2016年10月12日星期三

【親子好去處】屯門 T · PARK [源 · 區] 全攻略

剛落成在屯門稔灣的T · PARK [源 · 區] ,呀劍已到訪過兩次,大家可以參考一下我的全攻略,可以喺度玩得更盡興!



T · PARK位於屯門龍鼓灘再入D稔灣路的污泥處理廠(其實同下白泥一河之隔)

如果不是穿梭巴士真係只有自駕或的士UBER入到嚟!



以團體報名的上限人數已增至為15-50人,可於一個月至半年之前開始預約,不過唔可以預約[源 · 區]免費穿梭巴士,需要自己Book車出入! 

雖然要自支車費,但係如果你想以個人報名(最多7人並需於30日前),真係唔知可以幾時先預約到,真係星期日至六日日都Full哂! 

T · SPA [泉 · 源] 
10:15am-11:30am 
12:30pm-14:00pm 
14:30pm-16:00pm 
16:30pm-18:30pm 

T · PARK [源 · 區] 導賞 Guide Tour 
10:30am-12:00pm
12:00pm-13:30pm
14:15pm-15:45pm
15:45pm-17:15pm
17:15pm-18:45pm


乘搭T · PARK穿梭巴士由Vcity開出到達大約30分鐘,我建議給大家嘅行程就係預約12:00-13:30的導賞(廣東話導賞一般會有3段時間,另外英語及普通話均為其一,每天語言按排時段有機會不同,一切以官方網頁為準),及14:30-16:00的[源 · 泉]浸Spa

11:00-12:00 參觀[源 · 林]及到足浴池浸腳,再散步到[源 · 湖]觀賞雀鳥
12:00-13:30 到[源 · 廳]集合開始導賞,途中會經過[源 · 點]/[源 · 廊]/[源 · 館]/[源 · 景]
13:30-14:30 大家可到[源 · 茶]享用午膳,飯後可到[源 · 臺]欣賞風景
14:30-16:00 可以到[源 · 泉]浸Spa!(其實浸唔到咁耐) 所以大家可自己調校時間

這個按排可以輕輕鬆鬆參觀哂[源 · 區]內所有設施!仲趕得切番出去食個晚飯



T · PARK [源 · 區] 充滿教育及休閒特色,主要分為[源 · 林]、[源 · 臺]、[源 · 景]、[源 · 廊]、[源 · 湖]、[源 · 泉]、[源 · 廳]、[源 · 點]、[源 · 館] 及 [源 · 茶]

這裡就是[源 · 林],由噴泉花園、悠閒花園、禪園、濕地花園和暖水足浴池組成,整個[源 · 區]綠化面積達70%



噴水池噴得好高好高,可以話係第一個影相景點,兩個都話要同噴水池影張相,好似喺個頭度噴出嚟咁





整個T · PARK [源 · 區]的設計都很獨特,與周邊自然環境融為一體,好識善用天然光,仲有綠化屋頂隔熱




我哋穿過噴水池,先到足浴區浸一浸腳,水溫都幾熱㗎!不過就欠缺咗D遮蔭設施,烈日當空坐低PatPat都幾熱㗎!


不過我哋都搵到個陰涼位坐低舒舒服服咁浸


佢哋兩個就梗係當嬉水池咁玩多過當溫泉浸腳啦




浸咗一陣間,我哋就再向[源 · 湖]出發,一路向前直行,聽講可以欣賞好多雀鳥!





沿路仲有好多靚花睇!當然忍唔住又要停低影靚相啦




繼續行大約5分鐘就見到盡頭!


呢度就係[源 · 湖](其實有少少跌咗眼鏡!乜原來咁細) 同埋真係要自備望遠鏡先得,不過今日行過嚟都只係見到一兩種雀鳥



常見鳥類有只有板上的幾種!



沿路行番出去,入番大樓參觀其他地方!Reception都充滿環保特色!均以木或綠色






T · PARK的「T」原來代表Transformation,「轉廢為能」都係這裡的宗旨

職員哥哥同佢哋兩個介紹T · PARK的模型



我哋先進入[源 · 廳]觀賞影片介紹然後開始導賞



[源 · 廳]就好似一個私人迷你影院





然後開始導賞環節,我哋一家大細經過 [源 · 點] (這裡設有互動遊戲及休憩梳化)沿扶手樓梯上到[源 · 館] 




睇吓玩咩先,原來就係篤番[源 · 湖]可以見到嘅雀鳥資料!





佢哋搵到每一隻雀鳥都好興奮咁要話俾我知,叫我同D雀仔(Mon裡面的)影相


呢個世代嘅小朋友唔通真係要睇虛擬影像?冇得睇真真實實嘅雀仔?







嘩!上到嚟就已經俾呢個后海灣景吸晴去了



碰巧今日天氣十分好!真係想行出去逛逛




導賞開始,考驗職員哥哥控制小朋友秩序嘅能力喇!(唔該幫我兩個小朋友轉廢為能...講笑~)


「轉廢為能」過程 1.污泥接收→2.焚化→3.發電→4.煙道廢氣淨化處理→5.灰壗和殘餘物處理





每一區介紹都有屏幕供點選睇影片介紹






嚟到第3個過程「焚化」,房間內設計模擬了焚化爐火紅紅的特色




一班小朋友坐低欣賞這個寬闊屏幕的影片介紹





經過渦輪機將焚化爐產生的蒸氣轉為電能






旁邊擺放了幾部大電視,畫面上的大海原來就是現場拍攝着的






焚化爐採用了「流化床」技術,把廢物體積大減九成(真的嚇呆了)


真係大大減勁了堆田區的壓力!



