2016年11月26日星期六

【親子好去處】銅鑼灣 第28屆閱讀嘉年華 @維多利亞公園 Victoria Park

一年一度必定捧場嘅閱讀嘉年華,今日就有少少失望,因為「打波先嚟落雨」,所以玩得唔盡興仲要中途腰斬提早收檔!


我哋同哥哥芊芊星期六學完彈琴跳舞,就嚟到維園參與閱讀嘉年華!一入到大草地先唔玩攤位遊戲,因為見到呢個充氣彈床冇人排隊,所以就跑過去玩一轉先


但係好慘哥哥一上去瀡一轉個天就開始落雨,所以逼住要出番嚟冇得玩



雖然毛毛雨,我哋一場嚟到都繼續拎住把遮去玩攤位遊戲,呢個遊戲都考起我,要對照番狗狗嘅品種名同佢個樣,不過都有貼士嘅,所以好輕易就可以吸到個印仔



我哋好鍾意呢個閱讀嘉年華,係因為欣賞每個攤位幾乎都係靠呢班小學生去負責,去到呢個小故事攤位,兩個小學女生拎住把遮,都講故事俾哥哥妹妹聽,講講吓一陣風吹過嚟,佢哋個麥記餐仲差D倒瀉哂,真係辛苦哂!







芊芊跟我出嚟玩得多,玩攤位遊戲絕對冇難度,一掉個波就掉入格裡面









遊戲雖然簡單,但係好好玩!而且遊戲冇分贏定輸,只要參與玩過都可以吸到個印,最後就可以去換獎品。。。我哋繼續玩玩玩....中間有時大雨有時細雨





























雖然有D掃興,有好多舞台上的表演都已經取消咗,但係好多家庭都繼續留守到最後一秒...相反落住雨,玩每個攤位遊戲都幾乎唔駛排隊,都係一件好事




最後我哋嚟到呢度聽伯伯講故事,仲送我哋每人一支竹(膠)蜻蜓!點解係「最後」,因為之後真係超大雨,所以逼住要搵地方避一避!





最後我哋去咗小食亭度叫咗好多Round魚蛋燒賣,因為落住雨天氣凍起上嚟,所以要食番D熱嘢保保暖,一邊食一邊睇住好多小學生狼狽咁拎住D「貨」同老師入嚟避雨,老師萬歲請食嘢,其實都幾Warm幾Sweet!希望下年會好天D,We'll be back!



Photo by CANON 5D Mark IV, Len | EF 24-70mm f2.8L II USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 7分


呀劍評語: 雖然今年天氣唔好,玩得冇咁盡興!不過見到老師學生夾手夾腳去Hold一個攤位又咁辛苦,就覺得今次嚟支持係冇錯嘅!再者天氣唔好少咗人,我哋玩每個攤位都唔駛排隊,仲可以換到好多獎品!Yeah!


第28屆閱讀嘉年華 簡介
「閱讀嘉年華」是一項極具意義的活動。活動對象為全港中小學生,希望透過遊戲及各項比賽,引發學生對閱讀的興趣,擴闊他們閱讀的範圍和知識,培養閱讀的習慣 ; 同時亦推廣普及閱讀的訊息,希望閱讀成為市民大眾生活的一環,從而令閱讀風氣延續下去。


地址
香港維多利亞公園中央草坪

活動時間
11月26日星期六上午10時30分至下午4時30分

對象

公開予所有人士參與,適合親子及中小學生,欲參加遊戲攤位的人士需要先行經學校索取遊戲券

免費入場

電話
2780 7337

(以上資料更新至文章當日)




沒有留言:

發佈留言

Related Posts Plugin for WordPress, Blogger...