2016年8月11日星期四

【親子好去處】澳門 童夢天地 Kids City @新濠天地 CITY OF DREAMS MACAU

今次嚟到澳門住喺威尼斯人酒店,就梗係順便行過對面新濠天地嘅童夢天地玩餐飽啦!

行過對面只係一條馬路之隔,5分鐘都唔駛就到!


不過入到嚟問吓職員童夢天地點去,先知原來九曲十三彎!



首先入咗門口就轉右,穿過長長嘅化妝品專櫃,沿住紅地氊一直行(唔好轉左去咗娛樂場呀)



一直行到盡頭就會見到呢條長長嘅扶手電梯



然後見到Food Court美食廣場就行入去



中途俾呢個好得意嘅裝置吸引停留咗一陣



再經過一些商店,見到有好多英雄造型,又同佢哋影番張相先!



穿過哂之後就會見到娛樂場呢個巨大嘅燈飾裝置



然後就會見到升降機,直上3/F就係童夢天地啦!



就連呢架升降機都好有特色!



門一打開就見到童夢天地Kids City啦!





當我行去櫃枱準備入去玩之際,職員居然話小朋友褲腳要蓋過腳眼先得,無錯,係「腳眼」!



職員堅持唔俾我哋入場,再三強調一定要小朋友條褲蓋過腳眼先可以!

第一,如果未嚟過的朋友,而又沒有事先上網看過守則,Walkin到嚟又點會知道!(可能澳門公民知啦,但係我Hongkongee一定唔知囉)

第二,牆上告示都係話長褲,冇標明要蓋過腳眼!芊芊條褲已經係長褲,腳眼亦有長襪包住,點解一定要咁死板

(老實講我唔知呢個情況係咪正常,定係我太唔小心!如果係請話我知...)

最後都冇辦法,只要好激氣x10咁離開,然後行番去酒店換番條長蓋腳眼的褲再嚟!(你知旅行時間幾寶貴,咁就嘥咗大半個鐘,本來嬲嬲唔想嚟,但係臨時又諗唔到去邊...)



入場前未需要俾錢,職員會每人俾條手帶,玩完離開時侯先會一次過計數!(因為入場後有其他付費遊戲)

在門口附近有個架可供大家放行李或BB車,亦有遮架提供!(當然貴重物品自己跟身)



呢個換鞋區好得意,全部都係蜜峰巢格格,小朋友可以將鞋放入去!今日唔係假期所以比較少人






一入到場兩個小朋友已經俾呢個場地吸引住!捐嚟捐去又跳入波波池超級興奮







另一邊有個小賣部,價錢尚算合理!當小朋友玩到攰玩到肚餓就可以過嚟充充電!





小賣部隔離有個創藝坊,不時有各樣唔同嘅小手作或繪畫班舉行



然後到呢個跳彈床區(蹦蹦跳),不過呢個區唔俾大人入去,只有兩部電視在門外俾家長睇住,如果太多小朋友(特別係好瘋狂嗰D)入去玩的話,都幾危險㗎!



佢哋兩個好似包場咁入去跳餐飽!



蹦蹦跳區外又有張小枱俾較細嘅小朋友喺度玩吓煮飯仔!



戶外有這個「反斗扭計骰」的區域,不過今日封咗嚴禁出去(佢哋兩個都未夠大玩所以冇所謂)



開始進入機動遊戲區,即係「打機」啦!先有呢個暗黑密室,應該係有好多Tasks要跟住做先可以過關之類的遊戲,我太懶唔想研究,所以就直接去咗最高最高的大型迷宮瀡滑梯玩







大迷宮有兩個部分,一邊係俾5歲以下小朋友玩,非常安全!另一邊就俾5歲以上小朋友玩,相對危險性都高D





呢個哥哥藝高人膽大,一嚟居然去咗玩呢條奪命滑梯,點解叫「奪命」因為真係好斜x10㗎!

你睇吓連頭盔都要戴就知道有幾危險!連我自己都驚






呢個角度係唔會睇到有幾恐怖...自己睇片啦!






玩完個咁激嘅瀡滑梯之後,再嚟玩呢款氹氹轉嘅滑梯!