小朋友好有秩序的跟着地上的黃色標記路線參觀




離開 [源 · 館]後去到另一邊[源 · 廊]透過大玻璃參觀焚化爐及介紹過的廠房運作及設施營運





行行吓見到幾個回收箱靚靚又影番張相先!









職員哥哥一邊介紹一邊發問問題,冇答過問題嘅芊芊唔知點解都有糖食!~



相信呢個會係景點之一嘅污泥夾,堅1:1



小朋友睇落好留心聽緊哥哥講解,其實佢哋只當係遊樂設施,頭先一開始就想爬上去!哈~



穿過中央控制室(模擬版) 就見到巨大焚化爐啦!




真係大到我影唔哂!



導賞完結後,大會安排了一個茶點時間俾大家可以休息一下充充電「轉食為能」


呢度放咗好多Recycled Products,全部都好有意思


呢幾張車軚造成嘅櫈上次都見過


身後呢個似係屏風嘅設施其實係木地板所造成的,真係好利害!本來可能係別人搬屋將要拆掉去堆填區的東西,搖身一變可以造成咁型嘅裝置




呢張由好多漫畫紙張合成嘅大枱好有型!




仲有牛仔褲布車出嚟就梳化套!


我哋喺呢度逗留咗好耐,唔駛匆匆忙忙跑景點,今次真正舒舒服服咁去欣賞風景


我最欣賞係呢張用工業用的油罐造成嘅櫈,真係好想屋企都放番幾張!




大家又估吓前面呢幾張木櫈係點嚟嘅?


貼士係灣仔碼頭....唔係水餃呀,原來堅係灣仔碼頭前身嘅防撞木,將佢哋翻一翻新又可以俾個新嘅生命佢



然後我哋就坐低俾佢哋兩個畫吓畫!



就連支筆都得意過人,起初以為係好多條草放喺度裝飾用,原來係個筆套











在 [源 · 景] 望出這個后海灣加上T · PARK [源 · 區]的屋頂更加壯觀!


今次嚟餐廳終於開咗啦,叫做[源 · 茶],坐位唔算多,不過足夠預約咗嘅遊客享用


同樣所有座位嘅傢私都滿有環保概念


餐廳提供的食物款式唔多,有意粉/螺絲粉/Pizza等等,全部都係預先包裝好放入微波爐叮熱俾你食,仲有沙律,三文治及其他飲品等


全部都唔算貴,都係$20-$40不等


我哋專登坐開咗,去咗個好有特色嘅地方食嘢!


就係呢個由幾條木砌成嘅座位!


味道唔算特別好食,但係我覺得都還可以!如果大家覺得唔夠,都可以自備食物入[源 · 區]


最特別一樣嘢就係呢度啦!有個自助洗碗區,推行環保教育,所有食客都要自己親手洗自己碗!(唔怪之得嘢食咁平啦...哈哈) 但係我好欣賞呀,尤其係依家D小朋友一定要學識

哥哥妹妹喺屋企都有練開功,所以洗碗對佢哋嚟講冇難度

食完嘢又未夠鐘去[源 · 泉]浸Spa,一於走上去[源 · 臺]欣賞一下風景


[源 · 茶]對出的大露台轉左或右到盡頭,就會見到樓梯直上就是了


一望無際就係呢D啦!對住成個後海灣真係見唔到盡頭!風景靚都不得了,秋天嚟到仲好涼爽大風,真係好想就咁喺度瞓個晏覺




影相景點又出現啦!就係同身後嘅焚化爐影番張相先!





[源 · 臺]望番落去[源 · 林]都幾靚




最後終於嚟到主菜啦!就係T · SPA[源 · 泉],男女共浴!嘩正~


泉區分為3個水療池,全部由焚化過程中產生的熱力加熱或冷卻水溫


左邊為0.9米深16度的冷水池




中間為1.2米深36度大池




最右邊同樣為0.9米深26度的暖水池




同咗哥哥講呢個係SPA,係浸並唔係游!但係佢都已經當咗泳池咁游,失禮死人!



兩個玩到好興奮(番到屋企仲要落會所泳池Encore...) 呢個父親節真係「苦親節」講笑啫~





點辛苦都OK只要你兩兄妹生性就得喇!




再提多大家一次,現時只接受預約申請,個人預約需於一個月入紙申請,團體則半年內可預約!





最後穿過[源 · 林]就出番去門口上車離開了~



不過現時已有過萬人申請了,所以相信大家想申請都有D難度!

想跟我去體驗T · PARK [源 · 區],快D報名親子團,同埋留意專頁公佈詳情啦!

Photo by CANON 5D Mark III, Len | EF 24-70mm f2.8L USM

呀劍評分: 10分


呀劍評語: 一個又好玩又多嘢學嘅地方,必定係假日親子好去處!最緊要係免費入場!

T · PARK [源 · 區] 簡介
T · PARK [源 · 區] 標誌著政府為了社會利益而致力實踐香港「轉廢為能」策略的決心。這座污泥處理設施更展現一個願景,為積極鼓勵並提升市民對廢物管理、資源回收和循環再用建立正面態度。T · PARK [源 · 區] 不僅是一座污泥處理廠,透過其休閒和教育設施,它更是一個學習和體驗香港綠色文化的地方。

地址
屯門曾咀稔灣路

開放時間

星期一、星期三至日 上午 10 時至下午 7 時

交通

乘專用穿梭巴士

聯絡電話

2910 9700

網址

www.tpark.hk

電郵

info@tpark.hk

費用: 全免


(以上資料更新至文章當日)



沒有留言:

發佈留言

Related Posts Plugin for WordPress, Blogger...