2016年4月10日星期日

【親子好去處】將軍澳 消防及救護學院 開放日 Fire & Ambulance Services Academy Open Day

撲飛仲難過五月天既消防及救護學院開放日, 今日終於有機會嚟啦!

好多謝俾飛我既#呀傑同埋#Kiu Yan! 佢哋每人俾咗兩張飛我, 俾我哋一家四口可以嚟玩半日!

我哋由天后搭港鐵去到北角轉將軍澳線調景嶺落車

睇住佢哋兩個喺地鐵玩得咁開心, 真係一個「好」字, 最主要係哥哥唔駛再叫我陪佢, 妹妹夠大個識得同哥哥玩了




落咗車經B出口行到巴士站搭上X797, 係今次開放日預備的特別車可以直到學院


喺正門口落車, 望去山嗰邊見到好大霧, 好似仙景咁

仲一落車就見到舅父一家, 講都唔信, 喺度撞到好多朋友


無仔細研究每一座大樓係乜東東, 只係覺得呢度都真係好大!




一直行先見到一個小小嘅展區,有好多義工消防員叔叔喺度介紹消防員常用嘅裝備

仲有一邊有義工叫大家下載手機APP可以認識更多消防員嘅嘢,當然如果你肯下載就會送個銷匙扣同埋貼紙俾你


呢個裝備係喺人哋隻手受傷嗰陣可以固定佢隻手,好似人哋量血壓咁



呢個見得多啦,唔駛講都知係咩喇...


行到去攤位區附近有架貨車同巴士,改裝咗成為一架流動宣傳車,上去睇吓消防設備


但係其實上到去上面得個逼字,咩都睇唔到,你想停低後面嘅人又上緊嚟!唯有快D落車



因為時間冇多,我哋選擇唔玩攤位遊戲,去周圍參觀先!因為時間得三個鐘,而我哋又差唔多三點先到



嚟到呢度見到好大架船呀!原來呢度係水上事故訓練場,估唔到真係有㗎咁大嘅船俾學員訓練,唔知會唔會有飛機呢?


哈哈!真係有個假人喺度扮俾人救!


入到嚟呢區係投考資訊專區/調派及通訊組展示區,消防員就係要通過呢D測試先可以成為消防員㗎啦!

哥哥拎住塊乒乓波板喺度做咩?原來遮住其中一隻眼去測試視力


哥哥要伸隻左手手指公出嚟,當哥哥指住邊個E字,哥哥就要用手指公指出E字嘅方向

唔知係哥哥視力未發展得好定係差咗!好多個細E字都睇唔到



出番嚟就突然落一陣雨,我哋企喺度避避雨同兩架車影相




知道3:45會有表演睇,所以我哋早早去覇咗個位先,跟住我同佢哋兩個就周圍去參觀

見到呢個蛙人就即刻過去睇吓,原來我都幾多嘢問!耐心嘅消防員哥哥解答我好多問題,佢仲反而問番我手上嘅鎖匙扣喺邊度嚟?




行到嚟呢邊有個好大嘅廢墟,呢度係特種救援訓練場,佢哋問起我呢度係咩嚟,我扮專家咁答佢哋話消防員都要練習地震嘅時侯點樣救人


呢一邊係一陣間巡遊會出動嘅消防同埋救護車

成班消防員圍哂喺度唔知做咩呢?





呢一系列嘅車其實都好少見,今次有機會同佢哋影到相都幾開心


呢架車成架紙紮車咁嘅?....大吉利是

其實係我大鄉里啫,如果邊個知道可以話番我知嗎?


