2016年11月6日星期日

【親子好去處】2016 Ford Ranger One Day Trip 新款福特 Ranger「浪子」- 自駕遊

 多謝福特Ford的邀請,可以初試新款型號Ranger,載住呀劍一家遊車河玩足一日!


今次行程俾呀劍一家自己擬定路線,原本希望同小朋友到西貢郊外走一走!



不過因為我家小姐搭親車都會暈車浪,所以不適宜定長線遊,因為佢如果車程多過半個鐘,佢就會開始陷入發瘋狀態


同佢哋相量過後佢哋對路線及去邊度不大感興趣,只係希望去飲茶食鳳爪排骨飯~ 滴汗無言

咁既然係去飲茶,我就諗起好多嚟香港旅遊嘅朋友都會去嘅「珍寶海鮮舫」,相反我哋喺香港長大一次都未去過,所以我哋就以「珍寶海鮮舫」為我哋出發嘅第一站,之後再決定路線唔遠嘅其他景點




今次Ford為我哋預備了司機叔叔,我哋10:00準時喺屋企樓下出發,大約半個鐘我哋就到咗碼頭


Ranger離開咗我哋就準備上船LU...



搭船都成為其中一個小旅程,兩個小朋友都好興奮!



離遠望見JUMBO,佢哋仍然好懷疑咁問我「間酒樓真係喺海上面㗎?」



短短5分鐘船程就到達JUMBO啦!



快D走上去醫醫肚...



周圍環境都好華麗!好多卡通及西片都成日會喺度取景,今日第一次上嚟真係覺得好靚





酒樓入面兩端都有個皇帝龍座供人拍照!




仲可以俾錢租龍袍宮女服影相



好懷舊嘅糕點車!我細細個就係成日去飲茶,企喺架車前面等呀姐煎蘿蔔糕



好親切嘅大排檔,真係覺得依家飲茶寫點心咭冇哂風味!





仲有粥車有我至愛嘅皮蛋瘦肉粥,仲記得細個成日叫呀姐落好多薄脆俾我



食飽飽之後我哋就搭番船離開JUMBO



我哋又準備上番Ranger出發去第二個景點啦



頭先都講過,因為呀妹唔坐得車太耐,所以我哋揀咗附近嘅地點去玩,原來喺附近有個黃竹坑配水庫,上面有個公園仔可以俾佢哋踩吓單車周圍跑



向住南朗山道出發,喺配水庫附近一所國際學校停車,然後行過對面就係啦







入咗去休憇公園轉右,穿過藍色鐵閘,沿住斜路行上去,10分鐘唔駛就行到上去配水庫平台遊樂場





呢度地方好靚好大,足夠俾小朋友放電!勝在一個人都冇,只係間唔中有D行山朋友經過望吓,相信平時絕對唔會有人專登過嚟跑步做運動,呢度仲要有好多老友記嘅設施喺度,希望有老友記朝早晨運會行上嚟玩吓!如果唔係就真係好嘥...







望番落去成個深灣景觀!



中間有個小小涼亭好有Feel,因為有好多籐樹包圍住...加埋四周圍都冇高樓大廈,簡直覺得自己好似去咗天空之城咁!




離開咗配水庫之後我哋繼續坐Ranger上山,唔駛3分鐘我哋又到咗下一個景點,就係南朗山道休憩花園,既然食飽就嚟做吓運動行吓山啦




雖然話係行山,但係其實一D都唔難行,首先行一小段路就會到休憩花園,但係當然呢度唔係我哋嘅終點啦





喺涼亭隔離有另一段樓梯,繼續往上行就可以俯瞰成個海洋公園嘅景觀!



已經見到過山車個View啦!




行到上嚟有個小景點,因為兩旁嘅樹生得密質質,結果好似變咗條小隧道咁好得意

坐喺呢度吹住風望番落去海洋公園真係好靚好舒服㗎!



今日天氣都算熱,本來我都打算打退堂鼓番落去,點知哥哥唔知邊度嚟嘅鬥志要行埋上去!


真係皇天不負有心哥!終於俾佢見到南朗亭啦!




上到嚟好大風好舒服!可以好清楚咁望到成個海洋公園!



坐低休息咗一陣,欣賞埋個靚景,我哋就落番山準備又去下個地方啦 (BTW哥哥你隻手喺度做乜...)


出發之前梗係要同Ford Ranger又影番幾張相先啦!


望住呢張相簡直覺得就係「靚人、靚車、靚景!」


換轉係哥哥坐上去尾板就似去當兵打仗咁...



佢哋兩個好鍾意呢個尾籠,直程話上就咁坐喺度開車!我梗係話一陣架車行行吓就會跌你出去馬路嚇佢哋啦



喺車上面再補給下食吓零食



之後呢一站係我一直想去嘅地方,就係黃泥涌水塘花園,香港唯一一個划艇公園



沿住樓梯行落去就見到好大好靚嘅黃泥涌水塘


呢度有兩個小賣部,一個在入口附近,這個就在水塘邊,同樣賣一些簡單小食如杯麵、三文治等,最正係有啤酒賣...





喺樓梯旁邊就有個售票處,如果假日多人就最好一嚟到就去買定飛,然後去食住嘢等!




呢度除咗有得划艇,仲有得租小型遙控模型船



沿呢條小斜路行上去可以到水壩從另一角度欣賞湖景





跟住售票叔叔俾我哋嘅時間準時番過嚟,就到我哋上船啦!好緊張好興奮呀!



唔駛一陣間我哋已經踩到去好遠好遠



今日天氣相當不錯






一個鐘頭好快過,我哋最後泊番埋岸啦!兩個都好唔捨得好想再繼續玩(但係踩船又影相嗰位好攰囉!)


今次旅程坐嘅Ford Ranger真係全程都好舒服,就連平時坐車瓜瓜嘈嘅芊芊,今日全程都冇喊過,仲好安逸好開心咁坐足全程





其實Ranger仲有好多巴閉功能,Ranger 配備的通氣口及完備的動力系統,能把空氣輸送至所需系統,同時亦可阻止水流干擾汽車功能。差速器、傳動裝置及變速箱上的通氣口均經過特別定位,成就 Ranger 涉水 800 毫米深的強大優勢。

新 Ranger 新穎的前端設計結合了福特的恆溫系統及空氣動力學工程師的努力,完全改變了汽車前端的氣流管理方式,保持重要的零件冷卻。配合全面流體動力學分析的表現,更可確保恰當的空氣量能夠供應至冷卻包的熱交換器──增壓空氣冷卻器、冷凝器及散熱器。



見你今日俾我哋坐得咁舒服,等我俾番個大特寫你先!


差唔多玩咗成日!最後我哋去埋車程不到5分鐘嘅箕璉坊配水庫休憩處




又一個鮮為人知嘅配水庫,喺度玩嘅人多數都係住喺附近嘅居民





平地嘅地方較少,所以踩單車scooter就唔太過癮



呢度有一條255m嘅跑步徑



望番上去就係港安醫院




不過都好適合打吓羽毛球同喺個大草地度踢吓波!



玩完都幾乎天黑,最後嚟番張「太煩的後裔」合照,今日嘅旅程就完滿結束啦!



Photo by CANON 5D Mark IV, Len | EF 24-70mm f2.8L II USM

呀劍評分: 10分


呀劍評語: 多謝Ford今次的邀請可以讓呀劍一家玩轉半個南區,去探索兩個隱世配水庫同划艇公園,而且全程Ranger都坐得好靚好舒服!識買一定買Ford 新款 Ranger

(以上資料更新至文章當日)




沒有留言:

發佈留言

Related Posts Plugin for WordPress, Blogger...