2017年6月30日星期五

【親子好去處】迪士尼.彼思《反斗車王3》賽車狂熱 展覽 @又一城 Disney ‧ Pixar《Car 3》@Festival Walk

Disney同埋Pixar今個暑假又有新戲上啦!《反斗車王 3》雖然 7 月 13 日先上映,不過今日開始就已經先踩油踩入又一城,率先睇《反斗車王 3》展覽,今集仲新加入車壇新星積迅黑旋風及新手教練小薑,展覽仲要係 1:1 原大造型,如果有得坐埋入去仲正...係喎,動畫入面都係唔坐人㗎喎!



每一次邀請都真的很感恩,可以俾兩個小朋友第一時間到現場玩,又可以第一手同大家分享,我哋一上扶手電梯遠遠見到 1:1 的閃電王麥坤,真係未影相先興奮,呀哥一支箭就跑過去

知道今次展覽仲有遊戲專區同POPUP Store,但係佢哋都等唔切要同麥坤影相先(你睇芊芊個樣到)


呀哥好少主動要求話要自己影一張,可以見到呢麥坤幾大吸引力


可能大家只係會顧住影車頭,其實佢其他部份都做得非常細緻,真係好靚好有霸氣



跟住點少得同兩個新角色影相,芊芊唔知點解好鍾意黃色教練小薑




而哥哥就對黑旋風一見鍾情,估唔到呀芊可以屈身匿喺個碌度



睇吓呀哥佢又要我同佢影張單人相




仲有今次電影故事場景的洲際杯(The Piston Cup),我好鍾意佢今次的一句金句,「未到終點唔好認輸」




大家如果在指定日子嚟到仲可以即場Upload上IG免費Print出嚟(指定日子請參照下文)

然後我哋就上到G層,每次我都分唔到又一城邊層打邊層,因為G層已經係由港鐵出口上了四層,不過一講到有得打機,就一定自動識得去呢一層



我哋先玩玩旁邊的《反斗車王 3》搖控車,當然又係展覽的3大主角





芊芊一路都攪唔清向前向後同向左向右,玩玩吓就公主病發作,好在哥哥在旁邊慢慢教佢

不過玩多兩玩都係抵受唔住隔離的PS4《反斗車王 3》電玩


呀芊唔識玩不停撞車好冇癮,好在有個哥哥喺旁邊教佢玩




細個打機指定動作,跟住畫面裡面的車一齊同方向郁




最後都係要靠職員哥哥幫手陪芊芊玩先掂



哥哥玩完一次又一次,好難先可以叫到佢俾我影番張相

新角色仲有呢架係校巴姐Miss Fritter



然後哥哥仲係好想留低玩多陣,於是我就同呀芊去冰場隔離睇吓仲有咩玩 



上到去冰場的UG層



呢度有《反斗車王3》MATTEL 限定店及遊戲區,如果頭先打機同搖控車唔啱太小的小朋友,呢個遊戲區就一定啱哂佢




呢度放咗幾個故事場景中的賽道,同埋有幾架小玩具車俾小朋友喺度玩吓





芊芊心諗如果眼前呢個故事場景玩具都可以帶番屋企就好喇




旁邊仲有部夾玩具機,唔知有冇機會可以夾得中呢?(但係其實都幾難夾,因為玩具車的包裝都幾扁身同埋吸塑都好硬崩崩)

大家只要購物滿$100就可以有一次機會夾



跟住搵埋哥哥就再上到頂層,嚟壓銅幣、印貼紙同埋及影貼紙相


好有經驗的芊芊一嚟就知道點樣壓銅幣



所有家長最喜愛的姓名貼紙,呀哥同呀芊都各自做咗一張




到呀芊自製貼紙,好在都仲夠高(佢係都要自己打自己個名),哈~






不過點解唔係《反斗車王3》嘅?哈哈~



最後嚟影番張貼紙相先,仲記得上次影呢部機反應真係要超快,因為對位係相反方向咁對(即你向左 > 畫面的自己就向右郁) 所以影咗幾次先成功!



