2017年12月26日星期二

【親子好去處】生命教育農莊 (聖誕篇)

估唔到兩個月內會到「生命教育農莊」第二次,因為我太喜愛呢度,最原始最接近大自然的農莊,一手一腳親自耕種澆水,今次仲同埋自己一班好朋友,並他們的寶貝們一齊嚟玩。

今次我哋一行25人Book埋專車由錦上路來往農場接送,直接在豬場門口停車,一落車所有小朋友都話「好臭呀!」哈哈~

想知有幾臭可以睇番我第一次嚟玩嘅介紹

Part 1 http://bit.ly/2zzp5I8
Part 2 http://bit.ly/2y7kJYM



今次我哋第一個活動同樣係「田園種植」,不過占叔叔好厲害,雖然做同一樣嘅嘢,但係又可以扭一扭變一變,有唔同玩法!所有小朋友都帶好農夫帽,準備開始耕種啦!




同樣先種下幼樹苗,先放入泥舖平格格種植盆








呀芊話自己頭太細,所以唔肯戴農夫帽,哈哈~





然後用木筷子挖空泥土中間一個小洞,再將幼樹苗放入去泥土中




今次我哋除咗落田種植之外,仲玩埋盆栽種植,所有小朋友都放咗勁多樹苗入去盆栽度!你睇吓哥哥幾咁貪心...因住唔夠位生呀!




連呀芊都一樣,放咗好多好多樹苗入泥土裡面




今日表哥都跟埋嚟一齊玩!三老表影番張相先




所有小朋友都完成啦,下一個步驟就係將已經長好的樹苗移植過去已翻鬆的泥土中




占叔叔先示範一次俾小朋友睇,用一個小剷子工具直插入泥土中將已長好的樹苗拔出嚟




呀芊完全冇聽占叔叔講嘢,俾田裡的小果實吸引咗去




哥哥開始動工啦!起初以為小朋友們一定粗手粗腳,未將樹苗移植就已經會整死佢哋,但係原來真係唔好睇少佢哋



佢哋都可以好認真同埋好溫柔咁,將每一棵成長咗嘅樹苗拔出嚟



成功將樹苗移植到另一塊田裡面



跟住到最受小朋友歡迎嘅環節,就係幫植物澆水啦!占叔叔教我哋用膠水樽𠝹幾個洞,然後等D水可以平均咁分佈喺泥土上面。




但係都未夠好玩,占叔叔仲教大家一套絕招,就係...




就係......「吹水」!我幫呢套澆水方法起咗個名叫「吹水灌溉法」,個個小朋友都當係遊戲,澆完一樽又一樽,出盡所有力氣去吹水!




一吹數十條水柱瞬間就將整塊田灌溉好




男仔就係咁...大家睇兩個男仔條褲濕到






所有小朋友好順利地成功將樹苗移植到兩大塊田裡面,拍下呢張大合照留個念先




然後占叔叔仲預備咗塊油麥菜田俾小朋友去體驗收割,小朋友們都興奮都不得了,摘起D菜仲拎住周圍跑跳哂舞






每個小朋友可以摘兩棵油麥菜,我哋之後仲打算拎去煮嚟食,夠哂新鮮!!






煮之前都要係咁咦沖一沖水洗洗佢




平時哥哥喺屋企都訓練有數,洗菜煮菜冇難度!




所有嘢準備好哂,依家就等煲水滾起,就可以將菜放落去啦!




煮上嚟即刻食,真係好鮮甜呀!有冇豆䜴鯪魚呀喂!




食完個農村午飯 (有薯仔炆嘉美雞、清炒有機菜、香煎魚塊、白飯任裝),第二個活動又未開始,就陪芊芊去餵吓羊,呢個女成日都好關心班羊仔,話佢哋都好肚餓,任何空檔就叫我陪佢過嚟餵羊 (呀哥都已經同表哥去咗玩伏匿匿)








今次除咗餵豬,仲有得餵羊,將頭先摘咗嘅油麥菜,都拎咗少少過嚟餵小豬嘜






餵完豬又走去餵孔雀,好似上次咁去摘D檸檬葉去餵佢哋,但呀芊仍然好似上次咁「又要餵又要驚」




休息咗一陣,導賞活動開始啦,今次由Ling姐姐帶住一班小學雞,去逐一介紹籠裡面嘅動物




Ling姐姐同鸚鵡傾起計上嚟,鸚鵡仔好似真係聽得明,睇嚟佢哋平時真係有溝通傾開計㗎喎!






「我哋又見面啦!」小朋友好開心又可以見到松鼠仔,無見咁耐都仲係咁活躍,跑得咁快好難影








然後Ling姐姐帶小朋友到「夜行動物館」參觀,可能因為太早了,所以好多動物都瞓緊覺!








無論大人細路哥見到呢隻樹蛙,都一致話好核突,哈哈~








呢隻小青蛙真係好可愛!!! 如果可以拎佢上手板睇就好














離開「夜行動物館」就到外面參觀園內植物




仲有棵有機橙樹,我哋都拎咗個番屋企試下




呀芊你呢個樣真係唔去幫橙賣廣告就嘥哂




到咗最後一個活動,就係DIY蕃薯餅,小朋友都睇住Man姐姐示範,步驟完全唔複雜,小朋友好容易就跟得到








大人可以撓埋手企喺側邊,等小朋友自己學習處理及分工








雖然做出嚟效果完全同 Man 姐姐唔同,但係總算是他們自己一手一腳完成



另一邊 Man 姐姐幫大家預備定碳爐



睇起嚟都幾似樣






當佢哋自己落手煎嘅時侯,明明一件一件分明的蕃薯餅,煎嘅時侯因為太黏的關係,又變番做一大舊,真係笑死人!






雖然係咁,但係都食得落肚,自己親手整,食落特別滋味






呢D係隔離組的....點解人哋煎得咁靚? (因為大人出手囉)








食飽後到隔離草地再繼續玩,一於用盡所有電先番歸!




Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2


呀劍評分: 10分


呀劍評語: 第二次到生命教育農莊,本在帶朋友來玩一玩,以為跟上次差不多,怎知道即使活動一樣,但是卻於活動中帶少少變化,讓小朋友有不一樣的體驗,最喜歡這個「吹水式澆灌」小朋友邊玩邊種植,這農莊實在了不起!

生命教育農莊 簡介
我們是一個以弘揚生命教育為宗旨的非牟利團體,協會由一批有志推動全人教育和愛護生命的熱心人士組成,匯集社會上對生命教育的資訊及動向,並透過保育農莊提供實質的教育課程和活動,宣傳愛護和理解自然的概念,傳遞人和自然和諧共處的理念。

活動時間

10:00 - 16:00 (自行預約及計劃行程)

其他預約活動(包括新增項目)

盆栽種植、玻璃樽彩繪、中藥園導賞、艾草蚊香DIY工作坊、木鎖匙扣DIY工作坊、環保紙製作、蕃薯餅製作、雞屎籘製作

地點

元朗八鄉馬鞍崗村

(以上資料更新至文章當日)






沒有留言:

發佈留言

Related Posts Plugin for WordPress, Blogger...