堆乜Park勿Park,自己諗到CAR PARK笑咗,可能全部兒童座位設計到好似一架架跑車咁。



影院門外有隻招牌Bear,一於打打卡先!



晨早溜溜來到,大閘都未開!



入到場內先看見顏色好Warm的小賣部,果然係兒童主題影院,因為有提供兒童套餐同埋家庭套餐,而且爆谷仲有多款味道揀(一陣再介紹)。



旁邊仲有夾公仔機,入到嚟戲未睇,先俾佢哋夾住去玩咗兩次,當然夾唔到啦!有埋自助「唱錢」機,包你冇藉口就「唱」唔到錢。

(相就冇影...傷心事唔想記住,想睇佢哋點夾公仔就到最尾睇片啦!)




入場睇戲先度度高先!仲記得自己細個入場睇戲,當時啱啱實施電影三級制,我記得去睇二級戲都要俾人𥄫𥄫證先入得去。



CANDY PARK設有5個影院,影院1-4為傳統式影院。



唯獨影院5有特別為小朋友而設有兒童座椅及家庭座椅,而且又紅又綠,小朋友坐上去未睇戲先興奮。






第一排的梳化座椅同大屏幕都有一段距離,而且屏幕都沒有很高,所以都唔會話要抬高個頭去睇得辛苦。



特長設計嘅小童座椅及小童扶手椅,無論係大人定小朋友瞓上去都可以超嘆咁睇電影。後排的家庭座椅,買飛時要打孖買,就算拍住拖嚟睇都OK架。

睇吓呀妹坐上去己經舒服到要扮個瞓覺Pose俾我影相,可以知道有幾舒服,真係唔怕套戲唔好睇,至怕連好睇嘅戲都因為張梳化座椅舒服到我瞓着咗。



買埋個兒童餐或者爆谷汽水入嚟食住睇,都咪話唔嘆!點解依家D細路咁辛苦㗎!


開始放片啦!兩個即刻去咗另外一個世界,同佢講咩都聽唔到。




睇得咁入神都係唔阻佢哋。




影院5仲有個小小秘密,原來在大屏幕底下,有個小小舞台可以需要時彈出嚟,最適合大家喺度開Party包場之用。



喺影院5外面有個遊戲室(同樣提供包場服務),平時當然也開放予入場睇戲嘅一家大細。



設有豆袋、海綿積木、畫板和兒童書籍等設施,如果有小朋友睇睇吓冇耐性,最啱就係可以帶佢出嚟呢度玩吓,又或者早咗入場套戲又未開始,都同樣可以喺度打發吓時間。










頭先講過影院小賣部的爆谷有多款口味,除咗傳統味道之外,我哋仲試咗焦糖味及粟米湯味。



粟米湯味原來好好味,我哋三個食到唔停口!下次再嚟睇戲一定要叫大大杯嚟食。



俾佢哋兩個搵到 Marvel 書,本來玩玩下都要即刻坐埋一邊豆豆梳化慢慢睇。



在影院3與4之間,有另一個玩樂區,當中有兩個遊戲設施,一部足球機,同埋一個充氣保齡球!






呀芊係咪玩緊人肉保齡,唔係個人撞埋去D樽度囉...>.<





在影院大堂(即小賣部附近)及一直走穿過影院5到走廊最尾,都設有洗手間,非常乾淨企理






Photo by CANON 5D Mark IV, Len | EF 16-35mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10分


呀劍評語: 我呢個爸爸由細到大都好鍾意好鍾意睇港產片,不過細個就要同埋D大人一齊睇戲,成日俾佢哋遮住哂,但係依家D小朋友真係幸福,仲有埋兒童主題影院,今時今日睇影真係唔駛受苦可以好嘆!幾時有成人主題影院...hehhee

CANDY PARK BY CINEMA CITY】 
全港首個小朋友主題影院,亦係愉景新城嘅第一間影院。整個影院以樂園式嘅風格設計,夢幻獨特嘅裝潢,務求打造出一個屬於小朋友嘅夢幻世界! 影廳以色彩豔麗為設計主軸,營造出兒童天地嘅風格。其中一個影廳更是特別為小朋友而設,務求讓小朋友們可以更舒服地享受電影時,又可以有特別嘅親子時光!

地址
香港荃灣青山公路荃灣段398號D.PARK愉景新城
第一層1036 - 1045號舖

營業時間
上午 9:00 - 午夜 12:00

網址

http://www.cinemacity.com.hk/

專頁

candyparkbycinemacity

查詢

2360 0910

(以上資料更新至文章當日)






沒有留言:

發佈留言

Related Posts Plugin for WordPress, Blogger...