2016年6月18日星期六

【親子好去處】九龍城 LUDUS Club Waldorf系列 Artistic Mess「污糟」藝術工作坊 (足版 Full Version)

一個全新體驗!今日參加咗LUDUS Club的Artistic Mess「污糟」藝術工作坊,真係好好玩好污糟呀!




我哋搭車去到九龍城賈炳達道公園附近落車,行過嚟5分鐘就到!LUDUS Club就位於豪門,所以離遠都已經可以見到唔難搵!


行樓梯或者搭Lift都可以,一上到嚟兩個小朋友已經除鞋跑咗入去一陣要玩嘅場地

望住呢個咁乾淨嘅場地真係諗唔到一陣間會變得幾污糟



活動仲未開始,所以我哋周圍行吓跳吓跑吓當熱身


老師安排我哋先到這個圖書閣等侯,呢度真係好多好多書,小朋友見到都已經好開心

大家留意呢個圖書閣原來係開放給公眾㗎!雖然只有星期六,但係大熱天時入嚟涼吓冷氣親子一下都爽歪歪啦!


其中一個書櫃原來係校長的真藏,幾乎係我哋呢班七八十後細個睇過嘅英文兒童圖書


呢個芊芊一入嚟就跳上大沙包,真係冇佢收!


書真係多不勝數,仲有好多布偶公仔可以拎上手玩,真係夠玩一個下晝!





等媽咪同你講番個白雪公主嘅故事啦(大家睇到邊個扮演巫婆邊個扮演公主啦!哈哈~)


時間差唔多,我哋要開始大玩一番啦!


老師們都預備好一盆盆的顏料,我問過老師,這些顏料都係德國訂購到港,而且是特製的,食咗落肚都唔駛咁驚!


堯堯老師先試範一下將顏色印在牆上,讓小朋友習慣一下


各位小朋友出動啦!有D小朋友就驚污糟唔敢行埋去,不過在爸媽鼓勵之下都出去嘗試一下

其實我哋要俾小朋友多D空間,唔好成日話呢樣唔得,嗰樣唔得,令佢唔敢嘗試(當然我都在學習當中)



兩個完全唔怕污糟塗滿整幅牆!



老師逐步的開始讓小朋友的身體再塗上更多顏色


呢個妹妹開始有少少卻步了!但仍然願意試一試


然後老師要小朋友用身體在牆上碌嚟碌去,睇吓芊芊個樣幾勉強幾唔願意


但係出番嚟爬喺地下芊芊又OK喎!睇佢一面都係顏料



到下一個環節老師給小朋友一個烏蠅拍,將顏色痛快的打落地上

芊芊有工具拎上手即刻同頭先唔同哂,好盡情地任意打在地上


哥哥仲利害,將顏色撥到周圍都係,企喺佢附近嘅家長同小朋友都中哂招


芊芊小姐已經進入瘋狂狀態,準備要向我攻擊!好驚呀...



呀哥!唔好整污糟我部相機呀~


一場激戰之後,佢哋由頭到腳都已經充滿色彩,真係好靚!


又到下一個環節,今次老師俾咗一個好似絲襪袋內裝住一個豆袋,俾小朋友拎住彈下彈下印顏色落地上





再出動埋"滋滋"水壺,老師仲細細聲喺耳邊叫小朋友噴自己爸媽,今次慘啦!冇帶衫換~


雖然係咁,但係見到佢哋咁開心,做呀爸呀媽的又好願意俾小朋友噴到周身顏色




跟住我叫哥哥妹妹佢哋兩個互噴!自己逃過一劫


諗住活動都差唔多完結,原來仲有最後一個環節,就係將地上嘅大紙張捲上嚟形成一個充滿色彩的時光隧道


讓小朋友一個一個排隊捐入隧道!所有小朋友都非常開心



最後一齊污糟影番張大合照!


最溫馨嘅場面出現喇,一對仔囡幫媽咪抹腳!

(同時最可憐的畫面都出現,就係老爸幫佢哋影完相之後自己行埋一邊自己抹腳)


活動完咗我哋逗留咗一陣間,希望參觀一下LUDUS Club其他課室!

LUDUS Club本身亦係一家幼稚園,佢哋原用「華德福」+「蒙特梭利」的教育方式,取長補短的塑造出全新課程去教育孩子


同傳統教育模式當然完全不一樣!如果我細個有個咁嘅班房真係開心死我


教具也真的不少


行到過嚟呢邊一睇!噢媽呀,有個廚藝班房俾小朋友上堂!


設備齊全,唔講以為係俾大人上堂用的房間!



校長想得非常周到,裝修時已設計了這伸縮台階讓小朋友站在上面上課


唔係卦!連中醫課堂都有,老師會教小朋友「望、聞、問、切」,老師說有些小朋友見你咳兩聲會走埋嚟幫你把脈,跟住話你係「寒咳」!太利害了吧



連中醫藥房都有,咁音樂舞蹈室一定唔少得啦


裡面擺放住各式各樣的樂器!


佢哋興奮到咩都拎上手玩一餐


最後呢個科學實驗室,都佈置得好靚!



放在架上的動物構造模型真係靚到痺,好想問佢邊度有得賣!


連平時好鍾意蛙蛙嘅芊芊,一見到呢個解剖蛙蛙模型都話好核突


最後幾個小朋友喺門口附近玩多陣我哋就離開了,雖然冇機會喺度就讀幼稚園,不過LUDUS Club舉辦的活動真係好正

大家可以留意呀劍萬帥Facebook專頁,隨時會有LUDUS Club活動免費名額送出㗎!



Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分

呀劍評語: 打破家長傳統怕污糟觀念,讓小朋友無拘無束自由自在地發揮無限創意,開開心心想點就點!

LUDUS Club Artistic Mess 簡介

以不同藝術形式(Art forms)引導,利用油彩於大型畫紙上進行集體 「污糟」創作(Artistic Mess),開發情感表達的多元色彩及形態, 成就繽紛想像力及鼓勵創新思維。 這次的藝術工作坊以油彩「污糟」藝術作主導,激發孩子的小宇宙, 創造與別不同的型格和意義,沾著顏料在大畫紙上跳舞, 集體創作大型藝術畫。

地點
九龍城沙浦道46號豪門2樓

活動日期

2016年6月18日

時間

2:00pm-3:00pm

電話

2382 0061

電郵

info@ludusclub.com

網頁
www.ludusclub.com

(以上資料更新至文章當日)




沒有留言:

發佈留言

Related Posts Plugin for WordPress, Blogger...