2016年3月24日星期四

【親子好去處】九龍灣 BOUNCE@EMAX

今日嚟到復活節第三弹之旅 BOUNCE....彈彈彈! 兩個跳到「紅」都「面」哂!!



上次去過Ryze第一次接觸跳彈床! 原來都幾好玩同埋幾高運動量, 今次嚟埋Bounce睇吓邊一度好玩D先

上次跳彈床>>CLICK HERE!
【親子旅遊】北角 Ryze Ultimate Trampoline Park Hong Kong


較早之前參加咗網上的遊戲得到一張Bounce的免費換票證, 再加上三月份Bounce跟Vita GO合作有一個推廣, 只要買一包Vita GO飲品就可以二人同行

所以今次可以俾2個人錢+1包Vita GO就可以4個人玩!

前一晚我到Circle K買咗一包Vita GO價值$5.9, 然後番到屋企於網上登記!



在官網買了2大1小票價(由於Vita GO推廣的買一送一不適用於11歲以下小朋友)

所以小朋友單票我用原價$150買, 但大家要留意, 佢網上系統有個小錯誤, 只要你購買時輸入Circle K這個優惠編碼, 所有票價都會變做$75, 你唔好開心住, 到你現場提交時工作人員會check到要你補回$75!

係咪聽落好複雜呢? 等我簡單D再講多次啦

我&工人姐姐: 用了Vita GO二人同行推廣, 每人$75 x2=$150
哥哥正價買票: $150
芊芊用了換票証: 免費
(由於只有免費換票証包埋Bounce對襪, 所以仲要加$30 x3=$90)

對襪有哂防滑膠粒, 所以跳嘅時侯都好安全!


同埋每人都要有條手帶戴住


早前有一段新聞都令我幾擔心, 唔知好唔好帶佢哋嚟玩!

所以我預約了早上11:00嘅時段可以冇咁多人, 我哋預早15分鐘到場, 先著好對襪! 睇吓注意守則同去個厠所先



呢度有好多個膠箱提供(包括場內), 可以將書包臭鞋先放在這裡!

但係唔會有任何保障冇人幫你睇住, 所以大家唔好著D絕版或復黑版靚鞋嚟玩

(當然你可以俾錢用佢哋個Locker)




然後帶佢哋入場睇吓人哋玩同再三講解注意安全



呢度用咗網牆劃分咗8大區域, 分別有:

Dodgeball:彈床+閃避球

Free Jumping:Bounce嘅主台, 場地空間寬廣, 有35張彈床俾你點彈都得! 

The Wall:牆跑區域!主要俾鍾意玩反彈嘅朋友

Slam Dunk:入樽就睇得多, 自己入真係未試過!

Big Bag:俾初學者練筋斗嘅好地方,可以用「自己方式」落地!

Super Tramp:5×5 米全場最巨型嘅彈床, 雙腳輕輕用力已可彈到喪高, 唔係咁啱小朋友

Performance Trampoline:呢個區域提供一啲奧運級水平設計嘅彈床組合,俾一啲擁有較高技術水平嘅玩家show quali。 

Tuckshop by Classified:彈到攰,可以嚟呢度坐陣,飲吓嘢叉叉電, 但係秒秒鐘都係錢, 我就唔會坐低抖囉






做好熱身Warm Up好就等場內大聲公宣佈11:00時段開始啦!


一開始我哋就去咗Big Bag嗰邊彈!



呢個絕對係錯誤示範, 各位小朋友千祈唔好學呢位哥哥





跟住又走去另外一個區玩閃避球! 因為有好多個波俾佢哋掉嚟掉去, 所以佢哋最鍾意停留喺呢個區







之後去到主場區, 呢度真係好大又少人, 任佢哋跳嚟跳去都唔會有危險


呢個動作靚呀!!! 好似好PRO咁


哥哥開始適應彈跳感, 做出唔同動作啦!


都未夠20分鐘, 哥哥已經跳到謝謝地.....


但係話口未完又嚟過...



芊芊仲跳跳吓撞到個鼻鼻! 不過好叻冇喊繼續彈!


跟住兩隻嘢去咗射籃球! 對芊芊嚟講就真係太高了, 哥哥還勉強可以射中較矮的那個籃!





呢一邊係超級彈網區, 係俾D功力深厚既朋友玩! 所以唔好俾你既小朋友入嚟, 職員都會禁止!





話咁快又返番嚟閃避球區玩,攪到我都有D唔好意思,因為成日要職員解開條鏈俾佢哋出出入入

呢個哥哥有得掉開幾開心,可能佢見我成日話佢,今次仲唔明正言順可以向我報復!






芊芊就懶得理,繼續自己彈彈彈!







最後我哋彈到夠鐘先至停落嚟,大家都散哂!我工人姐姐仲話第二朝佢對腳痛到死


其實場裡面有把吊扇幾型幾得意!所以我都幫佢影張大特寫



臨離開前點少得喺門口度影番張「彈」起相呀!

下一站>>CLICK HERE!
【親子好去處】九龍灣 迪士尼花蛋出遊@MEGABOX



Photo by CANON 5D Mark III, Len | EF 24-70mm f2.8L USM

呀劍評分: 8分

呀劍評語: 有得彈真係好好玩,不過都係安全最緊要,一定要揀少人時段同好好一對一咁睇實小朋友!

BOUNCE 簡介

BOUNCE是一個獨特的空間-所有牆都可以成為地板、高難度的入樽動作都可以輕易掌握、地心吸力的物理定律也可以扭轉! 場內區分為不同的區域,無論是型仔型女、潮爸潮媽或潮B,人人都可以體驗飛躍的刺激感!甚至由花式跳躍至入樽、牆跑至閃避球大戰中加入更多不同的技巧,將飛躍帶到另一個層次。而最吸引的是無論你是5歲以下的小朋友或是正在接受訓練的極限運動迷,你永遠都不會因為太老或太年輕而錯失這些玩樂的機會!

地址

香港九龍灣展貿徑1號九龍灣國際展貿中心EMAX地下

入場費
$150

開放時間
Mon – Fri: 11am – 9pm Sat Sun/Public Holidays: 10am – 9pm

網頁

http://www.bounceinc.com.hk/

(以上資料更新至文章當日)




沒有留言:

發佈留言

Related Posts Plugin for WordPress, Blogger...