2016年12月17日星期六

【親子好去處】448農莊 448Farm (足本 Full Version)

農場去得多,但係一點商業味道都冇嘅真係唔多,今日為大家介紹位於元朗的448農莊


新開張不到3個月,位於元朗欖口村欖提東路!暫時未有甚麼交通工具可以直達,大家在元朗打的唔駛$30就去到



去到目的地只見一片花海,非常靚靚!




農莊入口的卡板車接待處好有特色,原來係農莊負責人樹根哥自己一手一腳親力親為製造。


我先睇吓入場收費,原來只係$30一位!俾多廿蚊仲可以參加埋一個魚菜共生嘅導賞團,時間分別每兩個鐘一場,每場大約半個鐘頭,全日總共有4段






我哋當時入到大約2點,所以我哋放低包包準備跟樹根哥去導賞




入口兩旁種滿色彩繽紛嘅花海,有一串紅,同埋紫色一串串的鼠尾草(大家起初都以為係薰衣草)



  

層叠式種植係其中一樣設備由樹根哥從台灣引入再加以改良的種植方式,喺導賞嘅時侯都會有詳盡講解


穿過花海左手邊就係小賣部,備有一般飲料及燒賣魚蛋等小食!



門上仲寫上各新界的士電話方便大家離開時Call的(大家留意番最高那個是紅的,因為我試過^.^,已經叫職員幫手刪去)




小賣部旁設有休憩地方


隔離又有花卉售賣及一兩個攤位教做小手工(另外收費)等


由小賣部向外望出去,就係大大嘅草坪!左手邊就係農莊嘅地標「退役巴士」樹根哥話佢用咗5皮去購入這架巴士,再親手將佢油上紅色,小朋友見到都好興奮,第一個問題就係問「搭唔搭得架?」

另外旁邊有個藍色帳蓬,係俾人攪生日Party!喺佢兩邊各有條小路,一邊通去溫室,一邊去其他遊玩設施及野餐營地



其實樹根哥唔止識得種嘢、揼嘢、砌嘢!仲識得畫嘢,呢個「家庭農莊」4隻大字寫得好型


Party區後有幾個流動厠所,仲有浴室,如果你係選擇露營的話可以喺度沖埋涼


仲有爆谷綿花糖賣呀


同埋有少量簡單玩具可以買嚟玩




哈,原來養咗隻小鸚鵡,餵食到佢連電芯都要咬


玩慣雀嘅哥哥當然又想叫鸚鵡仔爬上自己隻手度啦,佢又幾醒目喎,識得將手袖包住自己唔駛驚俾佢抓親


成功!





呢個生招牌又係樹根哥之作,佢訂造呢幾隻小矮人都真係好靚!佢其實真係唔單止係一個農夫咁簡單,可以話係藝術設計師


這邊的北歐風格小屋又係佢自己一木一釘揼出嚟!


全部都利用棄置嘅卡板製造




樹根哥帶我哋先去到溫室參觀,途中經過的一樹一木一花一草都係佢種植出來




佢話呢架木頭老爺車仲係製作階段,話整整吓諗唔到點整所以放喺度先,幾時有靈感就隨時又會開始番




每一個悠憩區都充滿特色








跟住樹根哥我哋去到溫室,開始我哋嘅導賞團!




全個溫室都係採用層叠式種植,由台灣引入嘅「玉女蕃茄」,經過樹根哥少少改良,令呢個層叠式種植更有效去控制泥土嘅溫度,令結出嘅果實更靚!




用夾夾住呢個就係我細細個學嘅接枝法啦!




樹根哥冇因為小朋友年紀少就求求其其講就算,仍然十分認真為我哋解釋同講解!




之後去到隔離溫室,全部都係菜!今次係用咗離地式種植,因為樹根哥話有一種害蟲係可以跳上一米高嘅地方,所以先會用呢種方法!








然後我哋都一齊去親身體驗一下將菜苗插進泥土




樹根哥抱起芊芊上去泥土,教佢點樣將菜苗插入泥土





原來泥土極之鬆軟,一摸落去手感真係超舒服




參觀完溫室,我哋先去洗洗手!呢個裝置真係好過癮,吸引到小朋友都要爭住洗手






樹根哥仲教我哋最傳統最簡單既廚餘桶仲好過依家坊間的先進廚餘機



去到戲肉啦! 樹根哥帶我哋入咗去一個大房間,就係魚菜共生系統空間,一入門口見到前面對住的大魚缸,玻璃窗裡的錦鯉就好似一幅畫咁! 真係超靚




利用錦鯉排出的糞便,再經過過濾系統,再將輸出的營養供應給種植的蔬菜




小朋友拿了一堆魚糧餵魚,哥哥大膽到拎住一粒粒魚糧直接等錦鯉過嚟食唔怕俾佢咬親!







之後再爬埋上去大缸上餵...(我好驚佢哋會跌落去)





樹根哥簡單哋講解咩係「魚菜共生」,雖然我哋都聽唔明,但係見到佢嗰份熱誠,就好佩服佢,同埋覺得佢真係識好多嘢! 所以話讀「死」書都未必會好叻






我哋繞到大魚缸背後,欣賞樹根哥自己建搭的魚菜共生系統,一重一重的過濾設備,真係嘆為觀止




同埋唔講真係唔知道,原來蠔殼係充滿養分,當佢一路腐蝕既時侯就會流出「鋅」,有助蔬菜健康生長




跟住樹根哥俾小朋友摘由魚菜共生系統種植出嚟既士多啤梨




佢哋兩個都好開心! 食落特別清甜




之後再去到另一個地方參觀其他養殖池同埋各種過濾池,樹根哥話好少帶人入嚟呢間房,因為就算講都未必明,佢話見我哋咁大興趣又好似識少少嘢咁,所以先有幸入嚟參觀




導賞大約需時半個鐘,小朋友聽咗咁耐都開始悶悶哋,終於到咗「放電」時間啦!

