2016年8月4日星期四

【親子好去處】大嶼山 長沙下村 浪高長岸 Long Coast Seasports (Full Version)

夏日炎炎正好眠完全錯哂!梗係帶埋小朋友一家去玩沖浪啦,你以為剩係大人先啱?又錯!大人細路一樣玩得仲加埋個南非營過埋夜玩盡佢!


但係未開始講戲肉,呢個旅程都真係信心嘅考驗,一日之間成為天氣達人

話說營期早在兩個月前已經Book咗,但係到咗呢日烏雲密佈,事因早幾日打風,個波啱啱走咗冇耐,所以連日大雨!

朝早由屋企望出去睇到個天個心都灰咗,正考慮係咪除消改期之際,我就試吓入天文台個App望吓,原來又唔係真係咁難睇,個雷達圖見到未來一兩個鐘都冇咩雲甚至天晴,仲有一個叫「定點降雨預報」直程預測埋俾你知未來1-2小時裡面有冇雨,如果有雨會幾點到,真係太利害啦!(不過諗諗吓政府用我哋咁多錢去做個App都係應份嘅!)


於是我哋膽粗粗同營地負責人講我哋決定照嚟!


我哋先搭港鐵好快去到東涌站,如果大家有咩補給就喺度買定好喇,因為長沙下村那邊只有兩間士多,一間舊式的,另一間係西式的,不過佢哋開店時間都幾「飄」,所以必須品最好買定,如果唔係又要搭番巴士出出入入




去到11號巴士站,當時下晝兩點幾冇咩人!果然不出我所料天氣真係開始放晴停咗雨喇




班次20分鐘一班都算密!如果唔想等可以搭23號又得,不過車費就貴少少




11號巴士平日車費$11.8,但係星期日及公眾假期就成$19.2,唔會有中途優惠,無論你搭到邊都要呢個價錢




車一路行雨又開始落番,我好驚呀!唔通今次呢個行程就咁糟蹋咗,大嗱嗱兩日一夜住宿要$2000蚊


但係已經冇彎轉,我哋搭咗20分鐘度,去到長沙下村(長沙警署下一個站)落車




真係好大雨呀!我哋狼狽拖住個喼又拎住把遮,仲要拖住兩件...




落咗車行前兩步就見到長沙下村個牌,然後沿住斜路行落去停車場就會見到營舍Office

(*條斜路超斜,我非專業估計都有30度,大家要切記小心)





我哋Checkin完跟住職員入去我哋今次要住嘅南非營,因為實在太呢Hea,所以鏡頭一轉就到咗個營啦!(大家見到相中的雨嗎?)

(特別感謝印巴職員單手抬起我哋個喼帶我哋行入Site)





呢度係Zone A總共有4個南非營,沿路再入仲有3個Zone,剛好我哋被安排在Zone A,最近沙灘同Office,所以非常方便!(下圖為身在營中望出去嘅景)



但對於兩個小朋友梗係冇任何大影響啦!就算落住雨都話要出去海灘玩




呢個係6人營,今次帶埋工人姐姐一齊嚟玩,其實負責人都好易話為,見到芊芊咁細,都話可以計佢半個,不過最後我哋都搵唔到多一大一細朋友嚟玩,所以我哋今次都瞓得鬆動D(不過如果你真係叫埋朋友嚟首先你要唔介意同埋佢哋一齊瞓先啦~哈哈)


營地比我想像中簡陋,營外只有枱兩張枱幾張櫈,營內就得兩張吹氣床墊同埋兩張單人床褥,床舖要外收費$50一套枕頭連被,加埋部分體式冷氣,就係得咁多!




個南非營幾安全,有兩重拉鏈開關,營裡四面都有手捲窗簾連蚊網,我哋呢日嚟雖然落雨但都唔算話太多蚊




我哋等吓等...等吓等,終於雨過天晴,毛毛雨都開始變細,大家換定泳衣準備出去玩lu





營外吊扇都幾特別,我好鍾意佢用小木塊畫上燈同風扇開關的圖案




一換好泳衣就沖去玩吓個瀡滑梯,同場營地都冇其他小朋友,所以佢哋好似包咗場咁任玩








「去Camp先嚟落雨」估唔到第一日嚟到遇着咁嘅天氣,係就係有少少失望,但係我哋一向去玩都順其自然,隨遇而安,重來唔會在小朋友面前表現失望,要教導他們任何時侯遇上咩環境都要欣然接受面對!




反而教佢哋點樣喺落雨環境之下都可以盡興,一樣可以玩得咁開心!





