2016年8月8日星期一

【親子好去處】石硤尾 樹睦人和 Fantastic Forests @JCCAC 賽馬會創意藝術中心

可能暑假期間大家都覺得要去喪玩一下,但係我發現咗喺JCCAC都有一個好啱一家大細去嘅節目,一定要推介俾大家


早在港鐵站睇到宣傳海報,當初覺得一D都唔吸引亦冇諗過要去,但係見近近哋又咁啱今日冇咩做,所以就行咗過嚟睇吓!




但係睇過呢個樹木生態展覽之後,覺得好值得推介俾大家!



因為都有幾多唔同嘅節目,所以先行入去L1藝廊,跟番時間表登記自己想參加嘅項目




我哋先到藝廊外的中央庭園玩「自然拼圖」同埋「樹木樂園」,然後再參加工作坊「樹輪中的藝術」


兩個一入到去就除咗對鞋跑入去玩,但係都要聽在場姐姐講解一下


場內放置了許多唔同樹林會搵到嘅嘢,例如樹枝,樹皮,松果及其他小果實



小朋友可以發揮自己創意同樹木玩遊戲,砌出自己鍾意嘅圖案

兩兄妹商量緊砌D咩好!


哥哥開始好專心咁諗吓砌咩造型好!其實簡簡單單嘅材料已經好足夠俾小朋友玩


芊芊好似去街巿買餸咁,不停出去拎唔同材料,大家要記住臨走前要將所有材料分類安放在籃子裡


你睇佢哋拎到成枱面都係,一陣都唔知點執喇!hahaa....


最特別係呢一籃,因為佢係全場唯一一籃唔係樹木上搵到嘅嘢,大家估吓係乜?


原來係箭豬身上嘅箭毛!LOL

玩完之後就再番去登記處拎下一個節目嘅飛!(節目開始前5分鐘開始派飛)

呢個「樹木樂園」總共分為幾個部分,有中間小小的障礙遊樂設施,有樹木造型的棋子玩過三關,另一邊又有D非洲樂器,同埋有D用樹枝叠成的小樹屋小帳幕俾大家影相


當入場大家都集中去玩中間的遊樂設施,我哋就先去玩吓過三關同埋非洲樂器先


 
只係呢個過三關都已經玩咗好耐,棋子造得好靚,真係想自己都有一套!


跟住又過嚟呢邊玩吓樂器先,天然嘅音樂聲音真係特別好聽



兩個亂打一通,但係好動聽!哈哈~




最後我哋先玩呢個障礙賽,先捐山窿!個樹窿設計得好好,專登中間開個窗俾爸B媽Mi可以同小朋友影相




第二個障礙係"Z"型的獨木橋,芊芊平衡力都幾好喎!


不過都有失手嘅時侯,估唔到呢個哥哥又幾有風度喎...今日


最後要過埋呢條鐵索橋,咁就完成哂啦!大家都可以在半個鐘內無限loop咁任玩



臨走前同埋兩個景點影張相先,佢哋成日自己有哂Pose有哂造型,真係超攪笑!



玩完兩個遊戲之後,我哋行番入去藝廊,先同呢個咁有特色嘅場景影番張靚相


整個展覽造型都好細緻,一D都唔馬夫!周圍都充滿樹木,好似行咗入去個有冷氣嘅森林咁!



大家如果嚟到呢度,實在要重新認識一下樹木對我哋嘅重要性


展覽由春天講到冬天,樹木的變化及整個生態系統,每一個環節都會題到,可以俾大家好快好簡單咁去認識



雖然唔可以成個森林搬過嚟,要依賴樹木生存的昆蟲亦不只於此,但係都悉心的將幾隻香港旱有的竹節蟲(似枯葉樹枝般的)帶嚟俾大家睇




兩個哥哥好好人,知道我唔夠光影,所以俾D光我等我影得好D



穿山甲都係...放心,係假嘅!



有冇諗過樹林裡有咁多唔同種類嘅小果實



呢個展覽係由嘉道理農場主辦,所以這個樹輪工作坊都似曾相識,如果大家有去過綠匯學苑相信唔會感到陌生



兩個好專心咁聽姐姐點樣做


佢哋拎起畫筆,揀自己鍾意嘅顏色喺樹輪上油上唔同嘅Pattern



兩個一油咗少少就要叫對方「你睇吓我!」欣賞自己的作品



哎吔,哥哥你油乜嘢呀!落得太多水啦起哂泡



芊芊有媽咪幫手之下油得幾好!