最後落番LG2層去POPUP Store度睇吓有咩限定正貨








又今日開始成個7月,大家一於踩行油嚟又一城搵麥坤一齊打咭玩番日啦





Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 9

呀劍評語: 反斗車王粉絲冇理由唔到場打咭呃Like卦,仲有期間限定店有好多限量精品以價惠價平賣,就喺呢個暑假啱啱開始,帶埋小朋友去攞正牌打機啦!


【迪士尼.彼思《反斗車王3》賽車狂熱 展覽】 

《反斗車王3》1:1原大造型 猶如置身車王展覧(LG2層) 

深受大人與小朋友期待的迪士尼.彼思《反斗車王3》將於7月13日上映。又一城中庭將化身為1:1車王展覧區,矗立著車壇最高榮譽 — 洲際杯(The Piston Cup) ,而多個電影角色的1:1原大造型,將率先於又一城強勢登場,包括期待以久的電影主角、打遍天下無敵手的閃電王麥坤、新手教練小薑,以及具備最高性能兼外型冷酷的車壇新星積迅黑旋風,讓你可以一睹三大車王的皇者風采!週末期間,現場更設有Instagram相片打印專區,讓你可即時打印出與《反斗車王3》三大主角相遇的難忘時刻。 

Instagram相片打印專區 只限7月1、2、8、9、15、16、22、23、29及30日(下午1時至下午6時)

迪士尼.彼思期間限定店 (LG2層) 
於2017年7月1日至31日期間,又一城於LG2層特設迪士尼.彼思期間限定店,發售逾四百款《反斗車王3》商品潮物,包括逾百款獨家限定商品、玩具、LEGO產品、電玩、文具用品、飾品、家居用品及服裝等;以及其他迪士尼.彼思產品,當中包括多款PIXAR家傳戶曉的卡通人物商品,必定能滿足大家!活動期間更不定期加入新商品,大家密切留意!

《反斗車王3》互動遊戲專區及拍照專區 (G層) 
《反斗車王3》互動遊戲專區讓大家投入最熾熱的賽車氣氛!讓你親身試玩最新的PlayStation 4《反斗車王3》電玩遊戲,享受無可比擬的極速快感;同場更特設Asia Goal賽車賽道,顧客可於指定時間免費試玩《反斗車王3》的遙控車,各位反斗車王迷必定樂而忘返!此外,電影最新角色校巴姐將「破牆而出」與大家見面,讓大小車迷盡情拍照留念! 

《反斗車王3》MATTEL 限定店及遊戲專區 (UG層) 
為滿足一眾喜愛汽車玩具收藏愛好者,又一城於UG層特設《反斗車王3》MATTEL 限定店及遊戲專區!大家更可於限定店選購最新系列模型車及玩具,遊戲區更展示最新的電影場景賽車賽道,歡迎小朋友到場體驗賽車樂趣!此外,顧客只需購買MATTEL 產品 ,即可參加遊戲區於假日舉行的小遊戲;買滿港幣100元,更可碰碰運氣挑戰夾車仔,有機會贏取豐富的《反斗車王》禮品,粉絲們萬勿錯過!

《反斗車王3》DIY專區 自製姓名貼紙、貼紙相機及銅幣製作機(L2層) 
此外,《反斗車王3》DIY專區將設於L2層,讓大家動手自製獨一無二的《反斗車王3》紀念品帶回家,當中包括自製姓名貼紙機、銅幣製作機及貼紙相機,備有多款反斗車王造型任君選擇,大人與小朋友可以DIY心水紀念品,共享難忘回憶!

 迪士尼.彼思《反斗車王3》又一城限定陶瓷杯換領 
於2017年7月1日至31日期間,又一城顧客以電子貨幣付款方式* 於最少兩間不同店舖即日消費滿港幣1,200元或以上+,即可換領《反斗車王 3》限量版陶瓷杯乙隻#,實行以獨家禮遇回饋一眾車迷! 
*必須以電子貨幣付款(只限信用卡、借記卡、易辦事、八達通卡或銀聯卡)。 
+最多可累積四張即日收據。每張收據須為港幣200元或以上。 
#數量有限,送完即止。受條款及細則限制。

(以上資料更新至文章當日)




沒有留言:

發佈留言

Related Posts Plugin for WordPress, Blogger...