2016年2月13日星期六

【親子好去處】大埔 林村許願樹 香港許願節2016

大年初六, 哥哥畫班放假, 但係鋼琴班照常,所以我哋照常陪哥哥學完琴之後, 就安排咗下晝呢個行程 - 林村!!!!


就連我三十幾歲人, 都係第一次去林村許願樹!

我哋等哥哥學完琴跟住搵婆婆飲茶! 食飽飽之後我哋就搭64K入林村

住開元朗大埔朋友都知64K真係好多個站, 所以我哋元朗總站上車搭足四十幾個站入林村

順便當俾大家瞓個晏覺! 瞓醒就落車...


入到村口就見到大大個「香港許願節」!

入口就已經係好多士多同埋攤位賣新年嘢!


真係超有氣氛! 呢個風車景好靚, 先同哥哥影番張相


好多寶碟呀! 不過唔啱我哋, 我哋許願免費唔駛錢, 只要祈禱就OK! 哈哈


呢度仲有幾檔望人睇相!


呢度成個嘉年華咁, 好好氣氛! 哥哥起先知道嚟林村就話唔駛嚟

佢話冇嘢玩...但係嚟到之後佢就同我講好鍾意!


之後我哋先去厠所同兩個小朋友放水先(個公厠仲要拎哂大獎...好勁呀」

係公厠外面有個大空地, 佢哋兩個好開心咁跑嚟跑去!


今日居然熱到咁, 兩個嘢都要除衫, 哥哥只係著住件短袖白底衫

加埋後面既旗幟, 十足十一個學武之人


有好多種唔同既方法嚟許願, 呢個「誠心鎖願」食字食得幾好

不過每個願你都先要去俾錢買!



嚟到林村先記得年初一既花車都係放喺呢度展出

突然高興起嚟! 因為每年年初一我哋因為要去拜年都一定唔會有得睇花車巡遊






之後再行入去有好多唔同既攤位! 好似自己行咗入花巿一樣!

行行吓見到有一檔賣鮮生果雪條既攤檔

唔知個老細係一早知道今日咁熱所以入定D雪條定係佢錯有錯著呢?

我哋買咗兩支! 一支菠蘿一支士多啤梨! 總共$60 老細真係賺到笑




兩個嘢每人拎住一支雪條食得超開心!


附近呢幾檔攤位遊戲就拍烏蠅lu...$40玩一次, 仲貴過去玩AIA, 又唔係一定贏, 我情願食咗佢算lu,



自從棵許願樹冇咗之後, 拋桔呢個儀式都由真桔變咗拋假桔lu!

$25一份! 寫上自己願望跟住拋上樹!

其實拋咗咁多上樹, 到第二日另一批人嚟拋咪冇哂位, 除非每晚都有人......(唔講喇都係)



我哋企埋一邊繼續食住雪條, 睇吓人拋上樹都幾開心

佢哋兩個又冇嘈住話要拋喎, 都算你哋幾乖! 只係影吓相就OK






佢哋仲Share大家唔同味道既雪條, 見到呢個情景就覺得好幸福!



呢度周圍都放咗d金元寶俾人影相, 但係都幾重架喎!!! 所以只好叫佢哋坐低影就算





嚟到呢個小小草地, 插咗好多支風車喺度! 我諗係俾人沿住條小路一邊行一邊轉吓個風車

轉過哂所有風車之後就寓意呢一年順風順水(如果本身過去一年冇咩事係咪就唔好轉呢?)


呢個招牌景點一定要影一影! 呢度有好多義工幫忙維持秩序同埋幫你影相! GOOD


沿住呢路一直行就可以行番出去入口那段巿集! 如果冇記錯好似呢條路有個名堂「許願廊」




出番林村門口檔士多食番碗豆腐花同燒賣魚蛋! (味道麻麻地)


離開咗林村我哋搭番64K落太和站走港鐵番屋企

但係突然諗起太和有間麥記裝修完所以去睇睇

下一站>>CLICK HERE!
【親子好去處】大埔 太和 麥當勞 家庭式旗艦餐廳戶外PlayPlace樂園



Photo by CANON 5D Mark III, Len | EF 24-70mm f2.8L USM, iPhone 5s

呀劍評分: 7分

呀劍評語: 林村真係好有新年氣氛, 如果再多D嘢玩多D嘢食就好, 下年有機會真係想再嚟多次!

香港許願節 簡介
大埔林村早在700多年前的宋朝末年,就已經有鄉人聚居。村裡的許願樹和天后廟是本地人與遊客祈福許願的勝地,於農曆新年時尤其熱鬧。 從前,每逢節日慶典,村民就會到許願樹前來參拜許願,並將寶牒拋到樹上。據說,寶牒拋得越高,願望就會越容易實現。然而,爲了保護許願樹,現在樹旁設置了仿真許願樹。來到這裡,您可以在許願寶牒上寫上姓名和願望,在樹下誠心參拜之後,將寶牒拋上仿真許願樹上。

地址
新界大埔林村

交通
1. 於港鐵大埔墟站A3出口乘搭64K或64P號巴士,在放馬莆站下車。 
2. 於港鐵太和站A出口乘25K號綠色小巴,在林村許願樹下車。
3. 於港鐵太和站A出口乘計程車前往。

電話
2638 3678

(以上資料更新至文章當日)




沒有留言:

發佈留言

Related Posts Plugin for WordPress, Blogger...