2016年3月28日星期一

【親子好去處】啟德郵輪碼頭 東華慈善嘉年華 Tung Wah Charity Carnival

開咗大半年都有既「東華慈善嘉年華」今日最後一日終於入咗場玩!

但係呢個所謂「全日無限任玩套票」實在令我對這嘉年華留下污點

本來從來都冇打算過要嚟呢度玩! 但係有一次上網搵到有朋友平放價值$180入場証

原本三張$180x3=$540, 佢只係$350讓咗俾我! 所以就襯呢個復活節假去玩吓!

我哋輕輕鬆鬆朝早去順安邨搵太婆飲早茶, 跟住就打的$60直達啟德郵輪碼頭


我問職員我已經有入場証仲駛唔駛排隊入, 佢話如果要升級就都要排隊去售票處度處理

每張証其實都有$180面值喺裡面, 但係可以免費自動升級做「全日無限任玩套票」

大人升級就要加多$40



當我哋排隊到窗口位置個職員哥哥建議我, 芊芊唔需要升級做任玩套票, 因為佢話裡面有好多嘢佢都玩唔到!(嗰吓我聽見係以為佢指裡面好多大型機動遊戲佢都唔玩得, 所以升級冇咁抵!)

於是我就聽佢講其中有一張冇升級! 跟住職員哥哥用印仔印落去媽咪同哥哥手度證明佢哋係全日任玩的


入到場我哋先由左手邊開始玩起!

原來我計劃咗23/3平日嚟, 但係連續幾日落雨, 到今日最後一日先出太陽, 以為會冇咩人嚟, 點知都幾多!


嘩, 呢個招牌機動遊戲「陀飛輪」真係勁! (嗰吓仲諗好在冇幫芊芊升級, 確實係好多嘢都唔啱佢玩)


我哋分頭行事, 媽咪同哥哥先排隊玩「超級紐約滑梯」, 因為芊芊唔夠高, 過唔到個身高標準

咁我就唯有同芊芊去周圍睇吓有咩啱佢玩



途中見到好多各式各樣既攤位遊戲, 我不嬲都唔太贊成玩呢D帶嚟短暫快樂既遊戲, 好似將錢掉落海咁! 所以我哋只係望兩望就離開



第一個見到又玩得既遊樂設施, 係呢個「繽紛可可杯」雖然個杯唔識得自轉, 同真‧咖啡杯相比係削好多! 不過芊芊都係玩得好開心

原本一個人收費係$30, 而芊芊張咭並冇升級做任玩套票, 所以都有點猶疑好唔好玩, 因為咁樣會扣$60, 玩個遊戲就冇咗三分一, 好似好唔抵, 嗰吓有一陣子想番轉頭將佢升番級

但係職員姐姐細細聲同我講, 俾我只扣一人錢就同埋芊芊一齊入去玩, 咁我梗係話好啦!




玩完之後我哋又繼續周圍睇吓有咩玩, 又再一次見到呢D咁得人驚既機動遊戲, 真係冇可能芊芊玩到, 連哥哥都唔掂! (當時又諗好在冇升級)



然後見到有其他幾個遊戲又好啱芊芊玩喎, 又小飛象又跳彈床又「乍」車咁, 依家得番$150面值, 玩多兩三個遊戲就冇哂囉喎, 跟住就諗不如轉番做任玩套票啦, 所以就當機立斷即刻去升級,
雖然要補番$30, 但係好過一陣間冇得玩仲後悔!



番轉頭睇番媽咪同哥哥開始瀡滑梯啦! 但係去到先見到有D朋友帶住個仲細個芊芊既BB一齊瀡, 跟住我就問職員, 乜唔係唔夠標準高度唔玩得架咩?

個職員話如果唔夠高都可以大人陪住玩既..............(又唔早講)

之後唯有先睇住媽咪陪哥哥玩一次, 之後再叫媽咪同芊芊排多次隊(好在唔多人, 只係排10分鐘唔駛就到)


哥哥瀡完落嚟話好驚好驚!!!! 媽咪就話最辛苦係行條樓梯上去

當媽咪同妹妹重新排過隊既時侯, 我同哥哥就去隔離個「海盜灣迷你高爾夫樂園」打Golf!

總共有9個洞要打入去, 所以哥哥都玩得好盡興! 唔駛話排一次隊只係玩得嗰一陣間




哥哥未係好可以掌握到點打, 每次都係當支棍係掃把將個波掃入洞






終於到妹妹啦! 媽咪抱住芊芊一齊由上面最高瀡落嚟, 芊芊超興奮, 一落嚟就話好想玩多次

但係個場咁大我哋都係去試吓玩其他嘢先! 呢度同場加設有馬戲團睇, 但係我哋都係等佢哋兩個大小小先帶佢哋睇



嚟到呢一邊見到有小飛象「彩虹小飛象」, 芊芊一路嚷住要玩, 

哥哥就話唔想玩呢個, 所以只有媽咪同芊芊去排隊!




