2017年12月21日星期四

【親子好去處】DREAM ROOM 全新幼兒玩樂及派對園地

室內遊戲派對場地越開越多,由於地舖商場成日加租,近年都開始一一進駐工廈,唔怕你唔方便,最怕你貴,所以好多家長都唔介意地點唔就腳,總之有得玩就乜都得,最近去了這個位於觀塘的新場,原來又唔係太僻喎,又方便又實抵玩!


起初聽到係商廈廠廈,以為一定好難去,原來就喺apm隔離

DREAM ROOM 以日系及大自然為設計概念,大量採用森林、海洋、陸洲、高山、小木屋等自然元素為主題


大家入場前可以將行裝放在儲物櫃內(租金$20/按金$80)


二話不說,呀哥呀芊即刻除鞋跑咗入去玩



好多時兒童遊戲室,因為場地空間限制關係,好多時入場年齡限制於12歲以下一齊玩,但係其實12歲同3歲都好大差別,一齊玩有陣時睇住2-3歲小朋友同較大的同場玩,都唔好話唔「牙煙」

所以 DREAM ROOM 的概念規劃分成4區,可以照顧到唔同年齡層在不同場景裡學習於遊戲
【幼兒小木屋】適合 0-2 歲、【露營體驗區】適合 2-6 歲、
【高山車駅區】適合 2-12 歲、【海陸遊戲區】適合 6-12 歲


一入閘身處的就是【露營體驗區】適合 2-6 歲


多個小帳俾小朋友可以捐入去創造自己的小天地,呢個呀芊好似D汪汪狗咁,走入去霸番個地盤先





枱上面仲有多款唔同類型嘅玩具同 Board Game 任B選擇


D玩具「堅」唔係「流」喎,枱上面全部都好益智有助小朋友動動腦筋,促進思考及腦部發展







如果大少少嘅小朋友覺得唔啱玩,木架上仲擺放着好多款 Board Game 你仲夠膽話唔夠玩?






呀芊設計了獨一無二的「林亞珍」眼鏡



而呀哥就設計咗隻唔知係"雀"定"龍"嘅機械人



另一邊牆上安置了許多玩具齒輪,真係要動動頭腦,真係可以一個拖帶所有齒輪推動




【高山車駅區】適合 2-12 歲真係可以話係「火車王國」因為房裡面有多條木製路軌,俾小朋友自主建造自己喜愛的路線



仲有想攪Party活動包場都得,因為地方夠大,又有獨立房間,連開放式廚房都有



【海陸遊戲區】適合 6-12 歲
呢個以海陸為主題的波波池,有成千呎咁大,上下兩層遊戲架!仲有氹氹轉飛船,超好玩!




最吸睛不過一定係波波池中的氹氹轉飛船






想瞓喺上面等人推...得



想落地推人哋...又得



最後家長最擔心的清潔問題,以前聽唔少人講,就係話波波池其實可以好污糟,但係依家已經冇呢個講法,因為見到 DREAM ROOM 特意採用「ZOONO」生物科技消毒及專業消毒洗波機,如果講到明就一定可以放心玩




呢個瀡滑梯仲要好刺激,唔同出面其他場地的「絕」住哂,我都知「絕地係會「無事」但係一D都唔好玩嘛。有見及此,老闆都要做條斜D夠好玩的瀡滑梯



仲有幾支發射炮在遊戲卡周圍



仲有彈彈馬玩



不過都唔及呢個氹氹轉,轉個頭又上番去俾人轉



呀芊話玩到頭痛,咁梗係啦呀小姐...



俾人推完見頭暈,都係落番地做推人嗰個



波波池兩邊都有個好特別嘅設施,一邊有屋子造型的大小洞,小朋友可以將波波掉進去,考考自己眼界



另外一邊則有大小二象,大象下有個位置可以俾人玩伏匿匿真係一流



【幼兒小木屋】適合 0-2 歲 這個就啱 BB 不過,因為絕對唔驚外面較大的小朋友衝衝撞撞,所以媽咪同寶貝喺呢度玩就最安全




其他設備都幾完善,有一個BB車停放區,大家可以放心推埋BB車上嚟玩。鞋櫃、Locker唔少得,好細心的仲有哺乳室同育嬰間,仲要有提供熱水開奶,真係餵奶換片冇難度。同時設有兒童廁所,唔駛同大人共用厠所。






Photo by CANON 5D Mark IV, Len | EF 16-35mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10

呀劍評語: 一個充滿日系風格且木製玩具設施的遊戲室真的少見,裝潢超美,顏色配搭滿分。老闆亦認識到混合不同年紀小朋友在同一場地遊玩的危險性,特別設計了各個適合不同年齡層的遊戲區,真係貼身知道用家需要。另外各樣配套也做得很完善,地點近apm非常方便!


地點
九龍觀塘巧明街115號柏秀中心10樓全層

店舖面積

約5,000平方呎

場地人數上限

約160人

營業時間
10:00-21:30


收費

網頁
www.thedreamroom.com.hk

(以上資料更新至文章當日)




沒有留言:

發佈留言

Related Posts Plugin for WordPress, Blogger...