2018年3月16日星期五

【親子好去處】生命教育農莊 Life Education Farm (Part 1) (足本 Full Version)

踏入秋季最適宜就係到農場親親大自然,無奈今日好似夏天咁熱,一班小朋友初到『生命教育農莊』學做小農夫,真係粒粒皆辛苦!




這個『生命教育農莊』已早於2011年開業,不過一直沒有做很多推廣活動,而且它位於馬鞍崗村內較偏遠的位置,所以一般人都唔係太知道這個地方!


我哋當日搭西鐵到錦上路站,然後打的大約15分鐘便到 ($30有找)

溫馨提示:上的士起標前一定要問清楚司機識唔識去(上車同司機講去「馬鞍崗豬場」並非講「生命教育農莊」)




我哋的士入到馬𩣑崗村,嚟到呢條橋呢個位置,司機就唔敢再入去,其實之後問番,司機係可以繼續轉右駛入,直到豬場門口落車!(不過大家又唔駛太擔心,即使圖中位置落車,行入去都係大概5分鐘)




其實一路行入去時侯,已經聞到陣陣臭豬味,如果頂唔住嘅朋友,就要帶定口罩!




去到豬場門口啦!然後打電話俾職員出嚟接我哋入去 (由於農莊不接受 Walk-in,所以較早前我已經預約好,跟職員有通過電話)




真係無花無假的豬場呀!有千千萬萬隻懶豬瞓咗喺度,兩個見到大肥豬就超興奮,哥哥即刻拎起相機不停影




唔小心被發現我影佢tim~



穿過豬場後就睇見大大個『生命教育農莊』招牌


兩兄妹急急腳跟住職員姐姐一支箭就衝咗入去


農莊面積不算大,但算係我去過最天然最還原基本的一個農莊,沒有充氣設施,沒有攤位遊戲,就是只有動植物及農田


但係卻有好多好多我從未見過的東西




活動未開始,我哋已經俾呢度咁天然嘅景色吸引住,一放低行裝在活動室,我哋就衝哂出嚟周圍參觀












漫步走過整個農莊,感覺回歸原始,真的很舒服自在!不過話咁快第一個活動就要開始,先為大家介紹一下今次我哋預約行程的活動:

11:15 報到

11:30 田園種植 ($20)
12:30 午飯 ($50 - 包白飯任裝、炆嘉美雞、炸銀雪魚、炒有機蕃薯苗及香港自家製竹蔗茅根水一支) ,一切菜單跟據當日安排有可能變動
14:00 柴火砵仔糕製作 ($25)
15:00 農莊導賞團 ($15)
16:00 離開

(以上價格以每位計算)


所以總共每人只需$110,真係抵玩之選!




占士哥哥先帶我哋去農田學習種植,佢哋好細心咁預先準備好泥土及幼苗



成班小學雞爭住要泥土及幼苗,真係嘈到拆天!但係占士哥哥都好有耐性溫柔咁逐個派俾佢哋



睇吓呀芊同哥哥戴上草帽幾咁有型!(其實係因為呢日實在太曬,乘機又教佢哋話農夫咁辛苦,以後唔準食剩飯)





哥哥有好心機咁將一棵棵幼苗放入泥土裡面 (當然都整死唔少...)



相反,女仔都係溫柔D!全部做得妥妥當當





然後占士哥哥教呢班小學雞將成長後的幼苗(預先準備好的)放進田裡










睇住佢哋一個一個好專心咁去種植時,真係超可愛極!雖然未必做得好好,但係我認為從小就要訓練他們不怕吃苦,不要成為那些只懂在冷氣生活的小朋友









最後得占士哥哥及其他職員幫手,大家都終於完成工作




跟住占士哥哥就獎勵每位小朋友,可以到田裡面去拔粟米!而且仲可以即時食tim





話咁快第一個活動就完咗,到咗午飯時間!職員們都忙着分配餸菜,而且仲吩咐小朋友負責派碗筷,爸爸媽媽就負責傳菜上枱





兩個拎住手上條粟米,新鮮咁一粒一粒放入口食...umm 好清甜呀!







食完飯之後,小朋友仲要負責洗碗。佢哋一聽到之後,即刻開心到彈咗起身 (我心諗真係求之不得)



占士哥哥派我哋一籃樹葉,佢話呢D叫做「布喳葉」,原來可以直接用嚟洗碗,全天然一滴洗潔精都唔駛!





真係好Magic呀,洗完出嚟好乾淨,完全唔「油淋淋」!



飯後餘興節目就梗係餵羊啦!占士哥哥將剛才拔粟米出嚟的粟米葉,分俾小朋友一齊餵羊






芊芊特別有同情心,佢話要餵俾最細嗰隻,因為佢唔夠大羊爭食 ~~





餵羊的旁邊有個柴火爐灶,預備一陣間將要開始的砵仔糕製作


今次到 Pam姐姐 負責教大家DIY柴火砵仔糕,先介紹所需要材料及分量,小朋友都好專心咁聽講




其實每次跟小朋友參與活動,若是商場等舒服狀態之下的場合,佢哋都唔會集中周圍攪,相反每次到農場或戶外地方時,總係可以專心地聽導師講解,可想而知...



再一次睇見男人的浪漫,哥哥好認真咁做緊一件事嘅事侯,其實都幾吸引!





媽咪同哥哥去準備煮片糖,妹妹繼續留守努力攪勻沾米粉





哥哥自發話唔駛我哋幫,自己記得所有步驟同做法



加幾多水都記得,同佢平時成日話乜都唔記得,簡直係兩個人,又再一次證明,做自己喜歡做的事,係可以做得特別好。





然後就將完成好的漿一羹一潷落去砵仔







芊芊再將紅豆放埋入去就大功告成






那邊廂 Sunny哥哥已經預備好柴火,可以將大家製成的砵仔糕放入大鑊蒸煮,另外一部份就用電子蒸爐去蒸熟




想知道用蒸爐同柴火煮完出嚟嘅分別,同埋好唔好味!仲有下午的農莊導賞行程,就要睇下回分解啦。


Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2


呀劍評分: 10分


呀劍評語: 農場去得多,不過今次這個難得一遇的體驗實在超難忘,除咗有各樣農耕體驗及砵仔糕傳統柴火製作外,最特別係可以一次過見到咁多少見,甚至從未見過的動物!老土D講「真係一次過滿足哂3個願望呀!」

生命教育農莊 簡介
我們是一個以弘揚生命教育為宗旨的非牟利團體,協會由一批有志推動全人教育和愛護生命的熱心人士組成,匯集社會上對生命教育的資訊及動向,並透過保育農莊提供實質的教育課程和活動,宣傳愛護和理解自然的概念,傳遞人和自然和諧共處的理念。

活動時間
10:00 - 16:00 (自行預約及計劃行程)

其他預約活動

盆栽種植、玻璃樽彩繪、中藥園導賞、艾草蚊香DIY工作坊、木鎖匙扣DIY工作坊、環保紙製作

地點

元朗八鄉馬鞍崗村

(以上資料更新至文章當日)






沒有留言:

發佈留言

Related Posts Plugin for WordPress, Blogger...