油完之後將紙張印落去木頭上再掃一掃




樹輪拓印作品完成啦!職員姐姐話好似個Pizza,哈哈哈~



同自己嘅作品影番張相先!



之後仲可以用英文字印章印落去




然後每人再揀一支小樹枝,喺射燈之下跟住樹枝個影畫番出嚟!





雖然一個小小的工作坊好似好普通咁,但係藉住唔同方法都可以俾小朋友簡接觀察更多樹木樹枝的形態


樹木帶俾人類嘅嘢實在太多,但係相反人類覺得樹林阻住哂嘅時侯就要砍伐


希望大家有冇嚟呢個展覽都好,都要一齊努力去愛惜樹林(其實身邊有好多人繼續樹木的保育工作)



一路行到尾會見到有個出口,沿住扶手樓梯一直落到L0層



L0藝廊展覽出秋冬之下的樹木



樓梯對住的就係「樂」葉空間,這裡係一個模彷大自然的空間



呢個活動指引,實在好有意思!希望大家用五官去感受樹木的一切,最後更讓小朋友可以在牆上任意畫出代表他們的樹葉


好多好多顏色筆預備咗喺度!



哥哥第一個一支箭咁跑咗入去畫,對於小朋友嚟講未必認識很多或明白這個展覽的背後意義



但係藉住每一個環節,佢哋慢慢已經感受到樹木可以帶俾佢哋快樂、純淨、簡單的生活



呢度嘅一葉一草,就算放在一梱梱禾乾草上的松果及楓葉都係百分百「堅」嘢,唔係假貨嘅擺設




芊芊當然要畫埋一分啦



唔好誤會,呢D唔係佢哋畫嘅,哈哈!




唔好忽略咗頭頂上的樹枝裝置,設計得好有心思!



如果一有機會及時間我都鼓勵大家多D帶自己小朋友去感受大自然,不過未有呢個機會前嚟呢度都係不錯選擇



秋天及冬天的生態系統究竟又係點呢?其實樹本身自己一直都可以供給自己養分,神的創造實在好奇妙!這就是生命....(突然感觸起上嚟)





這裡有一個小空間係用作音樂表演同埋故事分享,但係因為唔同日子都有唔同安排,所以今日嚟到但撞唔啱,相信應該係一些民謠好輕鬆好大自然氣息的音樂


最尾有一個閱讀區,雖然參與唔到故事分享時間,但係都可以自己嚟呢個閱讀區自己睇些關於樹木嘅圖書,場地都佈置得好自然好簡單,十分舒服!



書並唔多,簡單幾個坐墊,舒舒服服的坐喺度同小朋友一齊睇睇圖書,真的不錯!




攪攪震的芊芊睇兩睇就變身做Model



最後過嚟呢邊有個承諾品,希望小朋友可以對樹木大自然許下一個承諾,有 1)自備手巾;2)自備餐具;3)不吃肉只吃菜;4)每天觀察樹木的變化

哥哥同妹妹都係揀咗自備餐具,然後填上名同埋email,半年後會send Email給大家review一下做唔做到!

 
跟住再印上手指毛就完成,佢哋一定做到,因為我哋幫佢預備餐具嘛!>.<



如果走之前幫手填一填問卷,就會送D明信片或者咭紙花卉勞作番屋企玩!




臨走前見到個懷舊磅重機,兩個以為係地鐵買飛....(哥哥今日呢個Look都幾襯部機喎!)



Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 9分


呀劍評語: 可以在城巿中探索樹木的奇妙變化,來一個親子環保教育之旅真係很不錯,而且節目都好豐富由玩樂到工作坊,再到音樂表演故事分享,真係一個無得頂嘅好去處!

樹睦人和 Fantastic Forests 簡介

今次於「樹睦人和」生態及文化展覽內,我們將探索大自然與人類及樹木之間千絲萬縷的關係。樹木透過獨有的方式,無間斷地支持人類的社會發展、古代以至現代文明、創造了無數傳說及神話,並以數之不盡的實際形式支撐人類的生活,以至地球上數以百萬種動物亦賴以生存。本展覽冀能幫助大眾重新連結人類與樹木的原始關係,繼而珍惜及欣賞樹木的可貴及可愛之處。


地點
L0, L1 藝廊 / 中央庭園

展覽日期

2 - 21/8/2016 

時間
10:00 - 17:00

費用
全免 (如團體申請導賞團,請預先登記)

電話
5239 1502

網頁

www.kfbg.org

(以上資料更新至文章當日)




沒有留言:

發佈留言

Related Posts Plugin for WordPress, Blogger...