2015年12月21日星期一

【親子飲食】尖沙咀 Moomin Cafe @海港城 Harbour City

我細個時侯成日睇既一套卡通片「姆明」

估唔到相隔多年可以到佢既主題餐廳食嘢!


我哋啱啱喺尖沙咀碼頭落船, 由於搭咗成粒鐘佢哋兩個已經好肚餓

上一站>>CLICK HERE!
【親子好去處】維港 Aqua Luna 張保仔帆船


所以我就帶佢哋去最近既LCX裡面食嘢, 剛好見到姆明既主題餐廳

撞啱星期一又兩點幾唔多人, 我哋就決定喺呢度食個晏!


雖然冇咩人等位但係我哋都等咗10幾分鐘先有位


好在撞啱門口有個展覽區, 展示住好多玩具Figure! 佢哋就拎住相機周圍影唔駛企喺度呆等


餐廳隔離循例有個精品店等你食嘢之餘都入去濕平吓!



雖然坐唔到海景位, 但係都有個卡位坐冇咁論盡~


我問職員哥哥話點樣先可以好似人哋咁有隻大公仔陪坐

佢話我最好預先拎ticket既時侯講定! 不過佢問我要邊隻角色既時侯

我話無所謂, 最好有姆明啦! 點知唔夠3分鐘佢就拎咗過嚟俾我

雖然佢態度極其Cool, 不過都多謝佢



芊芊好開心坐喺BB櫈度隔離有姆明陪住佢

我先叫咗一個兒童餐俾芊芊食, 價值$88

同一般角色主題餐廳價錢差唔多! 不過我覺得如果個餐盆可以有D設計會好D囉


兒童餐配呢杯橙汁, 個杯就真係幾靚, 好想拎走佢...


之後好似發覺冷落咗哥哥咁, 所以搬隻姆明陪吓佢坐, 俾佢攬吓影張相

點知佢冇咩興趣, 一來佢唔識姆明, 二來姆明都唔識佢....如果係獸電戰隊可能佢會癲咗


然後叫咗個樹精拼盤(係雞扒飯配藍苺醬) $130, 我記得好似姆明餐(牛肉)貴$10

塊雞扒唔差, 真係焗得皮脆肉滑! 不過太鹹! 我諗咗好耐塊紅蘿蔔造型係咩....

依家喺相度睇番可能係「阿美」


兩個都食得開心, 好好食!



姆明你勞苦功高, 等我同你影番張Portrait啦!



叫餐+$30有杯牛奶咖啡, 我又係揀咗姆明造型! 我覺得好好飲

  
之後隔離枱走咗, 剩番張大公仔, 我就一手拎咗過嚟俾哥哥同佢影張相

我唔記得咗佢叫咩名, 有冇人可以留言話我知



臨近聖誕梗係要帶住頂聖誕帽影張相啦!


之後哥哥又將聖誕帽俾咗佢帶!


之後呢個「姆明之家班戟餐」到啦! 好靚好靚同好靚 (價值$138)

大家記住要快D同佢影相, 因為班戟上面舊Cream好快就會瀡落嚟 ^>^



起初我以為呢座塔只係裝飾, 原來裡面真係有得食

最高層係焦糖燉蛋


中間呢層係西柚啫喱


最低層係Mousse但食唔出咩味...食完都好飽好滿足, 但係用咗3百幾蚊!

下一站>>CLICK HERE!
【親子好去處】尖東 香港科學館 Hong Kong Science Museum




Photo by CANON 5D Mark III, Len | EF 24-70mm f/2.8L USM

呀劍評分: 7分


呀劍評語: 角色主題餐廳始終好睇唔係超好食, 我只會嚟一次咁大把, 所以希望呢類主題餐廳可以提高番食物質素同(質量), 唔好成日上菜見到都覺得唔會夠飽咁! 不過都好食過上次VCity間薯蛋頭先生餐廳!

Moomin Cafe 簡介
在日本創業已有11年的Moomin Café,為客人帶来自姆明的故鄉芬蘭的美味麵包和料理。 食物均以姆明故事中的登塲人物為主題,而店内寧靜沈着的氣氛,更讓客人可享受到悠閒的饗餐環境。 除了餐廳,店內還有大受歡迎的原創商品和自芬蘭進口的精品發售。 本店是咖啡店和故事周邊產品等要素組合在一起的多元空間。

地址
尖沙咀廣東道17號海港城海運大廈LCX 3樓32號舖

營業時間
Dining: 11:00 ~ 23:00 (last order 21:30) Goods corner: 10:00 ~ 22:00

電話
2730 0963

(以上資料更新至文章當日)



沒有留言:

發佈留言

Related Posts Plugin for WordPress, Blogger...