2015年12月21日星期一

【親子好去處】維港 Aqua Luna 張保仔帆船

如果中銀IFC係香港的地標, 咁張保仔一定係香港既「海」標

無論係寫住我愛香港既T-Shirt, 匙扣, 帽, 咩都好! 呢架紅色帆船就代表咗香港

今日終於可以登上呢架船啦!



每次經過海旁都會見到呢架靚靚既紅色帆船

哥哥都會話想上去架船度!

今日星期一小朋友開始放聖誕假

我就帶佢哋上船完成佢個小小心願!

  
早幾日我預先上網Book咗「維港探索之旅」http://aqualuna.com.hk/

套票包括咗中午12點到下午5點在指定碼頭登船無限次上落

我哋首先預早一個鐘到海港城逛逛, 到差唔多1點鐘我哋就去尖沙咀碼頭上船

上一站>>CLICK HERE!
【親子好去處】尖沙咀 Happy Playmas 展覽 +「Vida.Life.生活」Eva Armisén個人畫展 + LCX x Sticky Monster Lab「The SML Toy Shop 聖誕玩具樂園」+ 吉卜力精品專門店「橡子共和國 Donguri Republic」@Harbour City 海港城


我哋離開咗海港城跟住去到天星小輪渡頭問個職員「張保仔係應該邊度登船」

佢就同我講話係鐘樓隔離個碼頭上船, 點知去到發現有好多個碼頭.....滴哂汗

於是我唯有望住張保仔慢慢駛埋嚟, 睇吓佢停喺邊個碼頭先走過去



最後佢停咗喺3號碼頭, 我哋就即刻跑過去!

原來唔駛咁急, 佢哋每到一個碼頭都會俾足夠時間遊人落船上船

因為佢會到時用船速調交番到站時間


其實張保仔仲有其他套票選購, 有晚間遊同埋週末赤柱遊等等

至於呢個日間行程係每逢搭正由尖沙咀開出, 途經中環, 灣仔及紅磡碼頭, 歷時1小時不斷循環

最後於5點就終止在尖沙咀碼頭

我哋一上船之後職員就叫我哋上去上層安頓好!

上層擺放住好多張lounge bed, 我形容係好似古時人哋食鴉片瞓嗰種床...hehee!


佢哋上咗船之後真係異常咁興奮!

開心到走嚟走去不停咁影相! 見到船開動之後仲興奮

見到自己以往去過既地方, 好似中環碼頭, 新政總, 文化中心...等等! 就好開心


今日因為好大風, 所以船家只係開咗一個帆

在每兩張bed中間都放咗呢個小燈籠


今日原來天氣報告話係多雲有雨, 我本來都好擔心會濕淋淋上船會有危險

但係感謝神真係造美! 喺我哋航行期間仲出現藍天tim!


之後同佢哋落番去船頭度影吓相! 佢哋攤喺度吹住海風真係好舒服!



芊芊扶得好實, 驚自己會跌, 好攪笑!

坐多一陣佢已經叫住Daddy要我抱番佢


在船頭望番上去上層個lounge bed度!

上層右邊個房仔就係啟動船既地方


越行得出就越大風!! 真係「風起了」








我原本個計劃係諗住尖沙咀起行, 搭兩個站到灣仔碼頭落船去High Tea

但係佢哋因為太興奮之故, 唔肯落船!






所以我哋到咗灣仔碼頭都冇落船, 繼續向住紅磡碼頭進發!


船內都有小餐廳可以Order飲品同一D中式特色小食(唔平囉)



由尖沙咀到中環10分鐘, 中環到灣仔又10分鐘, 灣仔到紅磡就要20分鐘, 再番埋尖沙咀再20分鐘

個天越嚟越藍! 影相正到爆!


中途上船的外國人在船頭欣賞維港景

如果擔心既家長可以叫職員提供救生衣俾小朋友著住


太舒服啦! 哥哥都即刻要瞓喺度休息吓吹吓海風!










由灣仔去紅磡呢轉, 芊芊開始覺得搭得耐有少少扭計喇!


因為船上一直有播放住音樂, 所以哥哥跳起舞上嚟逗芊芊開心



小朋友就係咁...當發現架船仲未到站, 就開始發盧蘇話「點解咁耐都未到」「我好肚餓呀」

而我梗係有一早預先同佢哋講咗如果一直搭一個圈番尖沙咀要好耐好耐啦


跟住工人就拎出絕招, 朱古力零食等! 佢哋即刻開心哂



最後張保仔終於行咗一個圈番去尖沙咀落船



再見了! 唔知下次幾時我哋會再上嚟遊船河lu

下一站>>CLICK HERE!
【親子餐廳】尖沙咀 Moomin Cafe @海港城 Harbour City



Photo by CANON 5D Mark III, Len | EF 24-70mm f/2.8L USM

呀劍評分: 10分


呀劍評語: 我同好多朋友講, 原來佢哋都唔知原來呢架船係有得搭! 我最估唔到係兩個小朋友上到船真係超興奮, 起初我以為只係我自己興奮, 以為對佢哋嚟講都係同搭天星小輪差唔多! 所以雖然搭一次唔算平(所以訂呢個Package比較適合), 但係都值得體驗一次!

P.S. 其實仲有一架叫鴨靈號, 不過船家同我講鴨靈號始終係沉於大海多年, 撈番上嚟復修始終都係太舊, 而且佢架船比較細小唔係太適合小朋友

Aqua Luna 張保仔帆船 簡介
在香港維多利亞海面有一隻古色古香的帆船,擁有懷舊的外形,卻有新潮的室內設計,名字叫「張保仔」了。 「張保仔」有兩層高,長 28 米,船內有多張 lounge bed 配上 chill-out 音樂,遊客再呷一口送上的飲品,簡直是夏天寫意的享受,休息到餓的時候可到下層品嚐中式點心。

費用
維港探索之旅 harbour discovery tours Adults 成人: $130 / child 兒童: $90
逢週一至週五正午12時至下午5時,每小時穿梭於尖沙咀、中環、灣仔及紅磡,乘客可憑同日船票,不限時間地點,無限次上落

維多利亞港晚間航遊 evening cruise 成人: $195-285 / child 兒童: $155-220
張保仔航程為45分鐘的維多利亞港之旅,是不可不試的香港體驗,讓賓客一面浸研於香港歷史,一面欣賞海港美景。賓客登上晚上7:30或7:45之航班可欣賞全世界獨一無二, 雷射激光匯演 - 幻彩詠香江。登上晚上5:30或5:45之航班, 欣賞夕陽西斜, 緊接繁燈初起, 再來一口為此航班特別調配的雞尾酒。

赤柱週末航遊 stanley cruise ONE WAY adults: $250/ child $170 ; RETURN adults: $380/ child: $240
赤柱位於香港島南方,是一個深受遊客和本地居民愛戴的觀光好去處。赤柱市集內充滿著豐富多彩的店鋪,你可在其繁華的海濱咖啡館上享用午餐,也可參觀中國古代文化的天后廟和欣賞宏偉的殖民地建築物美利樓等。每週六及週日,傳統中式紅帆船『張保仔』必定可為你帶來愉快的旅程。

網址
http://aqualuna.com.hk/



(以上資料更新至文章當日)



沒有留言:

發佈留言

Related Posts Plugin for WordPress, Blogger...