2016年6月28日星期二

【親子好去處】中環 Harmonic Motion @ifc mall

終於等到啦!Harmonic Motion嚟到香港ifc,今天有幸被邀請率先試玩,大家快D坐定定睇到尾!


「Harmonic Motion」是國際知名的日本紡織藝術大師堀內紀子(Toshiko Horiuchi MacAdam)及丈夫Charles MacAdam的著名遊樂場作品

可惜嘅係今日未能帶到兩個小朋友出席,因為佢哋未放學!所以今次益吓街坊,帶埋呀劍萬帥粉絲嚟一齊玩

去到ifc中庭已經見到色彩繽紛嘅繩網陣!離遠睇都未係好知究竟點玩


入到場先睇吓自己合唔合資格入場先!大肚、受傷...原來頭暈都唔適合㗎,咁我係咪要走先...


顏色同圖案真係好靚,入到場先縛上手帶及將鞋袋放好!

特別注意嘅係記住要著襪,如果唔係會禁止大家進場或者要求你現場買




所有小朋友都急不及待要上去玩,但係先聽吓堀內紀子介紹一下作品先


我最欣賞佢講嘅一句「我呢件作品並不完美,需要配合埋在上面玩緊嘅小朋友先至係完美」

同埋佢話呢個設計足足用咗7個月時間才完成,而且在繩陣內的感覺就好似初生BB在媽咪肚內的盪盪吓的情景



 正式開始!大家都由繩網下的小洞進入,而我就無從入手!原來當爬上一個洞後會再發現另一個洞,直至貫穿三個網洞才會上到最頂層的繩網


睇住小朋友輕而易舉咁爬咗上去,我就眼白白喺網外影吓相!


但係我冇可能就咁交貨!所以為咗大家我點辛苦都一層一層咁捐上去



小朋友嘅眼神好似唔明點解我爬得咁辛苦>.<


論論盡盡嘅我最後都終於上到去最上層


在繩網上層間直係另外一個景像,大家都好似蟲蟲咁由個窿度捐咗上嚟地面咁


而且顏色真係好靚 x3,簡直就係影相最佳位置

每個小朋友都好努力咁向上一直爬,爬到最高嘅位置後就似瀡滑梯咁瀡落嚟玩



不過大家可以留意一下小朋友的安全,因為爬上去的時侯都幾冼,一下唔小心就會冼番落嚟撞到其他人


對小朋友嚟講絕對係一個充滿創意自由嘅玩樂設施

但係對我嚟講真係一個燒脂好方法,相都未影已經成身汗!




中間來來回回由上由落,我已經好熟悉整個網陣地形,發現某一個窿最容易上落!^.^

到繩網陣下面的吊鐘同冬甩梳化(暫稱),小朋友都一樣玩得咁開心



其實這就是童年,各位父母吹谷之餘,記住俾小朋友呼吸一下自由空氣

這個設施讓小朋友玩樂之餘,都可從中發揮自己創意自定玩法,一邊學習一邊成長!



如果俾我做呢個動作個繩網應該7月1日要關閉


好欣賞呢個作品,亦有幸能與大師合照!多謝您俾我過咗一個咁放鬆咁開心嘅下午


Photo by CANON 5D Mark III, Len | EF 24-70mm f2.8L USM

想跟我去體驗其他活動,快D報名親子團,同埋留意專頁公佈詳情啦!

呀劍評分: 10分

呀劍評語: 一個色彩繽紛的奇妙體驗,讓孩子透過玩耍互動來學習及成長,更是一個讓親子一同體驗的寶貴回憶!

Harmonic Motion 簡介

「Harmonic Motion」是國際知名的日本紡織藝術大師堀內紀子(Toshiko Horiuchi MacAdam)及其丈夫Charles MacAdam的著名遊樂場作品,旨在讓大眾從生活中重新發掘玩樂的意義和價值,感受美麗人生,展現「Life is Beautiful」的精神。這個充滿歡樂的藝術展終於在ifc商場正式亮相!

地點
ifc商場一樓中庭 Oval Atrium

日期

2016年7月1日(星期五)至9月12日(星期一)

開放時間

上午11時至晚上9時正(2016年7月1日至7日)
上午10時至晚上10時正(2016年7月8日至9月12日)每節時段為20分鐘

費用

全免

參加辦法

參加者必須經大會網站作網上預約及報名。 
http://harmonicmotion-booking.com/#!/reservation
大會每日將提供登記日起計共兩天(即明天、後天)之活動場次登記,名額先到先得,並以期後的確認電郵方為有效。

注意事項

1. 參加者必須詳閱官方網頁所列之注意事項。 
2. 任何入場人士(包括家長或監護人)均必須預約登記。11歲以下兒童必須由成人陪同下方可入場。 
3. 每次成功致電預約,可為最多兩位同行的參加者登記(連同登記人共三人)。在此以外的其他預約必須再作致電重新登記。 
4. 參加者必須脫鞋及穿著襪子才能進入手工編織遊樂場範圍,請自行準備襪子。 
5. 建議參加者穿著輕便長袖服飾及長褲。

網頁
http://summer2016.ifc.com.hk/en/

(以上資料更新至文章當日)




沒有留言:

發佈留言

Related Posts Plugin for WordPress, Blogger...