2016年5月21日星期六

【親子好去處】深水埗 YHA美荷樓開放日2016 「我們的快樂時代」

前陣子3月尾美荷樓的呼吸冰室因為租約期滿所以要告別大家, 估唔到唔夠兩個月又開番店!

不過今日美荷樓開放日, 嚟到見到冰室同士多都改咗名做四十一座冰室同四十一座士多!


咁近屋企梗係要到此一遊順便喺度食個早餐! 今日天氣麻麻地, 落雨濕濕, 不過都冇影響開放日



9:30準時開始開放日, 仲未係好多人! 快快入去參觀吓同食個早餐先


除咗冰室同士多裝修過, 今日仲開放咗一樓既房間俾公眾參觀, 生活館都如常開放(因為之前已到訪過生活館, 所以今日冇入去)

上一次>>CLICK HERE!
【親子好去處】深水埗 YHA美荷樓青年旅舍 Mei Ho House Youth Hostels Association 呼吸冰室 Fullcup Cafe



入口地上多了一個跳飛機由1跳到....唔知幾多! 就係生活館的入口


穿過生活館直入就會見到活動空間, 內裡有美荷樓的影片播放介紹, 另一邊有YHA的放舍簡介

我哋當然最有興趣就係蓋懷舊圖章同埋穿塑膠玫瑰花啦!



我哋可以在這裡選擇自己喜愛的圖章蓋印在場刊上面, 不過場刊其實冇一個特定的空白頁面可以蓋上去, 所以只係在封面隨便找個位置便算

我覺得可以預留一頁空白位置如場刊背頁, 然後要完成一些指令去儲蓋印, 小朋友會來得較開心及珍惜!


哥哥對蓋印都冇咩興趣, 因為圖章上的圖案都不是他熟悉的物件!



嚟到活動室的另一邊, 叫做「藝友工廠」有職員負責講解從前穿膠花的歷史及教大家穿一朵塑膠玫瑰!



因為沒有一個特定時間開始, 只要有人行前嚟佢就會開始, 但係當活動進行既時侯, 如果有朋友想參加, 職員不會讓剛到來的朋友中途加入

一開始的時侯職員向參加的朋友講解歷史, 佢問哥哥第一條問題「知唔知一打有幾多枝花? 一籮有幾多打?」........


膠花一律用藍色花辮, 逐個步驟教我哋去穿! 不過過程有D耐...我都唔知晏D越嚟越多人嗰陣佢點應付!


終於完成咗啦! 我同哥哥送俾屋企裡面兩個女人, 一朵送俾媽咪, 一朵送俾芊芊



玩咗咁耐個肚開始咕咕聲, 真係唔可以空肚食早餐! 所以我哋去四十一座冰室食少少嘢先


早午茶晚四餐既餐牌都係固定的! 早餐只有三款選擇


冰室內重新裝修後, 安放咗好多懷舊物品

九因歌呀....細個最唔鍾意背一一如一到一十如十!

細個至愛的紙上遊戲 - 天下太平, 搵日要教哥哥玩先!

兒時成績表同功課呀, 唔知邊個咁勇奉獻出嚟架呢?



畫鬼腳! BB戰士...但係我想講鱷魚牙醫唔算舊吓嘛


我好鍾意呢個橡筋造型清潔龍

七巧板, 今時今日都仲有玩緊! 真係長青玩具!



「正呀喂」

佢哋兩個要求我喺呢幅壁畫度同佢哋影番張相! 哈哈

呢個鐘好明顯係冇插電...今日係21號(嘻嘻)

講到懷舊, 點少得樽裝可樂! 如果有埋蓋掩換搖搖既擺設仲正

卡式錄音帶呀! 浪口盅

黑膠唱片


冰室四圍環境雖然裝修得好靚, 但係我覺得失去咗前身既一種氣質


可能開店冇幾耐所以冰室職員都手忙腳亂, 食物方面都算幾差, 尤其是個乳酪餐, 得一件鬆餅, 幾塊沙律菜, 一杯乳酪同一個蘋果, 覺得好似唔值$30!

如果驚唔夠飽大家都係食糯米雞餐好D!



我行咗出去睇吓仲有咩嘢行, 原來有個開放日的接待處喺旅舍那邊, 因為好多朋友都係跟住門口那個跳飛機的方向進入活動室

所有入場朋友Like咗美荷樓同埋YHA專頁, 就可以得到懷舊玩具一件! 不過哥哥同妹妹對佢哋一D都冇興趣, 反而見到大會安排咗部分7-11前排換取的Diseny系列玩具, 我叫埋媽咪同工人出去Like專頁換咗幾個俾佢哋!



我就最鍾意支彈弓槍同埋竹蜻蜓!

Recpetion附近的牆身係可以俾大家喺上面簽名, 大家簽到花哂卻變成一幅幾靚既牆身


然後我再行埋上去一樓參觀一下房間, 由地下沿樓梯行上去一樓, 每一度牆都係壁畫!





上二樓的梯間壁畫都好靚, 記錄咗所有香港經典既盛事!



首先參觀一間二人房單人床, 都幾舒服幾企理! 房內空間都唔算少, 窗外環境望向後山



走廊望上去二樓發現一個露天休憩平台


最尾一間房係碌架床8人房間, 冇咩活動空間, 都幾逼!



行番落去冰室坐多一陣, 食埋個早餐就離開了



行出去過到對面四十一座士多, 我哋又入去到此一遊吓, 一出冰室因為冷氣地方一出一入, 好多霧氣, 影到佢哋兩兄妹都矇查查!


士多裡面冇以前咁多嘢買, 而且所賣的物品都好新, 失去從前的懷舊特色!





不過呢幅壁畫都幾靚!! 好多朋友都入嚟為咗影呢張相



最後同咗兩位扮鬼扮馬姐姐影番張相就走啦! 佢哋一個扮女殺手, 一個扮林呀珍! 唔知哥哥將來仲有冇機會睇番呢D經典粵語殘片呢


Photo by CANON 5D Mark III, Len | EF 24-70mm f2.8L USM

呀劍評分: 8分

呀劍評語: 裝修後的四十一座冰室及士多, 都不及前身呼吸冰室, 食物質素都下降咗好多! 開放日都不那麼特別, 其實除咗活動室的印圖章及穿膠花, 同埋房間參觀, 其餘冰室及士多平日都可以嚟!

YHA美荷樓開放日 簡介
今次YHA美荷樓開放日並以「我們的快樂時代」為主題,彼此分享屬於自己的快樂時代。
兩天的開放日均為免費入場,而節目亦多不勝數,大會為大家準備了各式各樣的互動遊戲,包括「穿膠花工作坊」、「印出舊香港」及與「70年代潮流教主」自拍等,同時另設4場導賞團(10:30am、11:30am、2:30pm、3:30pm),帶領大家體驗60年代的公屋生活。

地址

九龍深水埗巴域街70號石硤尾邨41座 (港鐵深水埗站B2出口)

開放日期
2016年5月21日 - 22日

開放時間
上午9時30分至下午5時

費用
免費

聯絡電話
2723 3126 / 5112 9195

網址
www.yha.org.hk/mhh

(以上資料更新至文章當日)



沒有留言:

發佈留言

Related Posts Plugin for WordPress, Blogger...