2017年4月1日星期六

【親子好去處】金管局資訊中心 HKMA Information Centre

最近哥哥上課學緊「貨幣的運用」,喺屋企拎D真銀出嚟練習,有一日佢問我「點解會有錢? 錢係邊度嚟?」真係啱哂! 因為金管局資訊中心最近翻新後重新開幕,所以就帶埋哥哥嚟一次過解答哂佢所有問題。


大家去到香港站,記住唔駛出去站外,只要扶手電梯往上兩層,經過Apple Store繼續向前行,進入金管局大樓,再搭扶手電梯往地下就會見到Reception! (因為一路嚴禁影相,所以只可以口述)



在大堂以身份証登記(小朋友可豁免),她就會俾你訪客證,入閘後乘搭升降機直上55樓!

去到資訊中心門外的Reception,我先同職員登記10:30的公眾導賞團。另外都有精品紀念品匙扣及紙鎮可以買(不過都係遊客先會買吧!)






門口旁邊已經放咗一大塊展板介紹金管局同埋資訊中心的平面圖



中心的一邊係歷史長廊,講述整個香港貨幣歷史,唔講真係唔知道,原來以前1毫可以買到100份白粥油炸鬼!!!

仲可以睇到以前的1仙同埋紙幣5蚊...連我自己都好有興趣。



不過最吸晴都係呢個用散紙砌出嚟既香港維景...真真真係好利害呀,原來係由一班香港藝術學院學生堆砌而成!


大家估唔估到呢副作品總共用咗幾多枚硬幣砌成? 仲有呢度所有硬幣既總值係幾多? 
(文章最尾開估)



呢度每項介紹都有唔同設計既展板同埋互動裝置或遊戲! 所以睇既時侯都唔會話望兩望就走


即使介紹金管局的功用都有得意互動屏幕去介紹,包你一定唔會悶親


呢個哥哥見到有嘢撳就衝埋去,唔多唔少都會學到D嘢




呢個題目就比較難,就算連我都未必講得閒咩叫「外匯基金」,剩係知道曾蔭權當年97做咗D嘢好勁揪! 依家就...








「好嘢! 有得打機」...哥哥一發現呢度有兩粒大骰就即刻跑過去玩,呢個「智」醒特工遊戲可以單人或對戰模式都可以





擲出骰仔,屏幕即顯示你擲出點數,然後棋子每次要答對問題,先可以行出點數,在棋盤上有個小偷走在前方,最快擲出多點數捉到呢個小偷就算贏。我哋喺度都玩咗幾舖唔捨得走




隔離有另外一個小遊戲,模擬自己係一個農夫,分別可以在自己農田種植蘿蔔及太陽花,每季要選擇自己種植的比例,配合自己預計天氣的變化,最後同電腦比拼收成的成果! (當然同樣有對戰Mode揀啦) 







雖然遊戲小小,但係玩落都幾好玩! 同埋寓意投資有風險,自己要考慮清楚先好作出決定!


跟住職員哥哥入嚟搵我哋開始導賞,因為人少...所以就得我哋! 職員哥哥因應唔同對象,自動調節咗導賞做小朋友Mode




哥哥成日見到我同媽咪去銀行撳機,其實對ATM機認識仲多過銀行,今次職員哥哥講解銀行主要角色係咩,佢又再明白多少少啦!




三大銀行分別係發鈔銀行! 哥哥就問「咁佢哋唔夠銀用嗰陣再不停咁印咪得囉」(呢個都係我當年問過既問題) 其實佢不停咁印,我哋就不停咁拎! 咁咪皆大歡喜囉


唔講真唔留意,原來匯豐鈔票係以香港節日為設計主題,另外渣打係現代歷史對比,中銀係香港風景,如果可以全部儲齊一套就好囉(哈~新屎坑....之前又唔見想儲)








LOL!10角型既伍蚊有冇見過! 仲有5仙、壹蚊、壹毫、伍仙同壹仙既紙幣...唔知第日會唔會$100都變做硬幣呢? 




中心既另外一邊係落地玻璃窗,可以到成個維港景同埋見到中環區各大銀行! 真係好好View呀



如果想咁高望到維港景,除咗去ICC天際100,金管局呢度都係一個唔錯既選擇!




哥哥成日問銀紙係點嚟? 依家呢度可以解答佢個問題啦


當年這新10蚊紙見到唔多鍾意,依家用慣咗又覺得幾順眼,其實諗諗吓呢款整唔皺既銀紙都幾環保!








仲有印鈔過程,成日睇電影見到D人喺度爭搶個印鈔電導板,都唔見有既!












就連印鈔紙張既製造過程都有講解!











最後去番門口旁邊的區別真偽鈔的展區,職員哥哥真係展示真珠都冇咁真既三大銀行1000蚊紙,俾我哋任睇任摸,原來真銀紙上有咁多個我哋平時留意唔到既細節










導賞時間為半小時,我哋臨走前又番去個擲骰遊戲玩咗陣...哥哥每次玩完都話要玩多最後一舖


開番估啦!!

零錢唱總共有135,811枚硬幣;而硬幣總值有$61,582.8

Photo by CANON 5D Mark IV, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分


呀劍評語: 一個免費又學到嘢既好去處,等小朋友可以知道錢係點嚟? (除咗係老爸老媽辛苦搵番嚟既血汗錢) 最重要係呢度全新既互動遊戲,全部都好好玩! 不過對於我哋朝九晚五的朋友們,只可以星期六朝早呢個時間嚟! 如果可以開埋假日就好了

金管局資訊中心 簡介
「金管局資訊中心」介紹香港金融管理局的工作,並收藏中央銀行和有關課題的書籍、期刊及其他文獻。資訊中心包括展覽館和圖書館兩部分,是供金管局職員使用的資訊中心,也是開放予公眾人士的教育及資料研究設施。

地址

中環金融街8號國際金融中心二期55樓

開放時間 

星期一至五 上午10:00 - 下午6:00 
星期六 上午10:00 - 下午1:00 
星期日及公眾假期休息 (休館前二十分鐘停止入場)

免費入場


導賞服務 

公眾導賞服務 展覽館於下列時間為一般訪客提供導賞服務(需時30分鐘): 
星期一至五 下午2:30 星期六 上午10:30
*每次導賞服務名額最多15位,個人參觀者以先到先得方式預先登記。有興趣者請於此服務開始前15分鐘與資訊中心職員登記。


團體參觀

本中心亦為學校、大專院校及非牟利組織提供團體導賞服務(以10至30人計)。導賞需時約1小時,但可按特別需要作出安排。導賞服務不收費用,惟參觀者必須預約及待中心職員回覆確認。 團體導賞服務應於參觀日期最少兩個星期前提出申請。參觀團體須填妥有關申請表(PDF檔案,237KB),然後以傳真方式寄回 2147 9408,或致電2878 1111與資訊中心的職員查詢詳情。

查詢電話

2878 1111

(以上資料更新至文章當日)





沒有留言:

發佈留言

Related Posts Plugin for WordPress, Blogger...