2016年3月20日星期日

【親子餐廳】尖沙咀 Dim Sum Icon 点心代表 @The One

今日終於有機會嚟一試 Little Twins Star 流沙飽,但係比我想像中........難食同服務差!(只限尖沙咀分店, 因為未試過中環店)

上一站>>CLICK HERE!

【親子好去處】尖沙咀 天文台開放日 2016 Hong Kong Observatory Open Day


今日去完天文台開放日,諗住順路終於可以嚟試一試Little Twins Star Cafe(通常人哋都係咁叫)

其實佢真正店名叫點心代表Dim Sum Icon, 除咗Little Twins Star,仲有幾款蛋黃哥點心同埋嚟緊4月1日最新嘅醜比頭系列推出

哥哥拖住呀妹一路唱歌一路向The One出發



嚟到門口咁啱見到有布甸狗即刻兩個走埋去同佢影張相

論盡嘅哥哥一跑去就捱住嚟影相,佢都唔記得咗今日毛毛雨,一趴落去就成個衫袖濕哂!

我當然就好......激氣啦!呢D事每日都會遇見


上到嚟L3, 但係實際都唔知上咗幾多層!總之一開始就搭Lift!

因為今日落雨濕濕,所以露天座位閂咗!玻璃上都貼滿咗醜比頭嘅貼紙



我拎咗張飛等位...兩個嘢就喺度不停拍櫈嘈死人


呢日我哋兩點幾先嚟到,所以只係等咗幾分鐘,好快就到我哋

但係點知佢安排咗張超高枱俾我哋,我行到埋去先知,佢見到芊芊咁細粒就唔應該俾張咁高嘅枱我哋坐啦!

後尾先知因為高枱剛好有3個入坐,仲有3個吉位就放埋我哋入去坐滿佢,明明有四人枱就留番俾D排喺我哋後面有4人嘅朋友

我坐到埋去又唔想煩,就唯有自己小心D坐喺芊芊隔離,哥哥就要靠自己喇!


同大家見到嘅一樣,裡面嘅餐紙茶壺等等都印有Little Twins Star樣!

但係唔知點解人哋隻杯都印有Little Twins Star,但係我哋三個隻杯都冇囉,就咁白色咩都冇

玫瑰普洱茶 $30



今日我就冇叫蛋黃哥點心,如果 Little Twins Star 點心,我就叫咗蝦餃腸粉同埋流沙飽

哥哥又叫住好想食鳳爪排骨飯,當然佢唔會明白嚟呢度叫呢個飯係好傻啦!

仲有個玫瑰普洱,我以為叫茶係唔駛錢,原來同茶樓一樣仲要每個收$10

仲要收埋加一....總數$255都幾貴!不過心裡面諗如果D嘢好食就算數啦


好啦,等咗5-10分鐘嚟第一籠流沙飽啦!放低嗰吓即刻心裡講「大佬!有冇得換過籠呀?」

因為Twins Star 男仔個頭Bunk咗一忽!大家嚟得呢度都係為咗影相呃Like啫...依家連幅相都影得唔靚

奶皇流沙包 $49

之於味道就同一般流沙飽一樣就預咗㗎喇,最緊要佢哋兩個食唔停話好好食咁就算!



好喇,俾多次機會佢...今次嚟碟腸粉,真係「頂」.....一聲!個職員拎住碟嘢有少少半飛過嚟空降喺我面前,碟裡面嘅鼓油飛哂過隔離幾條腸粉度

做得主題餐廳,係咪應該個賣相係最緊要㗎呢?好唔好食我唔想再講....已經火滾

鮮蝦蒸腸粉 $49

最後到籠蝦餃!算係最安全嘅一樣,不過味道鹹到飛起....

彩色蝦餃 $59

最後鳳爪排骨飯嚟到,個哥哥就居然同我講話好飽...

咁成籠飯我自己一個點食得哂呀!完

鳳爪排骨飯 $45

Photo by CANON 5D Mark III, Len | EF 24-70mm f/2.8L USM

呀劍評分: 5分

呀劍評語: 差差差!服務差,賣相差,味道差...人哋話唔食得都睇得,佢真係唔食得; 唔睇得; 唔「去」得.......

地址
尖沙咀彌敦道100號The ONE 3樓L308號舖

營業時間
星期一至日: 11:00-23:00


電話
28851345

(以上資料更新至文章當日)




沒有留言:

發佈留言

Related Posts Plugin for WordPress, Blogger...