嘩 連西鐵都有,點解冇海洋公園及360䌫車?不過我知道佢哋真係要去現場接受訓練


嚟到呢個交通事故訓練場!果然開口中,真係見到飛機


不過呢架飛機唔係咁像真喎!咩型號?我估佢係扮空難現場



哥哥見到呢個場景問消防哥哥係咪真嘅!消防哥哥答佢全部都係真㗎!不過撞車就係假嘅,因為要俾消防員練習點樣拯救傷者



呢度係空中拯救隊嘅訓練場,呢個哥哥好有耐性咁同我哋解釋好多嘢,其實我只係禮貌地唔想影張相就走,所以問咗一個問題,點知...哈哈哈,巡遊時間就快開始㖭.....


好在番到去都未正式開始,真係好多人呀!好在我哋都坐喺一個有利位置!


全部車總動員一次過出哂嚟!


最後嚟一張全家幅,場面好震撼呀!


向後望番過去真係多人到不得了,坐喺看台上面嘅人驚落雨所以坐到咁後,咁遠唔知佢哋睇唔睇到!


之後有三隻調查犬同埋佢哋嘅訓練員出嚟!以為會有咩表演睇,原來只係出嚟同主持人傾幾句


抬頭望上去消防徽章,其實依家都好少用斧頭,係咪要改過佢呢?


跟住壓軸表演就係滅火及救援示範,本來預定咗4:15先開始,但係大會提早咗開始,可能因為有上晝開放日嘅經驗,所以知道好多朋友都趕唔切玩攤位遊戲,時間太趕!所以下晝呢一場先有咁嘅調動


整個演出睇哂每一個部門的工作,不論係拯救被困傷者或救火,睇到呢個工作真係好需要Team Work,做指揮工作那個更加唔講得笑!


表演完畢lu...仲有大半個鐘我哋就番去攤位遊戲嗰邊繼續玩









估唔到呢邊都有得童夢城一下...大會又幾諗得幾週到喎!真係適合一家大細


大會預備咗好多套衫,所以一行埋嚟已經有得著,咩尺碼都有!叔叔一睇就知佢哋咩Size,冇得輸!消防員叔叔仲好細心預備多一套俾媽咪,如果唔係我哋都本來冇打算要著嚟影


結果就產生咗呢幅相出嚟!又真係幾靚


真係講都唔信,喺呢個開放日裡面撞到兩個舅父,媽咪同事同我舊同事幾家人,真係約都冇咁啱!



呢個場好壯觀!我同哥哥講呢個係消防員叔叔玩嘅遊樂場,係咪勁過你平時喺公園玩嗰D




離開咗之後我哋就搭番X797番調景嶺轉乘港鐵返歸啦!

呢D全部係我哋嘅戰利品!勁


Photo by CANON 5D Mark III, Len | EF 24-70mm f2.8L USM

呀劍評分: 8分

呀劍評語: 鍾意消防員嘅小朋友一定啱哂佢哋!地方好大,可以睇哂所有消防救護車,有遊戲玩、有表演睇、有消防員扮,真係無得頂!而且今次大會各樣安排都好好,交通方面一流,幾乎唔駛排隊,幾分鐘就一班車!不過三粒鐘真係唔夠喉!
(搭巴士嘅時侯聽到有人話呢個開放日可能唔會有下次,唔知係咪真㗎呢?)

消防及救護學院 簡介
位於將軍澳全新的消防及救護學院於2016年第一季啟用,新學院設有多項不同場景和不同種類事故的模擬設施,提供多元化的救援訓練,屆時消防和救護學員將有更多一同操練的機會,提高他們在緊急事故中的應變及協調能力,從而更有效地發揮救援工作的效率。此外,消防教育中心會提供互動及多媒體資訊設施和不同的體驗區,例如火場逃生及模擬滅火體驗區,讓參觀人士作第一身的感受,以推廣防火、火場逃生及急救知識。

地址

將軍澳百勝角路11號

交通
港鐵:調景嶺港鐵站專線巴士X797直達

日期時間
2016年4月10日(星期日)
第一時段:上午10時至下午1時
第二時段下午2時至5時

(以上資料更新至文章當日)



沒有留言:

發佈留言

Related Posts Plugin for WordPress, Blogger...