2016年6月6日星期一

【親子飲食】尖沙咀 有蒸氣海鮮石鍋專門店 Seafood Hotpot Restaurant

今晚同朋友嚟到尖沙咀呢間「有蒸氣」試試! 雖然未食過九層塔, 但係都覺得超級唔錯

人哋話九層塔由上食到落下, 蒸出嚟既海鮮汁會逐層逐層滴落底, 令個粥會好好味

但係同時因為最底嗰層都一路蒸住, 令到海鮮肉質過熟老哂! 

而呢度就逐樣逐樣蒸, 雖然時間會長咗, 但係至起碼每樣都好鮮好好味!



其實門口俾我感覺好似桑拿浴室! 可能加番D魚蝦蟹公仔喺度會好D


我哋幫襯咗中間的海鮮餐! 好期待...


首先見到呀姐將粥材料放哂落窩底, 真係好期待最後碗粥有幾入味!


先每人嚟碗黑松露蒸水蛋! 蛋滑黑松露香, 估唔到兩者咁配合加埋一齊好好食!


先上呢個「竹串海中蝦」一隻隻蝦拗哂腰咁串咗喺度好攪笑! 放落個蒸鍋度1-2分鐘就食得


蝦肉堅鮮甜! 肉質好爽好新鮮!


本來係清蒸桶蠔, 不過無貨改咗做蒸蜆! 一樣咁鍾意

蒸蜆上場啦!(相為落鍋前) 一開蓋全部蜆殼已經揭開哂, 食落有點海水味, 不過蜆肉唔夠大, 同埋每人得2-3隻唔夠喉囉!


南非鮑魚, 上面舖上蟲草花, 大概8分鐘就攪掂! 一D都唔"un"一咬落去勁林勁juicy!


呢味蟶子就普通咗D,  粉絲同蒜蓉舖面食落香口, 不過蟶子就唔算好大隻


最後一味就係蟲草花蒸雞, 大約15分鐘, 朋友起初見到D肉紅紅地覺得唔夠熟, 但係我相信呀姐功力膽粗粗試一舊, 果真啱啱好, 蒸太耐肉會乾會un! 所以話信呀姐係冇錯!


呢碗粥絕對唔講得笑, 經過咁多味清蒸海鮮滴落嚟既精華(過程都大概兩粒鐘), 真係夠哂入味, 碗粥超好食! 又夠綿又夠味唔會過鹹, 我食咗三碗囉!


Photo by CANON 5D Mark III, Len | EF 24-70mm f/2.8L USM

呀劍評分: 9分

呀劍評語: 未食過九層塔既我, 對於全餐清蒸都覺得幾特別, 一滴油都冇! 食完之後又夠飽但唔覺得濟! 個粥簡直好味到無得頂!

地址
尖沙咀天文臺圍5-9號寶軒酒店1樓

交通
港鐵尖沙咀站 B1 出口, 步行約7分鐘

營業時間
星期一至日: 18:00-03:00

電話
2898 2731/ 2898 2751

(以上資料更新至文章當日)



沒有留言:

發佈留言

Related Posts Plugin for WordPress, Blogger...