2016年6月5日星期日

【親子好去處】九龍城 賈炳達道公園+九龍寨城公園展覽館 (下)

其實九龍寨城公園裡面有個展覽館, 唔單止介紹咗好多九龍寨城既歷史, 仲有...


上回講到我哋穿過「童樂苑」見識過十二生肖石像後, 就去到展覽館側門門口


其實展覽館設有導賞團, 不過我哋沒有參與, 只想隨便逛逛!


兩個嘢一入嚟就坐咗喺張木櫈度! (嘩嗰刻我諗會唔會係古董嚟架! 一陣坐爛咗打一世工都賠唔起!) 



兩邊有展示板同模型展示寨城從前的風貌


兩個嘢當然對這些沒太大興趣, 反而鍾意坐吓呢度坐吓嗰度扮吓怪樣俾我影


之後又嚷着叫我俾架搖控車玩一陣, 我見一個人都冇就俾佢哋玩陣(不過好快就有人參觀我又收番起哈哈)


穿過屏風有幾楝磚屋,除咗左手邊的其他都係展覽館



我哋先入去二號展覽館,手掀開黑布幕入去見到很多九龍寨城舊貌的相片,跟隨住聲音導賞介紹,不同相片後的燈箱會亮起來


二號展覽館都係介紹城內舊貌-橫街窄巷,三號展覽館介紹家庭工業,而四號則介紹天台的日與夜





驟眼望過去佢哋兩個好似置身在相片中的天台



五及六號展覽館是最大的,裡面都是一些互動展示


剩係呢度佢哋兩個都玩咗成半粒鐘!真係燒時間好地方,另外最重要係這些展覽館內都有冷氣...大熱天時入嚟解吓暑係必須的!





行番出嚟見到有個小食亭!雖然叫「小」食亭,但係都真係乜都有!五臟俱全

大部份懷舊玩具小食,甚至老闆娘自己親手醃製嘅食品都有!


老闆娘超親切很有耐性的跟小朋友玩起上嚟!同大人都會有傾有講


小食亭另一邊係職員室同埋救護站!


嘩你睇吓風火輪都有!


小食亭內真係好似一個寶庫咁,要咩有咩!


老闆娘俾小朋友自己拎竹蜻蜓去玩(其實要$5一個),真係超好人!


佢哋兩個不斷起飛失敗再嘗試!




佢哋玩得開開心心之際,我同老婆梗係八卦吓小食亭有咩食買,我買咗支麥芽糖夾餅$5(老闆娘即時整㗎!),芊芊食得幾滋味!哥哥就冇興趣,只係掛住玩隻竹蜻蜓


跟住再買杯羅漢果水($10)俾佢哋飲,如果唔係真係玩到中暑!幸好今日天氣熱但係都多雲


因為佢哋兩個玩極都唔走嘅關係(因為$5一隻竹蜻蜓太貴我唔肯買俾佢哋,有得免費玩就俾佢哋玩多陣),所以同老闆娘傾傾吓計,佢再推介我哋飲杯甘筍汁,佢話係「鎮店之寶」!

嘩佢講到咁唔試吓點得呀!價值$16嘅甘筍汁有幾巴閉,老闆娘即刻拎出紅蘿蔔切開再搾汁


呢個釀米醋來頭都唔小!佢話係古法釀,完全唔同出面超巿買到嘅,佢話嗰D全部用醋精整,但係佢話呢個係佢自家純釀製出嚟!


呢度全部製品都係源自新界出品,唔好以為係日本貨,所以係真真正正嘅本土貨!梗係要支持啦(之後我哋仲買咗碗豬腳姜食$25)



好啦!「鎮店之寶甘筍汁」登場啦,成杯飲品個色真係好假,好似水彩咁橙色!因為紅蘿蔔喺雪櫃拎出嚟,所以搾出嚟嘅甘筍汁都好清涼!

飲落去...先講真係好好飲,感覺好清甜好新鮮,絕對冇後加工加糖加水溝稀!飲完一啖要即刻飲第二啖!果然名不虛傳(飲緊嘅時侯仲有街坊專程嚟飲番杯)


喺我仲未忘記到呢杯甘筍汁之際,發現時間唔早都差唔多要離開lu!(下圖為展覽館正門入口)



展覽館設有導賞團!有興趣認識九龍寨城歷史嘅朋友可以上網報名導賞團


呢支大炮仲大支過頭先見到嗰支!


喺展覽館門前呢棵千年老樹簡直係壯觀呀!


旁邊有個古井,不過已經封住咗lu!其實咁樣整不如用個大玻璃箱封住佢仲好,起碼我仲影到個井嘅原貌!


行前少少見到九龍寨城嘅模型!


剛好遇到有專業呀叔帶巿民導賞!


相信呢個係以前嘅遺址



哥哥喺度搵緊路邊度可以行落去...我話俾佢知呢度係俾人參觀唔落得去㗎!


跟住見到棵咁靚嘅鳳凰木,叫佢哋兩個影張相,哎!一時又水溝油,突然之間糖黐豆攬埋一舊影呢張相



最後我哋喺南門離開出番去賈炳達道公園




近東門位置更有單車店可供租單車踩!


我哋沿路行番去公園嘅兒童遊樂場,途中見到有人踩單車同跑步!



呢條用草砌成嘅大龍都好靚,不過我唔係太睇到佢個龍頭嘅眼耳口鼻囉


其實賈炳達道公園都有好多草地,雖然唔係好大好寛廣,但係因為唔係太多人,所以其實都好足夠,如果近近地都可以嚟呢度野餐



去到兒童遊樂場附近又見到多一個洗手間,好有型嘅設計喎!(但係當我行到入去時發覺裡面係冇咩特別)


芊芊當然唔少得又係玩韆鞦啦!


哥哥就仍然繼續玩搖控車(周圍環境真係幾舒服幾靚)


最後佢哋喺度玩咗陣瀡滑梯,跟住就離開公園,去一條馬路之隔嘅「石屋家園」嘆下午茶





Photo by CANON 5D Mark III, Len | EF 24-70mm f2.8L USM


呀劍評分: 9分


呀劍評語: 我覺得所有正嘢都係隱世嘅,所以呢家小食店真係要再Encore,呢位親切嘅老闆娘我哋後會有期,再嚟嘆你杯「鎮店之寶」甘筍汁!

賈炳達道公園 簡介

公園內設有洗手間其他設施包括1條單車徑、1個兒童遊樂場、1個長者健身站、1個7人硬地足球場、4個籃球場和2個排球場

賈炳達道公園地址

九龍城賈炳達道

賈炳達道公園開放時間

每日24小時開放

九龍寨公園 簡介

九龍寨城公園的原址是九龍寨城,是香港近代歷史其中一個最重要的遺蹟。遊覽其中,除了可以好好欣賞美景,還能緬懷上世紀的老香港風貌。

九龍公園地址

九龍九龍城東正道

九龍公園開放時間

每日上午六時半至晚上十一時 

九龍公園展覽館開放時間

每日上午十時至下午六時 (逢星期三休館)

電話

2716 9962 

電郵

kwcp@lcsd.gov.hk

(以上資料更新至文章當日)




沒有留言:

發佈留言

Related Posts Plugin for WordPress, Blogger...