2017年12月22日星期五

【親子好去處】SPCA 愛護動物協會參觀 (足本 Full Version)

呀劍帶團去玩都唔係第一次,繼上年去過大澳曬鹹蛋、去鹽田梓做竹筒飯、去圍村打水做砵仔糕,今年第一擊亦都係最後一擊(因為今年太忙),就係到愛護動物協會參觀,除咗可以探探小動物外,都仲認識到流浪及被遺棄小動物這境況,讓小朋友們可更懂愛護動物。

跟住官方提供的路線圖,很輕易就去到愛護動物協會總部




大家先上到四樓,職員姐姐跟我們先介紹一下愛護動物協會的歷史,原來已經開辦了96年,看來100周年一定要再來一次



姐姐邊介紹邊發問問題,小朋友都好積極去搶答,點解?因為有書纖同貼紙送,睇住哥哥題題舉手,但係都冇被叫作答,見到佢無奈及失望個樣真係好攪笑



當然最後都係皆大歡喜人人有份。




然後芊芊被點名出去示範一下,遇上真狗時要怎樣去接觸牠們,記住要先用拳頭靠近,讓小狗先聞一聞 (若直接伸出手指有機會被咬 >.<)



然後先可以慢慢咁撫摸牠




終於到參觀時間,小朋友全部都開始興奮起嚟,我哋分成兩組,由樓梯行落三樓及二樓參觀


雖然參觀係興奮開心,但係當姐姐同小朋友們解釋,呢D動物都係被遺棄嘅時侯,佢哋都覺得全部動物都好可憐,由輕鬆開心的氣氛,突然變沉重起嚟!



去到探訪貓狗的地方,這個鐵籠原來係每朝當清潔的時侯,貓狗都要到呢度暫時活動,姐姐話呢度係佢哋嘅操場,要喺度做早操。哈~





先到貓舍參觀,裡面好乾淨清潔,而且仲邊放着音樂,姐姐話咁樣貓貓就會好舒服咁喺度生活



其中有D貓都幾貪玩幾得意



有D就睇個樣懶到出汁



雖然望落去佢哋都生活得幾自在愉快,但係佢哋全部同樣係被遺棄的動物





有D仲得三隻腳,真係名副其實「三腳貓」,呢D都係主人唔要佢哋嘅時侯,在街流浪遇上交通意外或者被壞人虐打



到另一邊狗舍,這裡地方較大,不竟狗隻需要活動的地方同樣較大



不單有「三腳貓」也有「三腳狗」,看見牠們我也真的憤怒了




牠們全部也很可愛很乖巧,沒有因為看見我哋陌生人就亂吠




我行到邊佢哋就一齊望到邊,睇佢哋個樣好似好希望可以離開呢度出去玩,希望快D有好心人帶走你哋啦




有D狗BB就瞓到成隻豬咁!




落到一樓,估唔到原來呢度有間寵物 Salon



好多狗狗都會嚟呢度剃毛沖涼,有D仲要嚟呢度做物理治療進行醫治




各位朋友如果你都可以嚟領養佢哋,都可以到呢度補及一下食糧及配件,然後帶佢哋番屋企一齊生活,記住唔好做第二個遺棄佢哋嘅主人,要好好愛錫佢哋!



在大門入口附近,有個聖誕裝置,小朋友可以捐出$10,就可以攪動旁邊這個裝置,聖誕樹就會亮起嚟,旁邊幾隻狗公仔都會跳起舞上嚟!




睇嚟這個裝置好成功,個個小朋友見到都想攪動一下,家長們當做了個善事,就俾佢哋玩一玩



而我哋就幫襯買咗兩個愛護動物協會福袋,裡面只裝着一支酒精搓手液,就當支持一下,出一分力量





Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2


呀劍評分: 10分


呀劍評語: 短短一個鐘頭15分鐘,可以認識SPCA的工作,及親自探望一下被遺棄小動物,實在係一個好好的親子活動,希望好快又可以再帶各位呀劍粉絲到其他地方玩玩

愛護動物協會 簡介
香港愛護動物協會成立於1903年,是香港一家非牟利組織。其宗旨為提倡保護動物和防止動物受傷害,是兩岸三地首家保護動物的非政府組織,也是香港歷史最悠久的動物福利組織。 香港愛護動物協會總部位於灣仔運盛街5號,在其它地區設有分中心

活動時間

11:30 - 12:45

地點

香港灣仔運盛街5號

電話
2802 0501

(以上資料更新至文章當日)






沒有留言:

發佈留言

Related Posts Plugin for WordPress, Blogger...