2016年3月30日星期三

【親子好去處】石硤尾 主教山 (石硤尾/窩仔山)

今日係公假之後番工的日子,但係我都請多日陪吓一家人

本來喺大家番工嘅日子應該好好揀一D平時放工最多人嘅地方去,但係反而今日卻簡簡單單就咁去咗屋企附近的一座山上玩

點去就唔再講啦,睇番上次篇Blog文啦!🌲

上次體驗>>CLICK HERE!
【親子好去處】石硤尾 主教山 (石硤尾山/窩仔山)



今日佢哋兩個嘈住話要帶埋單車上嚟,我一個男人兩隻手💪 💪 拎住兩架單車上山,真係上氣唔接下氣,差D攞咗我條命

不過都好嘅我平時咁少時間做運動,咁樣上山就當我做番成年嘅運動啦

今次上到嚟先發覺原來放喺度嘅單車同冇電嘅電動玩具車係可以俾小朋友玩

不過既然佢哋兩個都有單喺度,佢哋就先俾吓面踩番兩轉先 🚴



連羽毛球拍都有,不過我哋自己都帶咗嚟!



佢哋踩咗都唔夠五分鐘就玩第二樣嘢,你哋兩個....你老爸咁辛苦拎上嚟你哋玩得嗰一陣 😅

跟住芊芊坐咗上去山上面架玩具車上面玩,當然冇哂電話,但係仲可以轉左轉右,所以我唯有做人肉電芯推住架車行



但係推唔到幾耐,推到條腰都痛痛哋,跟住媽咪同佢哋一齊種嘢!因為我哋以前屋企有花園,所以都剩低少少種子同埋種植工具

當然我同媽咪都知道未必可以種到嘢啦,不過俾小朋友嘗試吓種植培育小生命 🌞 🍂 🌿






佢哋只係用小鏟掘出一個小窿,然後放種子落去!再加D水,希望下次嚟我哋會見到有幼苗啦!

希望在明天嘛!我諗我係咪都會指住一棵植物話係我哋上次種落嘅植物



今次可能時間充裕D自在D,所以留意到好多上次見唔到嘅花,原來有好多唔同種類嘅花,仲幾靚吓㖭!





呢棵仙人掌先勁!唔知係天然定係有人專登種喺度嘅呢?


兩個馬騮玩唔停!開始拎出羽毛球拍出嚟打波!而芊芊就再坐車玩,自己架單車已經冇再掂過






我哋見到有人用一碌木頂住車尾去推車,我哋都有樣學樣,果然舒服好多,唔駛屈住條腰!


哥哥推完妹妹,跟住佢哋就調番轉,哥哥坐妹妹就推佢!


估唔到哥哥咁大舊仲可以坐落去架車度!




哥哥當然玩玩吓都係覺得唔好玩啦,因為唔夠快呀嘛!所以佢走番去踩自己架單車

妹妹就再上番去玩,媽咪推住佢玩得好開心!都係細個D容易滿足D



我好鍾意呢個地方,就好似大家嘅一個後花園,好少人會專登行上嚟,可以好自在咁鍾意玩咩都得!


哥哥喺度影呢張相幾有型!跟住叫埋妹妹過嚟一齊影



最後妹妹梗係要玩佢最鍾意嘅韆鞦啦!每次佢打韆鞦踢到我就最開心















跟住又拎咗好多個呼啦圈落嚟跳!


跟住仲扮埋空中飛人!



哥哥仲拎埋個足球出嚟踢!真係咩都玩齊,點知踢咗幾分鐘之後突然落起毛毛雨上嚟

我哋就即刻執嘢落番山,因為我哋乜嘢雨具都冇帶!



Photo by CANON 5D Mark III, Len | EF 24-70mm f/2.8L USM


呀劍評分: 10分


呀劍評語: 可以算係鬧巿中嘅大自然,在石硤尾太子這邊居然有行山路線,除咗大家都認識嘅嘉頓山之外,呢度真係好特別,行到山頂見到所有巿民自己發自熱心的設施,你更感覺得這個社會只要有愛有人情味,真係可以唔駛要無能政府!

交通
港鐵石硤尾站G出口步行5分鐘到山腳位置(聖方濟各小學過健康院見樓梯)
或港鐵太子站a出口步行8分鐘至警察體育遊樂會到西洋菜北街盡頭的入口

(以上資料更新至文章當日)




沒有留言:

發佈留言

Related Posts Plugin for WordPress, Blogger...