2016年8月6日星期六

【親子好去處】上水 Play House @上水匯


去過咁多個Play House玩,但係咁多條瀡滑梯黐埋一齊瀡就真係得上水呢間分店先有,今日仲撞啱有甜心格格駐場可以影靚相㖭!



大家嚟上水分店Play House記住唔好去錯地方,好多朋友以為喺上水廣場,其實係上水匯

有天橋由上水廣場直駁過去上水匯,然後搭Lift直上7樓就係!





兩兄妹準備好哂!一於入去癲番個下晝


場地唔算好大,比起元朗分店細少少,不過都五臟俱全,足夠小朋友放電


場內設有儲物櫃,只需$10(另付$40按金),交匙離開可以拎番按金,放哂喺裡面就可以安心跟住小朋友玩


左手邊係「森林部屋」有棵大樹而裡面放咗好多巨型Lego,周圍都有好多動物車俾小朋友騎住玩


旁邊有個Party房,地方都好大,幾十人喺度玩一定冇問題

 

哥哥一嚟就騎上隻馬度玩


唔單止有馬仔,仲有超大隻馬,似俾大人玩的(不過轉彎唔太順),搬起佢調頭真係重到爆!




你哋都係騎吓馬仔算數喇!


又俾芊芊搵到隻老虎仔騎!


今日剛好有甜心格格的裝置在上水分店出現,一於全世界小朋友喺度同甜心格格影番張大合照

不過其實我估佢哋都唔知甜心格格係乜水,我有睇㗎!(一集咁多)

 

之後佢哋去番大樹下玩Lego,其他小朋友見到哥哥砌到好高,又走埋過嚟一齊玩,好在哥哥都識得接納其他小朋友,可以一齊玩!有進步,叻叻!




喺大樹旁邊有個彈床跳!不過裡面最多容納5個小朋友,但係小朋友又點會知道,所以不斷有小朋友走入去,好在有D比較大嘅小朋友識得講,就封住入口同大家講只限5人同時彈㗎咋!



不過冇限時,如果唔好彩,個個跳到唔捨得走,下一個就要等多陣先可以入去跳啦!哈哈



上水分店最亮點就係呢條「七彩天梯」,芊芊一於少理,大膽行上去瀡落嚟!



有咁多顏色,佢話要每條顏色都要瀡一次 




我瀡!~


呢條天梯唔止好坃,仲係影相靚位,媽咪一於同芊芊影番張靚相!


「逃出亞馬遜」三層高迷宮,夠哂小朋友周圍走玩伏匿匿


好多人都以為我點解次次都剩係影芊芊唔影呀哥,話我好偏心又覺得呀哥好慘

我真係要再澄清一次,係我搵唔到呢個哥哥去咗邊,唔係我唔想影佢囉!~哈哈



自動噴射球機!


每次去到Play House都唔係好明點解網上面總有一堆波喺度,究竟係點射上去㗎呢?



哥哥駕輕就熟一上去就發球射人了!


呢個傻妹就最鍾意周圍行攬住D沙包扮泰山




芊芊另一樣最鍾意玩嘅就梗係波波池啦,知道好多朋友都擔心波波池好污糟,其實依家㲃理得好好,唔會有以前嗰D恐怖傳聞㗎啦!可以好放心咁俾小朋友瞓埋身去玩




呢度波波池都算係最多顏色波波嘅一間!



呢邊全係彈彈系列,有單人彈床,亦有吹氣彈床!一於等小朋友彈餐飽




氣墊球需要付$100按金,哥哥同我一樣好鍾意玩!佢每次都自以為是嘅時侯我就一推KO佢!




呢個哥哥同妹妹玩一D都唔手軟!



下次再有機會去其他場體驗下先!



Photo by CANON 5D Mark III, Len | EF 35mm f1.4L USM

呀劍評分: 7分


呀劍評語: 場地不算大但係都夠玩,最利害係個七彩天梯,一家人瀡落嚟真係影相靚位

Play House 簡介

Play House @ Sheung Shui 是 Play House 在本港開設的第七間大型兒童室內遊樂場,目標為12歲或以下之兒童提供集健體、遊戲及家庭樂於一身的活動場地。 Play House @ Sheung Shui 位於新界上水龍琛路48號上水匯701號舖,位置鄰近上水港鐵站,交通便利。新店佔地近8,000平方呎,今次我地特別將森林帶進兒童室內遊樂場。 場內分為九個區域包括:逃出亞馬遜、激戰活火山、森林部屋、探險家訓練站、小探險家樂園、中央花園、花仙子樂園、原野派對房及蜜蜂補給站。 另外,場內有提供免費無線寬頻上網、舒適休閒空間及自助飲品售賣機。

地址

香港新界上水龍琛路48號上水匯701號舖

營業時間

上午十時至晚上九時
2016年特別日子包括:11/2-16/2, 29/3-1/4, 11/7-31/8, 23/12-31/12 (不包括星期六、日及公眾假期)

入場費
星期一至五(公眾假期除外)
小童(12歲或以下) + 成人  |  日票: $90(會員$75) [額外成人 +$40]; 黃昏入場票(下午五時半後): $60 [額外成人 +$35]

星期六, 日及公眾假期
小童(12歲或以下) + 成人  |  日票: $120(會員$105) [額外成人 +$50]; 黃昏入場票(下午五時半後): $85 [額外成人 +$40]

特別日子及角色體驗活動請參考
http://www.playhouse.com.hk/sheungshui/chinese/index.php?option=com_content&view=article&id=131&Itemid=179

電話

2151 9881

(以上資料更新至文章當日)




沒有留言:

發佈留言

Related Posts Plugin for WordPress, Blogger...