2015年11月5日星期四

【親子好去處】太子 園圃街雀鳥花園(雀仔街) Yuen Po Street Bird Market

今日請咗日假可以接Hysan芊芊放學,我應承佢哋如果放學番到屋企可以快快做完功課就帶佢哋出街,所以佢哋唔駛15分鐘攪掂哂,我就帶佢哋去咗雀仔街睇雀喇!



唔知做咩事,哥哥一出門口就一路拖住呀妹隻手

話要好好照顧住佢!突然哥哥母性大發,我當然成全佢啦(因為平時冇幾可)

講講吓仲兩個攬埋一舊...(平時我唔喺度就成日打打殺殺,都唔知係咪咁醒專登做俾我睇



行到落街都一路拖到實!兩個仲對望好溫馨咁笑,直程當我冇到!

哥哥仲叫我唔好拖芊芊,俾佢自己一個人拖住喎



仲周不時扮哂細心咁幫芊芊撥吓頭髮

根本芊芊個頭都冇污糟!









好喇好喇,知道你哋兩個好愛錫對方喇

我哋向住旺角大球場前進,好快就嚟去到雀仔街喇



我哋終於嚟到門口啦!大一個大大嘅牌匾喺度寫住「鳥語」





完全無視我...一影完張相哥哥就拖住芊芊自己行入去

一入到去已經有好多雀仔喺度不停叫...

仲有好多店舖仲未閂門,回想我自己都有十幾廿年冇嚟過



D雀仔好靚呀!仲靚過以前喺元朗公園見到嗰D雀仔

雀仔身上D顏色好似畫上去咁靚



我一路睇一路諗緊唔知第時自己老咗會唔會都手拎住個雀籠玩雀呢?

好似D呀叔咁拎住去飲早茶睇報紙


過多兩檔,有幾張大鸚鵡企咗喺鐵架度

佢哋唔駛用籠困住,只係腳上面鎖住條鏈

佢哋兩個好大膽行到好近D鸚鵡

我就一路好小心咁睇住驚佢哋激嬲鸚鵡去啄佢哋




最大隻係呢隻傳統藍黃色鸚鵡啦

佢哋行埋去鸚鵡一轉身條尾都差D Fing到佢哋塊面



呢隻個頭毛都豎起哂,唔知佢係咪好嬲呢?

芊芊你唔好行咁近好唔好




見到伯伯喺度餵雀仔,佢哋兩個都睇到入哂神

覺得好新奇!哥哥仲一路嘈住話要買番一隻養

我叫佢養番掂自己隻「波兒」(金魚)先啦!因為佢依家都冇打理佢,只係交俾工人姐姐處理

所以我一定唔會贊成俾佢養呢樣嗰樣



呢隻個樣超攪笑!佢瞌埋咗對眼

但係睇落去好似笑緊咁樣,巧打耳呀!



呢個時侯芊芊都突然眼瞓起上嚟!

唔好呀!頂住呀!仲要番屋企食晚飯㗎



再睇多陣行咗個圈我哋就番轉頭lu...

喺佢哋放學嚟咗個短Trip都幾好開心呀!

我同佢哋講,話依家住得近可以第日再嚟探佢哋!佢哋知道後就好開心







Photo by CANON 5D Mark III, Len | EF 35mm f/1.4L USM


呀劍評分: 7分


呀劍評語: 建議連埋花墟同金魚街一齊行,小朋友必定開心極了!對於閒時只得半天時間去不了遠的地方玩,這裡實在係一個不錯嘅選擇!

園圃街雀鳥花園 簡介
前身位於香港旺角康樂街,由於素來是雀鳥及雀鳥飼養用品店的集中地,因此被喚作為雀仔街。

開放時間
每日上午7時至晚上8時(但係我哋呢日去只係6:30都開始收檔)

地址
香港旺角嘅康樂街

網址

http://www.lcsd.gov.hk/tc/parks/ypsbg/index.html

電話
2302 1762 (辦公時間內)

(以上資料更新至文章當日)





沒有留言:

發佈留言

Related Posts Plugin for WordPress, Blogger...