行番出嚟沙灘我先去Office開番個Locker鎖番鎖匙銀包,始終南非營都冇門鎖,所以最好大家都將隨身貴重物品放入Locker

(其實營地都有提供渡假屋住宿,如果覺得南非營太過Wild都可以住番渡假屋)


見到一群牛喺度散步好得意!




其他渡假屋住客都落咗嚟沙灘玩,主要都係摸蜆!嘻嘻,不過我就唔主張破壞生態









哥哥妹妹都係搵吓貝殻,見到其他生物同蜆,我就叫佢哋好好觀察然後放番落沙灘


哥哥見到寄居蟹超興奮,一路叫住好想帶番屋企!




玩玩吓個天慢慢放晴見到藍天!玩咗個幾鐘都差唔多日落,我哋開始去附近搵嘢食啦

其實營地有提供BBQ,包括炭、爐及一客燒烤包,不過$200一位我覺得太貴了!我見隔離營都有幫襯,基本上都好夠食!不過我就選擇喺長沙嘅餐廳食


長沙有幾家餐廳,都係以西式或Fusion為主!最近營地的這家叫"The Beach House"




呢間叫"Long Island",幾家餐廳都喺隔離,可以一次過睇哂想食邊間!



再隔離有個雜貨店,如果入唔夠貨嚟玩,可以喺度補給㗎!一般零食汽水甚至游水滑浪用品樣樣都有!






如果同一班大朋友嚟都可以去再隔離呢兩個bar,呢家好有中國古典味道!





過咗呢條小橋有另一間叫"Stoep"






再行前就有個原住民開的士多仔,一個老婆婆睇檔,不過佢六點幾就會閂!所以有咩買要早少少啦



最後我哋揀番第一間"The Beach House",玩完水一於食番餐豐富晚餐同埋食浪漫情調



我哋就坐喺沙灘邊的梳化位,吹住海風食嘢真係好舒服




我哋Order咗...

$338 Mixed Grill Platter

$158 Eggplant and Spinach Lasagna
$68 Little Fish and Chips
$188 Seafood Linguine

不設加一Total $752,如果我BBQ的話就4x$200(我當哥哥芊芊計一個)=$800


不過見人見致,因為在營地BBQ又有另一種感受





不過呢餐實在超好食!所有食材質素超班,意粉彈牙爽口,海鮮鮮甜又大隻




呢碟Fish and Chips話係兒童Size,但係都好大碟同埋超好食




呢碟雜錦燒烤併盤,好好好味X100!最好食係燒豬肉,Juicy又香肉質爽!




因為都想叫D蔬菜俾小朋友食,所以呢碟芝士茄子菠菜係我推介,好有特色仲好好味!




大家睇到每一碟個比例嗎,真係好大碟㗎!所以食嘢唔怕貴,最怕又貴又難食,呢一餐真係食得超開心!大家有機會嚟都可以參考吓我叫的餐









食完之後我哋喺沙灘散步,行行吓以為有舊大石頭,爭D我就想坐喺上面,突然發現原來係隻牛,嚇死!



入番房大約9點鐘,本來小朋友都要瞓㗎啦,不過今日咁開心就俾佢哋放肆一下,我哋一齊玩咗陣UNO,食月餅同士多啤梨,跟住差唔多11點就覺覺豬lu




當然叫佢哋瞓覺仲難過,張吹氣床墊咁好玩,點捨得瞓呀!唉~




第二朝自然醒真係好爽噢~而且仲...陽光普照,好嘢!!!可以同陽光玩遊戲啦
(註:留意最後「呀劍評語」講述瞓覺唔好的經歷)


直行穿過瀡滑梯就係洗手間同浴室位置


感覺有少少好似番咗鄉下咁!喺大自然刷牙洗面真係好Wild




兩格浴室兩格厠所供四個營嘅朋友用




唔算太污糟,不過就細咗D,用得唔太方便

仲有垃圾筒冇人更換,直至到下一日入營前先會有職員清潔,所以有D污糟!




兩個人換好泳衣準備去海灘玩前,又喺營內張吹氣墊玩捉!






不過玩之前要解決食早餐嘅問題,因為Office隔離間餐廳仲未開門,所以食咗少少麵包就去玩





原本10點應該開門,但係之後知道老闆娘佢今朝去咗買餸所以遲咗少少





全部小食價錢偏貴,一碗餐蛋麵都成$45蚊!其他餐廳又未開,又唔想走番出去東涌食再入番嚟,唯有谷住俾佢賺啦!(其實Office都有杯麵汽水啤酒供應) 



個餐蛋麵唔係太掂有D求其,所以大家記住入定貨先入嚟Camp



小食店內仲有其他嘢賣!