之後我哋再去到「旋轉小蜜蜂」, 其實暫時玩咗咁多樣都係轉轉轉, 真係辛苦咗媽咪, 因為佢好怕玩氹氹轉既遊戲!




由於已升級做任玩套票, 佢哋玩完又玩(因為冇人排隊)

之後到哥哥又上埋去一齊玩多次



之後見到有「充氣布甸彈彈床」行到埋去先知, 原來唔適用於任玩套票! (心諗開始覺得中伏)

嚟到「兒童創意動感區」諗住乍車, 玩Lego....喂, 大佬! 全部都要另外俾錢, 任玩套票唔包!!!

我嗰刻已經火都嚟, 我完全覺得係誤導......咁咩叫做「任玩」, 請問「任玩」定義係咩

如果要人哋睇番T&C咁細粒字先知原來呢樣唔包嗰樣又唔包, 咁即係明Trap人啫!




喺嬲嬲哋之際, 我哋去玩番個真 ‧ 任玩既遊樂設施「迷你小鞦韆」

點知呢個又話芊芊唔玩得.....話佢唔夠高! 最後只得哥哥可以玩





嚟到呢個「亞馬遜漂流記」, 喂大佬!! 又話芊芊唔夠高! 隔離個「迷你海盜龍」又唔夠高

咁芊芊真係咩都玩唔到架喎, 唔怪得之入場時個哥哥話芊芊唔駛升級啦!





呢架咁既海盜船慢過蟻「欄」, 我都唔明有咩咁危險, 連芊芊都唔駛玩!



之後買咗少少嘢俾佢哋食, 補充吓體力休息吓, 因為今日都幾熱! 不過好在天氣乾, 又有D風

跟住我哋就去咗玩旋轉木馬, 都唔多人排隊! 所以好快就有得玩, 呢個「雙層旋轉木馬」係幾靚



今日媽咪全程同佢哋兩個玩哂咁多個遊戲, 我就只係喺外面幫佢哋影相! 

雖然佢轉到頭暈暈, 但係都Sweet Sweet!!





呢一個叫「極速滑梯」聽個名都唔敢玩, 不過最緊要係呢個太多人排隊, 同埋流程好慢有排等, 所以冇玩到!


呢個都唔駛講啦! 佢哋絕對唔敢玩, 亦都未夠資格玩, 如果佢唔係最後一日, 我真係想在網上爆佢完全違返商品說明條例

首先你個「升級任玩套票」個名已經誤導人, 原來唔係全部都係任玩!

第二屬於「任玩」既設施, 原來又有高度限制, 唔夠高就算係任玩套票都唔玩得!

可能對大人年青人嚟講係冇問題, 但係對於一家大細嚟講, 真係指示唔夠清楚! 雖然入場時職員哥哥都俾我建議, 但係我都冇諗過「我以為啱玩的遊戲」係「全日任玩套票」唔包


其實芊芊升咗級之後只可以玩可可杯, 小飛象, 小蜜蜂, 旋轉木馬同埋超級滑梯

所以最後同芊芊玩咗可可杯 x1, 小飛象 x1, 小蜜蜂x3, 旋轉木馬 x1, 超級滑梯 x1, 希望Reach到$180(呀唔係....應該係$210)既面值, 如果唔係就倒蝕了

至於哥哥升級就真係蝕咗啦, 因為佢連$180面值都玩唔哂, 佢只玩咗旋轉木馬 x1, 超級滑梯 x1, 亞馬遜 x1, 迷你鞦韆 x1

仲要途中買咗隻$40雞脾俾佢哋食! 真係好氣頂!




Photo by CANON 5D Mark III, Len | EF 24-70mm f2.8L USM

呀劍評分: 4分

呀劍評語: 我唔知係咪得我一個遇到呢個情況, 就個人經歷就好唔滿意佢「任玩票」的指示! 玩得唔夠抵!

東華慈善嘉年華 簡介
會場設施內容豐富,形式多樣,主辨單位在歐美各地網羅了超過40多款最新機動遊戲及攤位遊戲,設有家庭娛樂區、演藝綜合區和美食廣場,適合不同年齡人士一同盡情參與,勢要將歡樂及笑聲填滿前啟德機場跑道上的每一寸土地。

地址
前啟德機場跑道,九龍灣承豐道33號 (啟德郵輪碼頭旁空地)

日期
28/3/2016(最後一天)

開放時間
平日: 3pm-11pm 
星期六、日及公眾假期: 11am-11pm

網頁
http://uepl.com.hk/tungwah/index.html

(以上資料更新至文章當日)



沒有留言:

發佈留言

Related Posts Plugin for WordPress, Blogger...