呢個場有好多唔同款式嘅瀡滑梯,就咁睇落去覺得冇乜嘢,其實玩起上嚟都有少少驚驚哋







之後就嚟試吓玩射波波!呢度同其他射波場有少少唔同,場中間會有部吸波機,等小朋友執番D波掉入去,然後部機係縛住條吸管,再將波送番上去發射區度!

嘩真係偉大嘅發明呀,唔駛下下幫小朋友執波執餐死!


















呢個角度可以睇到頭先一開始講嗰條長命斜滑梯...係咪好死恐怖呢?




仲記得頭先入場戴喺手上嘅手帶呢?其實手帶上面嘅晶片可以用嚟玩場內嘅機動遊戲!入場費已經包咗2次




我哋玩吓呢樣玩吓嗰樣,好快就用完2次,但係跟住我再"DO"又得喎,於是唔理咁多再繼續玩!

原來...

繼續再"DO"係計緊錢㗎,好在我好快就醒覺過嚟!唔怪之得唔係入場收錢而係走嗰陣先埋單










仲有扭氣球魔術表演睇,真係攪到小朋友忙到玩唔哂!




最後我最估唔到就係佢哋兩個居然對呢間「大變身」房有興趣,兩個見到好多衫咩都試上身,唔同真係旅行心情唔同D



妹妹「等我化番個靚妝先」



我最鍾意呢個三眼仔+小飛俠造型!哈哈哈笑死我



估唔到有Elsa同Anna扮,開心死呀妹!




兩個都扮到自己最鍾意嘅角色啦,繼續笑死我...仲扮埋兔仔同臭鼬鼠....














之後又番出去繼續玩,雖然大家2次Quota都用完,但係見佢哋咁想玩,就滿足佢哋一次啦!

不過話時話呢架車都幾抵玩,一次都可以玩成差唔多5-10分鐘




最後臨走前仲玩咗呢部機,好得意㗎!將D波波直接掉落個mon度玩










Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

童夢天地 簡介
佔地17,000平方尺的「童夢天地」,讓小朋友同時享受室內及室外的玩樂體驗,於充滿自然光照射的空間暢遊暢玩! 

4個主題區星夢、電玩、創意、探索分設刺激又益智的新奇玩意,激發孩童無窮想像、啟迪創意、幫助小朋友發展溝通技巧及協調能力,玩樂同時啟發無限潛能! 

「衝天迴旋」巨型滑梯設計充滿未來感,體驗刺激快感;「蹦蹦跳」跳彈區為活躍好動者帶來無限歡樂;室外遊樂區設大型攀爬設施「反鬥扭計骰」,在陽光下大顯身手;小小藝術家亦可在「創藝坊」參加DIY創意工作坊,一展才華創思。 

「超電玩」設有多款最新遊戲機,電玩一族絕對不能錯過!「大變身」讓您搖身一變成為英雄人物或童話公主,再踏上「夢劇院」的舞台大展所長,實現夢想。於週末及指定假日,現場更設精彩的小丑表演、話劇,小朋友更可參與益智小遊戲。

 此外,「童夢天地」更擁有全澳最多的扭蛋機,帶來層出不窮、得意好玩的驚喜。 為派對專設的「童夢間」,為小朋友締造最開心難忘的生日會回憶,我們專業的派對大使將全面配合客人需要,協辦各種主題慶祝活動。

地點
新濠天地三樓

開放時間

上午10時至晚上8時

入場收費(澳門幣) *一歲或以下免入場費

星期一至五  
$120小童+成人(2小時) / $50另加成人(2小時) / $30小童(加時30分鐘) $15成人(加時30分鐘)
星期六、日/公眾假期/學校假期  
$150小童+成人(2小時) / $70另加成人(2小時) / $35小童(加時30分鐘) / $20成人(加時30分鐘)

對象

17歲或以下

入場穿著 

小朋友入場需要穿著長袖衫(蓋過手腕)、長褲(蓋過腳踝)及襪子, 家長亦需穿襪子

派對套餐費用 請參閱網頁資料


查詢電話

(853) 8868 3000

查詢電郵

kidscity@cod-macau.com

網頁

http://www.cityofdreamsmacau.com/tc/entertainment/detail/kids-city

備註:基於安全理由,5歲以下小朋友需由家長或監護人陪同方可享用場內設施


(以上資料更新至文章當日)




沒有留言:

發佈留言

Related Posts Plugin for WordPress, Blogger...