2017年3月18日星期六

【親子好去處】香港賽馬會「港文化‧港創意」—「入鄉‧隨續」X 元朗 & 屯門 Container Art

難得今日入元朗有個小小空檔,知道劇院附近空草有攪作,於是同芊芊兩個去睇吓有咩睇有咩玩,估唔到都發現到小驚喜!


今次展覽主要介紹新界西北的元朗及屯門,兩地都係昔日的漁米之鄉,更加係本地主要鄧氏親族的聚居嘅地方。




數百年來都留傳咗好多好多本地文化色彩,同埋唔少嘅節慶,習俗和禮儀。今次文化葫蘆以四個貨櫃為一組展現的社區歷史,而其他十個貨櫃就邀請社區團體及藝術家一同參與



場外場內都好多打卡位,有我哋最鍾意嘅芒草呀!唔駛行到上山都可以見到啦



為咗俾入場人仕參觀得舒服,在場都設有人流管制,避免過多人數參觀!

入到場芊芊就好似其他小朋友一樣就俾呢個小小裝置吸引,「又如個高山又如個谷」小朋友都喺度爬嚟爬去,足足喺度玩咗成20分鐘,叫咗好耐都唔肯走,哈~











之後到了打卡位梗係要影番張相啦

呢度每個貨櫃都充滿特色,個個貨櫃外面都油得靚靚,全部都係元朗屯門的保育特色








轉過嚟呢邊...嘩!居然有韆鞦玩,在大貨櫃裡裝置了一個簡約設計的韆鞦,地上舖滿禾乾草。這個由Milk Design設計名為Happy Together的鞦韆,讓我們再思考城巿發展,本地生態與自然環境之間的平衡


每位只有2分鐘參觀,大家都好自律俾小朋友玩一陣間影張相就輪到下一個(記住只有十二歲以下先可以坐上去)









然後嚟到呢個叫做「融‧化」的作品,芊芊見到覺得全部都好似冰,其實由多個方形盒子疊砌,代表文化的累積,盒子周圍都係流蠟,代表文化的轉變、消失及保留。藝術嘅嘢...你識條...











另外最注目相信係呢個大燈籠,燈籠就唔識飛,只係坐落地上!好似許願樹一樣大家可以拿起木條,寫上願望然後將木條拋進燈籠內,希望願望成真!芊芊當然唔執輸,有得玩就唔理係許願定咩原因







拎起木條佢話要寫自己個名,跟住我叫佢寫埋Happy,但願呢個小朋友長大以後仍然可以繼續開開心心







不定時有個Hea唱會! 唔知有幾Hea呢?




同場加設2大免費活動,會場提供陶瓷杯墊多款紙膠帶俾大家發揮創意,亦歡迎參觀者自備其他環保器皿,如膠樽或玻璃瓶等。

另外有19款元朗及屯門特色橡皮印章免費無限印印章圖案夠地道,有厦村鄧氏宗祠及友恭學校、聚星樓、南生圍、吉慶圍的連環鐵門、輕鐵等,非常有收藏價值。






現場仲有導賞團可即場報名


行多兩步見到有檔絲襪奶茶檔口!嘩,原來係冠軍茶王即場冲港式奶茶你飲!我呢個奶茶控一定唔會錯過!





藍染我好想玩呀! 藍染是一種傳統的染布工作,一定要介紹啦! 藍染的最主要特色是不溶於水。希望將來有機會同兩個細路玩下





睇到好多其他漁業農民的用具,自己都嘆為觀止!估唔到呢件工具係用嚟捉魚,呢個籃就係今天我哋嘅雪櫃,因為唔想俾貓同老鼠偷食所以吊起上來。









另外一些貨櫃跟其他社區團體及藝術家合作,所以除咗歷史之外仲有其他藝術展覽可以欣賞!





咁啱今日係開幕日,所以俾芊芊撞正有得睇Lion Dance。從來都未試過咁近距離咁睇㗎!



仲有觸執毛呀! 同其他表演睇



呢幅橫匾係另一位藝術家Angryangry繪畫,圖中解構厦村鄧氏宗祠,真係畫得好仔細好靚!







場內仲有其他貨櫃,但係唔詳細介紹啦,不如大家都搵個時間嚟欣賞啦! 今次展覽最開心不過就係拎到場內派發呢本書,有成300幾頁介紹元朗屯門的一般歷史,仲有好多靚相同海報地圖








Photo by CANON 5D Mark III, Len | EF 24-70mm f/2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 9分


呀劍評語: 真係一個新界元朗及屯門歷史大集結,最詳盡最多資料既一次展覽,有韆鞦=小朋友,有奶茶=爸爸,有時裝=媽媽,仲唔係啱哂一家大細到場欣賞! 

「入鄉‧隨續」元朗 X 屯門 簡介
以14個貨櫃臨時搭建而成,櫃內將展出元朗及屯門區社區文化、故事及藝術品。Chochukmo 觸執毛 x Lil' Ashes (小塵埃) x 金茶王奶茶示範及品嚐 x 茶粿製作技藝示範及品嚐x特色墟市及小食攤檔 x 圍村特色小食 x 本地手藝工作坊 x 大型親子互動遊戲 x 舞獅表演

//文化貨櫃//

今年香港賽馬會「港文化‧港創意」主展場的選址在元朗市中心—元朗劇院旁的空地,人流暢旺川流不息。文化葫蘆策展團隊一如既往,以創新理念融合社區元素,構思出別具心裁,充滿藝術氣息的臨時展場。今年我們將以十四個貨櫃作為載體,展示在元朗和屯門區搜集回來的社區文化和故事。團隊經過在地考察,走進大小村落和田野,尋找發掘一些近乎被遺忘的鄉間舊事和民間風俗,從而啟發創意作品。 文化葫蘆以四個貨櫃為一組展現的社區歷史外,其他十個貨櫃會邀請社區團體、藝術家和不同的大專院校共同參與。策展團隊希望觀眾能透過這系列以歷史文化、藝術和設計相結合的藝術貨櫃,讓觀眾思考社區文化的承傳與人文關懷,以此回應展覽的主題「入鄉‧隨續」的真正意義。

展覽日期

2017年3月18日 - 4月23日

地點開放時間

元朗體育路9號元朗劇院對外空地
逢星期三至星期日及公眾假期12nn - 7pm

元朗厦村鄧氏宗祠及友恭學校

逢星期一、三至星期日開放11am - 5pm

(以上資料更新至文章當日)





沒有留言:

發佈留言

Related Posts Plugin for WordPress, Blogger...