2016年2月21日星期日

【親子好去處】尖沙咀 玩具亭 Toys Stop @K11 x 林東鵬

K11呢個玩具亭都開始咗一段時間, 知道早排好多人好迫! 但係今日嚟到就好少人! 玩得超爽超讚!


我哋啱啱先喺玩具圖書館玩完搭港鐵嚟到尖沙咀

上一站>>CLICK HERE!
【親子好去處】銅鑼灣 玩具圖書館 Toy Library @中央圖書館 Hong Kong Central Library


向西鐵方向行就會經過K11玩具亭!

不過未入去之前就係港鐵K11入口前撞到有人表演音樂! 兩個嘢梗係好奇企喺度睇啦


兩個姐姐本來邀請小朋友去彈吓琴, 佢哋兩個咁怕醜就梗係唔肯啦

因為同場仲有兩個小朋友企喺度睇, 然後表演的姐姐拎出幾個小沙搥俾佢哋打拍子


唔駛講就梗係打唔齊拍子啦! 一個早一個遲, 總之一個「亂」字, 但係好可愛好攪笑



之後我哋聽姐姐表演多一兩首歌, 我哋就離開呢度向玩具亭出發

原來玩具亭所在就同上次藝術展覽既地方一樣(即係K11 art space)

我哋就咁穿過D-mop zone就可以到達

玩具亭時間係逢搭正就可以入去玩, 50分鐘後就完結一節, 有10分鐘清潔整理

當時我哋去到已經係5:40, 剩番10分鐘, 但係我哋都入去望一望先, 夠鐘後再出嚟排下一節



一入到嚟就有一個長長既木製火車玩具

同埋好多動物公仔擺設! 唔知芊芊喺邊度拎咗張上鍊雞仔...超得意



牆上面放滿咗玩具盒, 正正係下面擺放住既每一件玩具既箱子!

所以我估呢D玩具係Sponsor的!


入到去最裡面既閱讀區就已經差唔多夠鐘lu...所以我哋只好出番去排隊10分鐘再等下一節開始


好快就過咗10分鐘, 我哋再一次入嚟

安裝在入口的這個疑似糖果扭蛋機好過癮, 不過冇興趣研究佢點玩法


經過之前講既木製火車位置後就有呢個玩具廚房區

一個人都冇, 真係可以好盡情咁玩,

回想如果喺佢開幕嗰排嚟一定多人到不得了!


芊芊拎住頭先拾番嚟嗰隻雞放喺鉆板上, 唔係呀話....

佢真係砌砌吓菜, 一刀斬落隻雞度...笑死我!


頭先湊完BB 依家就入廚房準備煮飯, 睇嚟佢第日一定係個「慈母」! ^.^






佢哋兩個Skip咗另一個木製火車玩具區就去到最入面既閱讀區

另一面仲有個假石牆可以玩爬山!(全部係魔術貼的硬海綿)




呢個哥哥好似傻咗咁猛咁撞落度牆! 其實D海綿邊會夠力Hold得住個小朋友既體重

所以有D小朋友就好當怇砌積木咁玩!




喺呢個區域隔離無端端有個投影區, 將場內部份玩具拍咗條Stop Motion

睇睇吓見到芊芊手拎住嗰隻上鍊玩具雞! 所以佢好開心! (不過呢個區域我覺得有D無聊)


然後佢哋又去咗閱讀區睇咗陣書


跳跳紮嘅哥哥好快又離開閱讀區,去周圍碌!



相反芊芊就好有心機留低陪媽咪睇書....唔係,係媽咪陪佢睇先真


幾鍾意呢度牆上面嘅脹卜卜字


跟住先返番去火車玩具區坐低慢慢玩!





發現牆上呢張小告示好得意 "Free to play, NOT Free to take"



最後都玩到6:40, 仲有10分鐘就要離場清潔,我哋冇玩到最尾,因為我哋趕住去海旁睇馬戲表演!

下一站>>CLICK HERE!
【親子好去處】尖沙咀 文化中心 香港馬戲團「自在遊園・悠然自在」@文化中心元宵彩燈會


佢哋兩個離開前都要再一次跳上呢張大公仔身上碌嚟碌去...冇哂佢哋乎




Photo by CANON 5D Mark III, Len | EF 24-70mm f2.8L USM, iPhone 5s

呀劍評分: 7分

呀劍評語: 小小的玩具空間,行開尖咀嚟呢度Hea吓,真係幾開心㗎!而且人人有份,唔會話限制人數唔俾入,而且你miss咗一節,只要等10分鐘又再重開,快D去啦,到7/3就完㗎啦!

Toys Stop 簡介
尖沙咀K11商場由2016年1月9日至3月7日在藝術空間chi K11 art space舉行「玩具亭 K11 X 林東鵬」,場內放有創意玩具,免費讓小朋友和家長入內玩,只需在入口登記(父母姓名、電郵地址、電話號碼及小朋友出生年份),便可齊齊入內享受親子玩樂時光。
玩具亭內的4個區,分別是
玩具與劇場:展示以玩具創作過程中對世界的觀察和感受,再建構出動物場景、奇廚劇院及拼想世界,當中奇廚劇場放有煮飯仔玩具,必是小朋友最愛。此外,還有糖果機械人創作,只需在白紙上畫出機械人樣子,再交給工作人員,便能換取一個代幣扭出內藏糖果的扭蛋,而機械人的樣子是其他小朋友的創作呢!
玩築城市:一條八米長的模擬城市,讓小朋友任意創作堆砌
軟塑園:以軟雕塑作主題,參加者可在牆壁隨意貼上不同形狀,合組一個花園景觀
閱讀區:設有多組書櫃、枱椅和抱枕,讓小朋友和家長可親子共讀

開放日期
2016年1月9日至3月7日

對象

3至12歲的小朋友及其家長,親子活動

地址
香港尖沙咀河內道18號 chi K11 art space

時間

中午12時至晚上10時

費用

免費開放

(以上資料更新至文章當日)




沒有留言:

發佈留言

Related Posts Plugin for WordPress, Blogger...