2016年6月5日星期日

【親子好去處】九龍城 石屋家園 Stone Houses

去完九龍寨城公園玩, 一定要過埋嚟「石屋家園」參觀吓同去個Cafe嘆個下午茶啦!






喺賈炳達道公園東頭村道出口過對面馬路


見到侯王古廟轉左過馬路便到!



好低調吓既石碑! 就咁睇都唔知係一個文物探知館!



穿過鐵閘右手邊就係Cafe 石屋家園冰室!






地方唔算大, 周圍都放咗D九龍城區舊時既黑白圖片! 記錄咗當時既情景



呢度都有洗手間, 裡面都尚算乾淨! 不過今日嚟好多蚊



原來石屋家園都有好多活動俾長者及青少年參加!


行到過嚟呢邊有個小迷宮(平面), 個名叫做「明陣迷宮」,兩個天真的小朋友已經跟住條路跑嚟跑去!

因為哥哥行得好快, 同埋條路係單向路, 芊芊點快都過唔到佢頭, 所以唔開心! 笑死我





搵到個靚景! 等我又同佢哋影番張相先, 我會將佢哋既合照放滿成間屋, 讓他們知道他們將來的人生都要有對方




上到去磚屋上層沒啥特別, 只係一個露天平台!





落番去之後先去探知中心參觀, 中心同冰室係互通的, 可以參觀完就坐低嘆茶



就連入口呢扇門都模彷以前的古舊木門, 用門柵開關(可能你都唔知咩叫門柵吧!)







這裡有個小房間模彷古老廚房灶頭俾人影吓相!



下橧主要介紹九龍城的中式建築, 行到上去上層繼續參觀




上層仍舊介紹九龍城的古與今! 以及被活化後的這棟石屋家園




都係一般政府的設計, 有些展板有些短片咁啦! (可能又係冇咩budget)




其實呢類電話同信箱都仲有人用緊, 但係呢度已經當咗係古物! 究竟有冇其他嘢可以更代表到九龍城呢?



我覺得香港所有舊區都係呢種裝修, 感覺同「美荷樓」冇咩分別!



呢邊放咗盒波子棋, 七巧板同埋康樂棋俾人玩, 好在佢盒波子棋唔係新式膠盒嗰隻, 如果唔係真係一D懷舊味道都冇



上層空間唔大, 另一邊已經有樓梯可以行番落去冰室!



冰室設計簡單, 陳列好多懷舊物品! 枱櫈都放得有點密, 所以久缺空間感, 若不是坐梳化位置, 都會有D逼同唔舒服!



如果以前細個儲低D餅罐我都可以拎出嚟做博物館!



除咗「奇蹟」隔離兩齣都唔知乜嘢! 我諗我都未出世





呢款鐵單車我細個都有踩過, 真係不出一個星期就會生锈!! 哈哈



相信過多廿年, 再有博物館既時侯, 陳列出的碟子應該係Hello Kitty同Melody....



以前呢款電風扇真係好恐怖, 咁大條罅隻手指一攞埋去都冇咗....

  
  



今日星期日人都算幾多, 不過如果唔怕熱都可以坐露天位!













我叫咗個全日早餐同橙汁凍朱古力!



價錢唔算貴, 但係見到食物質素就即刻覺得唔算平....



杯凍朱古力好飲! 夠味, 超濃! 哥哥妹妹爭住飲



橙汁就真係唔掂, 如果講懷舊分佢真係滿分, 因為佢十足十以前我哋細個用粉開個款橙汁, 如果佢係專登模彷番當年嗰種味道, 咁唔該你價錢都模彷埋!!!!





同枱的姐姐叫咗兩杯咖啡, 佢哋好好人俾我影番張相, 個兔仔同熊仔拉花真係好靚, 唔知飲落味道如何(So far見佢哋飲完冇話難飲又冇話好好飲)



之後兩個小朋友行番上去展覽館通往冰室條樓梯度玩包剪揼! 就係咁已經玩咗成半個鐘, 小朋友真的很簡單, 好多時只係父母想太多俾得太多!


最後由冰室正門離開, 完成我哋九龍城一日遊既行程!!






Photo by CANON 5D Mark III, Len | EF 24-70mm f2.8L USM

呀劍評分: 8分


呀劍評語: 食物講唔上好好食, 不過環境搭救, 幾舒服幾清靜! 探知館內容亦不算多, 地方不夠大! 不過搵一日來逛逛之後又可以去九龍寨城公園夜晚又可以到九龍城食飯, 都係不錯既選擇

石屋家園 簡介
屋家園現址見證著上世紀四、五十年代寮屋區的建築特色,其居住模式更反映二次大戰後香港基層居民的生活狀況。石屋的建築沿用傳統中式建築特色,內部以本建築結構為主,如屋樑及一樓層板俱用木製,外牆以石塊及磚塊砌成,屋頂則為金字型上蓋。配以中式筒瓦和板瓦,以及大門的木鎖及石插孔等,均為當時的建築特色。

地址
九龍 聯合道133號石屋家園

交通

港鐵: 樂富港鐵站B出口 
巴士: 1, 10, 11D, 11K, 75X, 7B, 85, 85A, 85B, 113,891 
小巴: 13, 39M, 66S

文物探知中心

週二至六 10:00-17:30; 週日12:00-17:30 ; 逢週一休館

石屋家園導賞服務 (導賞服務須預先報 名登記,上限為25人。)

週二至六 10:30 及 14:30; 週日 下午 2:30 

費用: 全免


------------------------------------------------------------------------------


石屋咖啡冰室


營業時間 
星期二至日: 08:00–18:00 星期一休息 

電話

2325 0131

付款方式

現金

------------------------------------------------------------------------------


桌遊服務


開放時間 

星期五、六: 晚上6:00-10:00

------------------------------------------------------------------------------

明陣花園

開放時間 


每日上午6:30-晚上10:00


(以上資料更新至文章當日)




沒有留言:

發佈留言

Related Posts Plugin for WordPress, Blogger...