2017年11月5日星期日

【親子野餐】野餐懶人包 南昌公園

又要講呢句「秋高氣爽,最啱一家人到大草地野餐」老土還老土,事實歸事實,的確返回最RAW狀態,去親親大自然,勝過去商場活動同人迫。今日媽咪唔舒服喺屋企休息,我就帶兩兄妹到南昌公園跑一趟,順便教大家如何9秒9預備好一齊出發,來個「野餐懶人包」


今日真係天氣超美,知道公園一定塞滿人,估計大家都會食過Brunch跟住出發,所以我就11點前來到,搵個靚位野餐!


當時人也不算多! 很隨便就可以搵到個樹蔭位置打開帳篷



懶人包第一招:「一秒彈開」帳篷必備

買這類帳篷一定要小心揀,唔好以為淘寶一定好! 我自己建議一定要親自試過開合方便先好買(除非你多錢冇掟洗),我這個在AEON大減價時買入的($2XX),真係一拎出嚟幾乎自己彈開。

唔好以為開就一秒,收要一粒鐘,呢個帳篷要收埋都超方便,以我個人最快記錄頂多3秒(快慢因人而異)



懶人包第二招:M記早餐

當然你有時間梗係又做便當又滷水雞翼,但係如果想好似我咁嚟個又快又懶嘅野餐之旅,M記早餐唔少得,又通粉又飽又熱香餅又薯餅又....講都講唔哂,最緊要其中一個買「開心樂園餐」,因為一陣又可以當另外一個小節目



你睇佢哋幾嘆!



懶人包第三招:棋類 Board Game

咩棋都帶D嚟,一定要佢哋平時玩開嗰D,同埋最緊要夠「輕」,咁佢哋就可以自己攪掂,你就可以行埋一邊「un un 腳」

我哋玩過象棋,鬥獸棋,同埋頭先「開心樂園餐」送嘅Memory Card Game





懶人包第四招:繪本閱讀

唔駛多講,咁好環境下睇書有幾舒服你知嘅! 唔駛多一本就夠(仲要輕),佢哋仲要係睇緊頭先M記送嘅「林嘉欣繪本」


懶人包第五招:郊外寫生/ 攝影

一支筆,一張紙,係唔駛「摺櫈」,兩兄妹就已經可以一齊畫張合作畫啦!

如果有相機都可以俾小朋友學習用相機拍下自己留意的事物



懶人包第六招:球類運動

有靜當然也要有動,帶一個小足球就足夠他便在草地上跑跑跳跳,玩傳波又得,玩搶波又得! 如果唔鍾意足球,打羽毛球還者其他都得,南昌公園一大草地,絕對有足夠空間唔影響他人






懶人包第七招:善用場地設施

揀野餐地方最好可以搵一個有埋遊樂設施的地點,等佢哋可以繼續放電!












懶人包SPECIAL:驚喜節目

四周圍走走,可能會發現其他有趣事情,我哋行上南昌公園小斜坡,遇上一班搖控坦克發燒友,兩兄妹對它們好有興趣,因為每架坦克造型都超像真,而且仲真係識得發炮(紅外線)攻擊對方






另外又遇上一個家庭,他們帶龜龜出來散步,估唔到又可以多個小節目,俾呢對兄妹可以同小龜玩玩









其實只要你願意,去野餐絕對唔一定要好大工程,而係可以好簡單,又容易準備的事!




Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分

呀劍評語: 求求其其9秒9準備就出發,卻帶來超豐富節目及歡樂,勝價比極高的活動

(以上資料更新至文章當日)




沒有留言:

發佈留言

Related Posts Plugin for WordPress, Blogger...