2017年1月22日星期日

【親子好去處】Toys"R"Us 玩具"反"斗城 "反"斗年宵玩具巿集

年又過年,行年宵花巿呢個節目一定唔少得,但係都要先滿足咗小朋友先得,今晚帶咗哥哥嚟玩具"反"斗城行玩具年宵,咁到時再帶佢哋去行大人年宵就唔會扭計啦!


今日只得哥哥一個同我兩父子到玩具"反"斗城行街街,未開始行年攤檔之前,哥哥見到周圍嘅玩具已經流哂口水


我好鍾意呢個Lego新年全盒,連五代同堂、炮仗,同埋全盒裡面嘅糖果都做得好似


咁多隻Lego雞仔真係好Cute好得意


知道妹妹今日嚟唔到,佢話要影相俾芊芊睇吓有咁大隻Bear Bear喎,有陣時呢個哥哥又真係好Sweet



玩具年宵巿集開始啦!所有攤檔就分佈在店內不同位置,我哋先去玩泥膠,當你完成指示仲可以得到小禮物一份





跟住哥哥再同Thomas玩遊戲,只要揭開每一張牌,配對成功又得到小禮物貼紙一張啦!



行前少少見到有得彈琴,哥哥梗係走埋去演吓嘢先啦,點知原來要跟住攤檔的琴譜去彈!新年就到當然要佢彈番首「迎春花」啦!




不過當佢彈完之後,其實我都唔係好知佢彈緊乜




呢個攤檔不得了呀!原來係要同Barbie換衫呀,妹妹今日唔喺度,唯有哥哥頂硬上玩吓女仔遊戲俾我影相啦


不過哥哥一嚟就除咗Barbie件衫,喂!人哋嗰件係底衫嚟㗎,唔駛除㗎!攪到企喺側邊個老豆好尷尬紅都面哂!下次姐姐你講清楚D係幫Barbie着衫,唔係換衫呀





成日幫開妹妹着鞋嘅哥哥,今次幫Barbie着鞋點會難得到佢!成功幫Barbie換新裝之後仲可以得到Barbie利是封呀,巧靚靚㗎!




哥哥成日都好想玩嘅R2D2,今日終於俾佢恨到啦,不過我都係叫職員哥哥喺附近睇住佢,因為我怕哥哥一時失手整跌R2D2攪到粉身碎骨。





呢個小蜜峰遊戲好過癮,要喺限時之內將蜜糖一格一格咁拎出嚟,如果俾蜜峰發現一伸個頭出嚟就會輸兼嚇死




呢個攤位係玩桌上遊戲,雖然唔夠時間玩,但係都可以試玩一下,玩完仲有UNO利是封送呀!



仲有呢個好似鱷魚牙醫嘅遊戲叫做「搖搖鯊魚」,要按自己魚竿顏色鬥快將鯊魚口中寶物釣出嚟,同埋現場其他小朋友一齊鬥都幾開心㗎!





仲有呢個Hot Wheel,只要一拍落去架車360度環迴飛到終點就可以得到貼紙一張


呢款體操王子單槓遊戲,早前在fb都有見過人玩,仲成功落地好勁又好攪笑!但係原來真係好難玩




玩完咁多個攤位之後,俾我哋發現到Hatchimals Egg呀,上一次嚟啱啱冇哂貨



可以真係孵隻雀仔出嚟,然後教佢行教佢跳同講嘢㗎!哥哥話好想買俾妹妹喎,估唔到你又幾錫妹妹喎,定係你諗住咁樣講就可以買咗番去先算


不過呢頭講完嗰頭有得玩個小小問答遊戲喎,姐姐要小朋友講到三句賀年說話就可以得到Hatchimals Egg一隻!點知哥哥真係最快舉手仲答啱問題,喺Geoffrey手上得到呢個禮物,佢話要送俾妹妹(一番到屋企即刻拎出嚟送俾妹妹,妹妹超開心!)


當然要同新年Look嘅Geoffrey影番張相啦!祝大家新年快樂,出入平安




送猴迎雞,大「雞」大利!今年玩具"反"斗城再有年宵玩具巿集,加多咗好多免費遊戲攤檔,大家去行大年宵花巿之前一於帶埋小朋友嚟行番個圈啦!


Photo by CANON 5D Mark IV, Len | EF 24-70mm f2.8L II USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分


呀劍評語: 如果你帶埋小朋友去呢個玩具年宵巿集,會唔會俾小朋友扭住買玩具我就唔知道,但係免費入嚟玩個圈同埋贏番幾款利是封同小禮品都真係幾筍㗎!


“反”斗年宵玩具巿集 簡介
玩具"反"斗城在1月21日至22日和1月25至27日期間,再次強勢舉辦「"反"斗 合家歡年宵派對」,三大分店包括尖沙咀、銅鑼灣及沙田店將雲集各大玩具品牌充滿新春佈置的年宵攤位,設置小朋友勁Like的遊戲,玩具品牌包括經期的Hello Kitty、Barbie、Thomas & Friends、大熱的「星夢學園」、「妖怪手錶」、新奇好玩的Mattel Games、Hot Wheels、「假面騎士鎧武」等等。各到訪的小朋友有如走入巿集,於店內的年宵攤位隨意試玩各 款至新玩具的同時,更可參與特設的遊戲,體驗特色遊戲的樂趣如一嘗當鋼琴家滋味,按指示完成任務或勝出,更可即時取走別注版小禮物,滿載而歸。此外,店員會換上春節的服飾迎新年,而玩具"反"斗城吉祥物Geoffrey更會隨時現身於店內,向一眾大小朋友拜個早年,並大派新春優惠券。

日期
1月21至22日、1月25至27日(年廿八至三十)

時間

晚上6時至10時

地點
尖沙咀店(尖沙咀海運大廈地下OTG23號舖)
銅鑼灣店(銅鑼灣皇室堡7字樓舖)
沙田店(沙田新城巿廣場第3期1樓A198-A199號舖)

(以上資料更新至文章當日)




沒有留言:

發佈留言

Related Posts Plugin for WordPress, Blogger...