我番去Office借咗兩塊Body Board俾佢哋玩(無須另收費,營租已包)



唔同季節包唔同設施,大家訂營前最好先問清楚!






兩個都係第一次接觸Body Board,哥哥起初一路話唔敢行好出,只係在岸邊玩,但唔夠大浪!




但直至我掉佢出去深D試過一次之後,佢就上咗癮咁玩唔停











相反,芊芊就...



都係玩番沙算啦你








睇相真係以為呢度係芭提雅(係咪誇張咗!)

成個沙灘都冇咩人,玩得特別暢快!




玩完Boby Board我再去Office借獨木舟Kayak!

記住所有設施都係冇教練陪住㗎,玩緊嗰陣自己一定要特別小心!出海前影番張有型相先



小朋友坐上獨木舟一前一後,然後我拉住出海!


乘風破浪幾有型!


唔夠5秒又俾個浪沖番上岸


等呀劍爸出馬啦!未出醜前影張相先


出發啦!!!!




雖然尋日烏雲密佈咩都玩唔到,今日出番太陽仲可以玩到咁多水上活動,真係Thanks GOD










媽咪喺沙灘上面寫咗今次Camping個名同日期做紀念!




因為天氣實在太曬,所以玩咗一朝早都曬到燶哂!我哋差唔多12點Checkout,就番去營地執嘢沖涼,但係我記得呢度仲有個超大嘅彈床可以跳,所以我哋穿過營地向Zone B進發跳彈床







到咗啦!見到巨型彈床啦,等佢哋放埋最後剩餘嘅電先!












今次真係玩夠啦!番去沖涼執嘢離開啦 (留意右下角媽咪用沙堆咗隻蛙蛙送俾芊芊,似嗎?)


要同南非營講拜拜啦,雖然營地設施簡單,但係卻係一個好好嘅體驗!


等緊媽咪執嘢嘅時侯我哋意猶未盡繼續周圍影靚相




等佢哋大個D一於再嚟過,到時玩呢條「蕉」!



拜拜長沙,I'll be BACK!!



Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 9分


呀劍評語: 起初見到個南非營咁簡陋係有少少失望,不過原來簡簡單單反而令我哋冇咁多嘢要預備,多咗時間相處!最開心興奮就係第朝早上嘅天氣咁好同埋可以玩到咁多水上活動。
唯一扣分係夜晚瞓覺真係唔太舒服,瞓吹氣床墊好唔舒服,同埋咁啱隔離班後生仔營友太嘈,到夜晚12點仲唱生日歌~始終南非營冇隔音設備,所以如果撞啱遇着班唔好嘅營友,咁就唔好彩啦!

浪高長岸 簡介

我們的宗旨是為賓客提供一個只有於海外才可體驗到的優閒臨海度假享受,以及為一眾水上活動及大自然愛好者提供不同形形式式的水上活動。


地點
香港大嶼山長沙下村29號

開放時間

星期一至五:上午十時至日落
星期六、日及公眾假期:上午九時半至日落

費用

四人南非營 (連代用卷) : 
HK$1,380 (6-8月, 星期日至四) 
HK$1,899 (6-8月, 星期五/六/假期) 

六人南非營 (連代用卷) : 
HK$2,000 (6-8月, 星期日至四) 
HK$2,730 (6-8月, 星期五/六/日/假期) 

八人南非營 (連代用卷) : 
HK$2,350 (6-8月, 星期日至四) 
HK$3,063 (6-8月, 星期五/六/日/假期) 

二人房間 (連代用卷) : 
HK$650 (6-8月, 星期日至四) 
HK$830 (6-8月, 星期五/六/日/假期)

其他月份收費 http://lcs.hk/chipage/pricing/voucher.html
* 入營時間: 5PM / 退營時間: 12PM 
* 如需租用睡袋 / 被鋪需額外付費及提前申請

交通

可乘坐11號巴士於長沙下村站落車,其他途徑請參考官方網頁

一般查詢、私人派對、預約課程、廣告及合作事宜
+852 8104 6222 (星期一至五 上午十時至下午六時) 

查詢有關風浪情況

+852 2980 3222 (上午十時至下午五時)

網頁

longcoast.hk

(以上資料更新至文章當日)




沒有留言:

發佈留言

Related Posts Plugin for WordPress, Blogger...