我哋去番頭先開Party的地方旁邊,因為有個好靚既小矮人裝置,加埋「448 Farm」個招牌,一定要影番張靚相




當然唔少得梗係搵埋樹根哥一齊合照啦



再行入去仲有小動物睇! 雖然唔係太多,但係可以好近距離咁接觸,呢面籠裡面養住幾隻雀仔同埋盾臂龜






旁邊仲有兔仔,這裡毋需購買青草去餵飼動物,大家只需要在附近拔雜草去餵就可以,仲有可以行埋入去唔駛隔住個圍欄去餵





超卡嘩耳呢!!!!


動物區對面就係兒童遊戲區,鍾意爬嚟爬去既小朋友就最啱! 


呢套遊玩設施好新淨,仲十分安全! 小朋友喺度放電,大朋友可以坐埋一邊休息吓,媽咪就番去小賣部睇吓有咩買

















呢個韆鞦好靚,睇落去坐喺度好安全同應該好舒服!




老豆要影相,哥哥梗係要負責去推妹妹玩啦!



出番嚟大草地呢一邊,兩個見到咩就隨手拎嚟玩



哥哥連BB玩瀡滑梯都唔放過!










樹根哥好醒目,用5萬蚊去買咗呢架退役巴士番嚟農莊做生招牌,全部自己一手一腳油上紅色(如果可以行埋上去就好啦!)













大草地中間仲放咗一架好歐陸式既單車喺度,用嚟影相真係超美!


最鍾意扮馬騮既哥哥又可以喺草地上四腳爬爬啦...





如果可以喺度瞓一個下午真係超正







樹根哥仲送咗兩隻公仔俾我哋! 哥哥見到妹妹揀咗隻大猩猩,跟住又「隔離飯香」覺得自己嗰隻小笨象唔夠靚




好啦好啦,兩個等咗好耐既電動車終於老爸俾佢哋玩啦! $25 半小時,兩個小朋友揀番架自己鍾意既車款先!




決定咗揀邊個之後就出發啦 (大家記住係唔俾換車架,所以要問清楚小朋友確定邊架先好開始)




同其他農莊或遊樂場唔同,呢度可以開住架車行去邊度都得,總之喺個農莊範圍內就可以,唔駛只係得一個框框不停轉圈






呢個哥哥亂衝亂撞, 如果俾佢真係喺馬路度行真係唔知撞咗去邊...




咁啱兩個揀番同自己件衫咁襯色既電動車!







玩完車之後樹根哥咁啱又得閒, 所以帶我哋行上去其他地方參觀,原來呢度真係咁大


呢度原來仲有塊咁大既農地,有白蘿蔔同蕃薯種咗喺度!



佢話呢度種既都唔係為咗賺錢,佢話如果有人買先至會賣或者自己屋企人食(心諗佢屋企都幾多人架喎)




呢個哥哥唔知喺邊度多手抆咗舊蕃薯出嚟



喺農莊最入既地方原來設有一個靈營區(野餐區),內有一大遍草地,俾有需要朋友晚上喺度紮營過夜!





如果大家入嚟露營可能會想知佢小賣部幾點閂門,其實樹根哥好冇所謂,只要大家有需要都會盡量留守到最後供應大家,佢要離開之前點都會通知營地朋友有冇Last Order! 哈哈




再行前少少有部掘土機喺度翻鬆緊泥土,旁邊既白鷺都好聰明,一聽到引擎開動聲就飛哂過嚟,佢哋一D都唔驚咁大部掘土車,因為佢哋知道當泥土翻鬆既時侯,就會有好多蚯蚓食!

唔好見我扮哂專家咁,其實係樹根哥話我哋知!....



當我哋等緊車準備要出番去西鐵搭車走嗰陣,突然成群羊放咗出嚟周圍跑




小朋友都超興奮,可以咁短距離接觸羊羊!





佢哋又會識得自己成群跑入去自己地頭食草飲水! 可能去慣去熟...


實在係我最近至愛推介!一個充滿悠閒簡約的農莊,難得沒有很重商業味道,合理收費,於玩樂予學習,適合一家大細。



Photo by CANON 5D Mark IV, Len | EF 24-70mm f2.8L II USM


呀劍評分: 10分


呀劍評語: 完全沒有商業味的農莊,而且不單入內玩,更加學識甚麼叫做「魚菜共生」,$30玩一日(某些遊戲設施需另外收費),$50仲可以參加埋導賞真係有得玩又學到嘢!

448農莊 簡介
與其他一般農莊不同,負責人樹根哥,主打新式耕作及推廣環保種植,他以層叠式、魚菜共生、離地式、廚餘堆肥四種種植設備,擺脫傳統種植方式。另外只備有少量滑梯、電動車等兒童玩樂設備,旨在增加小朋友的專注力。


地址
元朗欖口村欖堤東路

開放時間
09:30-17:30(需要預約)

收費

入場費$30(三歲以下免費)
導賞優惠:四種新式種植講解$50(包括入場費)


交通
體育路去到欖口村路,再轉入欖堤東路盡頭就到448農莊
(免費泊車,車位有限)

電話
6684 1448


(以上資料更新至文章當日)





沒有留言:

發佈留言

Related Posts Plugin for WordPress, Blogger...