2016年3月12日星期六

【親子好去處】元朗 Play House @開心廣場

今日又帶住兩隻嘢去上興趣班

全日有好多空檔唔知做咩好, 所以決定再嚟Play House玩番日


陪妹妹學完跳舞之後, 就同佢哋兩個去飲茶!

因為到三點先至到哥哥學畫畫, 所以我哋飲完茶就一齊去Play House玩

俾一次錢可以全日無限次進場任玩, 所以都抵番哂!

我哋上到開心廣場二樓Pizza Hut轉個彎就會見到Play House嘅入口



沿住樓梯直上就到! (當然你都可以選擇喺開心廣場側搭電梯上嚟啦!)


進場之前你一定要除鞋! 地方都足夠可以放埋遮同埋BB車


呢度真係好識做生意, 仲有扭蛋機同埋玩具賣!

因為呢度可以預訂生日會, 所以仲有好多生日Party用品賣


唔同日期唔同時間都有唔同收費! 今日星期六$120包一大一小

但係我先俾$10做咗會員先, 就可以用$105入場, 如果大家係5:30先入場仲可以平好多$85

每個入場朋友都會有條手帶, 只要一直帶喺手度就可以全日無限進出



兩個嘢一入咗裡面第一時間就係去波波池!

其實我一向都覺得波波池好污糟, 不過我入到裡面望一望都覺得幾乾淨

佢哋聲稱每日都會清潔, 仲引入咗部洗波波機, 保持每個波波都好乾淨





芊芊玩到超開心, 成個日就嚟潛咗入去波波池裡面!

諗番起細個嘅時侯都未有機會玩波波池, 其實我都好想試吓瞓喺咁多個波波度!

不過依家已經牛龜咁大隻...


瀡滑梯前面嘅波波幾乎瀡走哂, 所以周不時我要將D波波踢番過去!



D波波散落哂去窗邊, 所以呢邊好好玩, 如果夠細粒真係可以活埋喺波波池裡面



元朗Play House正好對住實惠, 所以好易搵!



喺波波池隔離有個「泡泡球激戰區」呢度有好多部泡泡球發射機, 中間仲有架噴射機

有好多海綿波射到一地都係, 小朋友可以爬上去用發射器去射出

又可以集齊海綿波倒哂落去噴射機. 等噴射機吹上去天花, 好激架真係!








[video]



呢個區域叫做「海底歷奇迷宮」, 因為元朗分店係以海洋為主題的

小朋友當然最鍾意就係爬嚟爬去, 但係大家唔駛驚追唔到佢哋, 因為呢個迷宮都足夠地方俾大人爬入去, 所以可以陪住自己小朋友入去

(不過我見到好多家長都係自己坐埋一邊撳電話)



呢邊嘅瀡滑梯就少D人玩, 因為瀡咗落去之後佢冇一個位置可以行番出嚟

一定要入番迷宮爬爬番上去先離開到, 所以設計上有少少不便




仲有其他唔同嘅設施俾小朋友玩!

厠所設於場內, 提供哂拖鞋俾大家著去厠所




  
呢邊都張彈床, 不過當有好多個或者年紀相約小朋友入去跳嘅時侯就有少少危險

雖然佢外面都貼咗上限人數同埋年齡限制, 不過有D小朋友話自己好細個, 但係佢生得起大舊...(無語)







芊芊每樣嘢都玩一陣, 款款都試一試!












哥哥就最鍾情呢部足球機, 如果要玩呢部機, 粒波要去Reception度借

不過要留低$50按金, 不設找贖, 所以如果你得$100就要留低$100

到你還波嘅時侯佢會俾番你! 不過借嚟借去都幾麻煩

不過避免小朋友爭同整唔見粒波都冇辦法







玩呢部足球機要留意小朋友, 因為佢哋未夠高, 好多時另一邊推支棍會撞到佢哋心口

我哋玩玩吓其他小朋友都走過嚟一齊玩...



足球機芊芊就玩唔到喇, 唯有繼續去試玩其他嘢! 同埋番去波波池無限次瀡滑梯














終於等到彈床冇咩人, 芊芊就可以入去跳吓!!

  
 

呢個氣墊球都係同足球機一樣, 都係需要放底$50按金, 但係芊芊玩玩吓覺得唔好玩

所以唔夠3分鐘又番去還嘢拎番按金!







我哋玩到大約3點鐘, 我就帶哥哥去上畫班, 跟住工人同芊芊繼續留低玩

2粒鐘之後又同芊芊一齊去接哥哥番嚟玩

玩咗1個鐘之後等埋媽咪放工, 就落去Pizza Hut食晚餐

食完又上番嚟玩大半個鐘(當時已經冇哂人咁擠), 跟住就搭車番屋企lu...全日入場3次, 乜都抵番哂啦!



Photo by CANON 5D Mark III, Len | EF 35mm f1.4L USM

呀劍評分: 7分


呀劍評語: 一句講哂, 如果你係由朝玩到晚先至抵!

Play House 簡介

Play House @ Yuen Long 是 Play House 在本港開設的第六間大型兒童室內遊樂場,目標為12歲或以下之兒童提供集健體、遊戲及家庭樂於一身的活動場地。 Play House @ Yuen Long 位於新界元朗大馬路123號(即青山公路元朗段)開心廣場三樓,位置鄰近輕鐵大棠路站,交通便利。新店佔地近7,000平方呎,今次我地特別將海洋世界帶進兒童室內遊樂場。 場內分為十一個區域包括:海底歷奇迷宮、泡泡球激戰區、開心BB樂園、Play House潛水艇、動感賽車場、海底花園、沙灘健身區、岸邊攀石區、海洋世界活動室、王子公主活動室及特色玩具零售區。 Play House 以健體、遊戲及家庭樂的室內遊樂場設計,勢必成為本港兒童遊樂的新指標!

地址

香港新界元朗大馬路(即青山公路元朗段)123號開心廣場三樓

營業時間
上午十時至晚上九時
2016年特別日子包括:11/2-16/2, 29/3-1/4, 11/7-31/8, 23/12-31/12 (不包括星期六、日及公眾假期)

入場費
星期一至五(公眾假期除外)
小童(12歲或以下) + 成人  |  日票: $90(會員$75) [額外成人 +$40]; 黃昏入場票(下午五時半後): $60 [額外成人 +$35]

星期六, 日及公眾假期
小童(12歲或以下) + 成人  |  日票: $120(會員$105) [額外成人 +$50]; 黃昏入場票(下午五時半後): $85 [額外成人 +$40]

特別日子及角色體驗活動請參考
http://www.playhouse.com.hk/yuenlong/chinese/index.php?option=com_content&view=article&id=69&Itemid=69

電話

2151 9611

(以上資料更新至文章當日)




沒有留言:

發佈留言

Related Posts Plugin for WordPress, Blogger...