2016年7月30日星期六

【親子好去處】九龍城 LUDUS Club Animal Farm 生物科學體驗營

喺我身邊唔少男仔女仔,成日見到蛇蟲鼠蟻都會We嘩鬼叫,所以我培養小朋友細細就要當佢哋好朋友,唔好俾佢哋嘅外貌欺騙,其實佢哋都可以好卡嘩兒㗎!(講係咁講~)

今次Join咗LUDUS CLUB嘅Animal Farm活動的第一個時段,係認識同接觸兩棲類動物,之後兩個時段分別係哺乳類動物及爬蟲類

希望下次有機會再接受邀請參與爬蟲類時段...因為真係想試吓俾蛇爬上身嘅感覺!諗起都尖叫

今次主要接觸到亞馬遜石頭龜(African Tortoise)、真鱷龜、非洲牛蛙、美西螈(Axolotl)……



活動一開始,姐姐就用毛巾包住一樣嘢叫小朋友估吓係咩,結果第一個出場原來就係非洲牛蛙



佢個樣真係好笨蕉,扁踢踢成舊飯咁!個身型就好似一個吹脹咗嘅汽球咁,肚腩大到手腳都郁唔到



佢皮膚濕濕,呢個哥哥第一個就話要摸摸佢,如果換轉係媽咪一定唔敢~唔知如果妹妺喺度,佢咁鍾意蛙蛙又會唔會夠膽去摸摸佢呢?







一邊影佢一邊擔心佢會好大力摸蛙蛙,再摸兩摸你睇隻蛙蛙都要跳走啦!





非洲牛蛙走咗後就到另外一隻動物出場啦!亞馬遜石頭龜

佢真係好似一舊大石頭!我哋就梗係冇得抱佢啦,不過有得摸吓佢掂吓佢,同埋餵佢食嘢!












跟住要介紹嘅呢隻龜好唔簡單,聽講係早過恐龍時代已在早就存在喺呢個世界上面,佢叫「真鱷龜」



實在太神奇啦,原來佢條脷上面有條紅色嘅肉,知唔知用嚟做咩?

原來佢平時在水底捕足獵物嘅時侯,就係掹大個口唔駛郁


等D魚仔以為嗰條紅色肉仔係蟲,就游過去以為有嘢食,結果就梗係真鱷龜即刻咬落去


所以如果你唔小心擺隻手指過去,佢一口就可以咬斷......


但係我有個疑問,隻龜點知自己條脷有呢塊紅色肉仔呢?




跟住出場嘅係「美西螈」,聽完個名都唔係好想像到個樣係點?

我都唔識形容,佢就好似一隻蜥蜴,又似巨型蝌蚪,最奇怪係有唔同顏色,一隻金黃,一隻黑,仲有隻粉粉紅紅咁!



哥哥伸手抱抱佢,但真係唔知係咩感覺!佢話滑滑潺潺似條魚囉



最後壓軸出場係「盾臂龜」,但係我哋就真係見慣不怪,所以對哥哥冇咩吸引力



大家最後離開張櫈圍圈坐地下近距離接觸「盾臂龜」







大家都有機會餵紅蘿蔔俾佢食!唔知佢會唔會食得太飽呢?希望下次再有機會嚟可以見到蛇同大蜥蜴啦!



Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 9分


呀劍評語: 可以自小認識及接觸唔同嘅小動物,學習接納可愛與不可愛,放膽嘗試新事物,增強自信心不膽怯!扣一分因為呢一節見唔到我哋期望的蛇同蜥蜴!>.<

LUDUS Club Animal Farm 生物科學體驗營 簡介

暑假期間舉辦別開生面的有趣暑期活動「Animal Farm生物科學體驗營」,由爬蟲類專家、自然保育人士、星級動物導賞員Mr. Goatee Toni主理,帶領兒童經歷精彩難忘的珍禽異獸之旅,小朋友可親手接觸珍禽異獸,包括手抱動物、進行餵食、互動、護理等實踐,在專業人士指導下安全進行。

地點
九龍城沙浦道46號豪門2樓

活動日期

2016年7月30日

時間

1:00pm-2:00pm

費用:

HK$700 (1位小童及1位成人,額外1位成人加HK$100)

電話

2382 0061

電郵

info@ludusclub.com

網頁

www.ludusclub.com

(以上資料更新至文章當日)




沒有留言:

發佈留言

Related Posts Plugin for WordPress, Blogger...