2016年7月22日星期五

【親子好去處】澳門 SHREK THE MUSICAL 史瑞克音樂劇 @澳門威尼斯人

今次實在很榮幸受到澳門威尼斯人的邀請,嚟到澳門欣賞史瑞克音樂劇,即係史力加真人版



今日等佢哋放學之後我哋食過晏晝,就嚟到中港城準備上船!



哥哥心情好興奮對住條柱扮鬼扮馬


因為我哋都比較少去旅行,所以佢哋知道有得住酒店就好開心




好啦!走啦...香港拜拜~(其實只係去澳門,攪到好大件事咁!)
 

見到個大海已經咁開心咁興奮!真心希望你哋以後都可以咁容易滿足充滿純真






差唔多1個鐘嘅船程,去到澳門碼頭再轉接駁巴士去到酒店!


小貼士:澳門碼頭WIFI Login:wifigo (login name and password are the same)


Check-in上到房打開度門,真係好大呀!係一間家庭房,兩個第一時間就係爬碌架床(其實屋企都有囉)






廁所仲大,直程瞓喺裡面都肯呀!



 

好可愛呀有大有細鴨仔放喺度,平時喺屋企都冇得浸浴缸,今晚俾佢哋兩個放肆一下,可以浸番個泡泡浴同鴨仔玩遊戲啦


超可愛的毛巾造型,係隻大笨象呀,仲有隻汪汪狗,我哋都唔捨得拆開佢,所以由得佢放喺度冇用到






芊芊最鍾意張大床,一路瞓喺度唔肯走,同埋當然最鍾意係...跳床!




另外一邊仲有張小枱仔預備咗畫紙顏色筆,哥哥即刻埋位畫畫油顏色!




以前哥哥一D都唔鍾意油顏色,唔知幾時開始唔再覺得填色麻煩




嗱嗱嗱....我都話佢會跳床㗎啦!




有幅咁靚嘅壁畫喺度,唔同呢間房有個主題係「海洋世界」?


呢邊都有部電視,真係一對眼都睇唔哂!




最開心梗係呢兩隻嘢,瘋狂碌地沙+爬嚟爬去!





我哋住18樓,個景向內園哥爾夫球場都幾舒服幾靚!




打開衣櫃仲見到兩大兩小嘅浴衣,真係巧打耳呀,一定要俾佢哋兩個試著吓先




一切準備就緒,今晚就要去欣賞史力加歌舞劇啦!心情好興奮呀





不過都要先醫飽個肚先再出發搵史力加



本來考慮咗好幾間餐廳!但係覺得都係想食個Buffet,所以嚟咗渢竹自助餐廳食!


入去時侯六點半都未到,人影都冇隻,可以慢慢食都冇人同你爭!





估唔到芊芊喜愛頭盤食雪榚先!今日難得嚟到澳門就俾你哋兩個放肆一下啦!






哥哥亂衝亂撞自己拎住隻碟去搵嘢食


佢一拎就拎咗3件葡撻,同埋拎咗好多件同類型的壽司番嚟!哈哈哈,這是預料中事


也好,襯呢個機會同佢講吓眼闊肚窄嘅故事,教佢點樣珍惜不浪費!


如果可以的話我盡量都希望這樣教育小孩子,讓他們去做自己喜愛的事,同時也讓他們去錯再更正他們




不過其實教緊佢嘅同時,呢個呀劍爸自己都忍不住拎咗好多嘢食番位(當然我一定會食得哂啦)

















食飽飽我哋就準備去搵史力加囉




芊芊扮史力加都扮得幾似喎!





因為演出期間唔俾影相,所以唯有入場前影多幾張相!




準備開場lu...



既然相冇得影,就搵番幾張官方相俾大家睇吓









真係大製作!最令我印象深刻就係劇中嘅飛龍,好似大坑舞火龍咁有幾個人將飛龍舉起

但係佢哋控制飛龍嘅動作同埋說話咀型,真係好自然!


仲有唔少得另一個最矚目嘅角色係花瓜將軍,佢全程都係跪喺度演出,真係超勢利!仲有佢同羌餅人嗰場戲,真係好攪笑

歌舞都係好吸引嘅地方,仲有舞台所有嘅設計,場景一個接一個都整得好靚好像真!




不過劇目8點開始,到9點幾中場休息15分鐘,下半場再開始嘅時侯,芊芊已經話好攰要番房,所以媽咪陪哥哥睇埋去到10點半



其實都有T恤等紀念品買㗎!不過呢個嘢話好眼瞓所以都係快快同佢番入房,係咁咦俾佢同公仔影張相當買咗


我就同芊芊番嚟沖個靚涼先



芊芊同鴨仔玩遊戲,非常開心!沖完個涼都精神哂




之後仲玩酒店房裡面嘅遊戲機,有得玩孖寶兄弟好開心!




為食嘅爸爸仲叫咗Room Service食宵夜,等媽咪同哥哥番到嚟再食多餐!




又食過....攪咗成晚,差唔多12點先瞓!都算係佢哋最夜最夜嘅一次



最可惜係第朝要6點幾起身,因為今日撞啱有個活動要去,所以急急腳落去酒店飲個早茶就離開番碼頭了,希望下一次再有機會嚟慢慢嘆!

再一次多謝威尼斯人酒店!俾我哋一家人去咗個短線遊 Thanks


Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分


呀劍評語: 睇過史力加電影嘅我,估唔到佢居然可以變做舞台劇,因為佢裡面嘅角色仲有都咁古怪!每個角色都做得好好,尤其係花瓜將軍,由頭到尾都係跪喺度做,難度分超高!帶埋小朋友一家大細嚟睇,令佢哋可以過一個開心又難忘嘅暑假!

《史瑞克音樂劇》 簡介

著名百老匯音樂劇《史瑞克音樂劇》 (Shrek The Musical in Macau),將於今年暑假首次登陸澳門,作為其首個全球巡迴演出的其中一站。《史力加音樂劇》由榮獲普立茲獎嘅David Lindsay-Abaire 負責編劇同填詞,曾獲頒奧利弗獎(Olivier Award)嘅Jeanine Tesori負責編曲,Chris Baily負責編舞,絕對係信心保證 !

地點

威尼斯人劇場

演出日期

2016年7月22日至2016年8月7日

演出時間

星期二至星期五,晚上8:00
星期六,下午2:00及晚上8:00
星期日,下午1:00及晚上6:00

票價

VIP 區:港幣/澳門幣 $780 
A 區:港幣/澳門幣 $580 
B 區:港幣/澳門幣 $380 
C 區:港幣/澳門幣 $180

電話

澳門:+853 2882 8818 
香港:+852 6333 6660
中國大陸:4001 20 6618


電郵

service@onepiececarnival.com

網頁

enquiries@cotaiticketing.com

訂票

www.cotaiticketing.com

(以上資料更新至文章當日)




沒有留言:

發佈留言

Related Posts Plugin for WordPress, Blogger...