2016年11月6日星期日

【親子行山】南朗山 南朗亭

秋高氣爽唔係唔去行山卦,依家行山幾乎成為一種潮流,唔行唔知身體好呀!所以都要帶佢哋兩個嚟行下,鍛鍊一下身體!



去南朗山唔難,只要沿黃竹坑舊巴士總站對面新加坡國際學校旁的南朗山道而上,進入單程路後前行不久到達左方的登山梯級。



雖然寫住係休憩花園,但係穿過花園後可繼續上山行,行至南朗亭!



見到呢個畫面真係覺得兄妹情深,互相扶持一齊行上山!




行大約唔駛10分鐘,好快就見到休憩花園,花園冇咩設施,都係有一兩部俾老友記練功嘅設施,仲有一個小涼亭!




喺涼亭隔離見到有一條樓梯,繼續直上就係我哋今次嚟嘅主要目的!




經過南朗山休憩公園的涼亭後續沿梯級登上,景觀越嚟越開揚,喺山徑中會常聽到海洋公園過山車的喧叫聲,突然熱鬧起來。原來行到上嚟可以俯瞰成大部份海洋公園嘅景觀!




行到攰攰地可以坐喺樓梯休息吓...因為好好風,喺度坐一陣望向海洋公園又吹住涼風確係好醒神





前面兩邊樹身高到拼埋咗形成好似一條隧道咁!



哥哥周不時指向海洋公園,話俾呀芊聽邊個係過山車,邊個係星際蜘蛛!








本來諗住打退堂鼓,但係哥哥又好有決心咁想一直行上去,所以我就帶住呀芊一齊跟住哥哥勇往直前






好在間唔時可以望到旁邊靚靚的花,所以行下行下都唔覺辛苦,仲好快見到個涼亭,就係「南朗亭」啦!








終於行到上嚟!即刻要坐低抖一抖,山上好食風,非常舒服!




呢度同時也可欣賞深灣、鴨脷洲及南丫島一帶的海峽景色。




仲有好多小昆蟲...媽咪就驚驚!呢D昆蟲喺山上見到冇咩嘢,但係唔知點解如果喺屋企見到實會We嘩鬼叫



如果再行上去的話就係呢D比較簡陋人工揼出嚟嘅樓梯喇!我知道再行上去可以見到直昇機坪,不過今日我哋點到即止,亦冇特別準備水和糧食,所以留番下次再行過




今日主要嚟欣賞呢個海洋公園景色已經非常開心!




坐喺涼亭度休息多一陣,我哋就落番山回程lu...小朋友細細個其實好行得,所以可以帶佢哋多D出去戶外活動行吓山,相信2-3個鐘絕對唔係問題







Photo by CANON 5D Mark IV, Len | EF 24-70mm f2.8L II USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 7分


呀劍評語: 輕輕鬆鬆就行咗上南朗亭,可以望到成個海洋公園,真係有得睇冇得玩,但係都另有一番風味同體驗㗎!

南朗山 簡介

南朗山(或寫作南塱山,英文:Brick Hill)是香港的山峰之一,位於香港島南區,海拔284米,北靠班納山和金馬倫山,南望南中國海,西臨深灣、香港仔南避風塘、布廠灣及大樹灣,東至深水灣。

(以上資料更新至文章當日)




沒有留言:

發佈留言

Related Posts Plugin for WordPress, Blogger...