2015年11月29日星期日

【親子行山】馬騮山、石梨貝水塘及九龍水塘

一路都想帶兩個小朋友去行山,遇啱今日天氣真係秋高氣爽(好老土),我哋揀咗一條又近又方便又短既行山路線嚟行 - 就係馬騮山啦!


我哋今朝落街食個Brunch之後大約11:40去屋企斜對面等81巴士

諗都冇諗過住喺巿區, 居然搭4個站巴士就可以有得行山


真係話咁快就落車, 只係坐咗10分鐘度4個站就到

一落車已經見到好多人同.....馬騮

以前以為只係得城門可以見到馬騮

原來呢度都有超多!! 隔離個停車場一隻二隻馬騮爬咗上人哋D私家車度



一落車會見到有個小食亭, 如果想補倉的話可以喺度入番少少貨

行完山又可以喺度歇一歇!

我哋未開始出發既時侯見到有幾個南亞裔朋友剛落的士

佢哋將個膠袋就咁放咗喺路邊(裡面有水有嘢食)

唔駛三秒成袋已經俾馬騮搶咗去

但係跟住其中一個男人佢拎起支樹枝想扮打佢

點知令到隻馬騮發惡....我梗係即時帶佢哋走開D啦, 廢事傷及無辜!

我覺得你俾佢搶到係自己唔小心囉, 冇得怪馬騮! (因這是他們的天性)



我哋見到有好幾隻塊面係紅紅哋, 有D係全紅....唔知係咪嬲緊

所以都咪話唔驚, 如果一個唔覺意俾佢睇中撲埋嚟, 其他馬騮又跟住過嚟抽水就大鑊!



遠距離同馬騮仔影番張相先(兩隻馬騮一齊合照)



今日我哋選擇咗條最易行又最多嘢睇既路線(難度1粒星)

長源路 → 九龍副水塘水壩 → 九龍接收水塘 → 石梨貝水塘 → 金山路 → 九龍水塘水壩 → 返回大埔公路。




出發前影番張相先, 睇吓同行完之後有冇大分別



行山必備: 執樹枝! 正所謂「有咩依郁, 乍住碌竹!」

兩隻嘢當然就喺度鬥執支長樹枝啦!





行咗無耐大約3分鐘度, 就會見到右手邊有條路上燒烤場

我哋從左邊繼續行

因為實在太多馬騮, 所以我哋停喺呢度影吓相!

溫馨提示: 大家千祈唔好餵嘢食俾佢哋, 因為你只要餵一次, 之後佢就會跟住你唔肯走







呢隻應該係我哋見既最細版本mini monkey!! 超可愛, 好打耳呀!



再行前少少又有分叉路, 今次要靠右邊行啦! 



好快就行到我哋第一個景點啦, 就係九龍副水塘水壩

望落去真係好高好高好高好驚呀!







呢個水制房牆上面有獨特既花紋

聽講話其他水塘好少會見到, 所以要特別同佢影番張相留念





呢度表示水塘係由1929年興建, 到1931年完成



水壩邊的小瀑布



盡頭回望水壩



上山數分鐘便會見到一個緊急救助電話



再行前少少就會見到右手邊有梯級

離開長源路行上去就會見到呢個有鐵絲網既引水道入口

呢度有個牌寫住「起點」...唔通仲有好長既路要行, 開始有少少擔心唔知要行幾耐







沿住引水道向上行, 邊行邊解釋咩叫水壩俾Hysan知



仲要解釋D同個水壩冇關既嘢....(滴汗)



再行見到有個緩跑徑既牌! 



沿路行左手邊係九龍接收水塘, 真係好靚好舒服!







過埋呢條橋大家就要小心! 因為行前少少就會見到右手邊有條石級行上山

(我就係冇留意所以一直向前行.....不過都有意外收穫!)




第1個收鑊就係落咗去水塘邊欣賞呢個咁靚既湖景!



第2個收鑊就係行到去呢個咁大既松林嗰度執松果!! 超大粒超靚...





跟住我哋繼續向上行, 發覺咁耐都未見到石梨貝水塘個水壩開始覺得自己行錯路

好在途中還到其他行山人士, 所以先攪番清楚, 最後行番轉頭上番頭先我講個條右邊石級!


其實如果我一直行頭先條路都會行到去石梨貝水塘既另一邊(不到水壩)

但係路程會再多1小時以上, 怕兩個小朋友支持唔住

沿住石級一直向上行, 途中佢哋發現唔同既樹木, 親親模模這個大自然





行行吓終於望到右邊既石梨貝水塘水壩!! 行啱路啦



見到呢度唔好左轉行石級上去...繼續右轉就見到水壩入口





到咗呢個時侯我先鬆番啖氣...好驚行錯路攪到唔知幾耐先出番去





呢個水壩又係高到嚇死人

我鍾意佢係藍色欄杆,影起相嚟顏色都靚D





橫過水壩之後向左轉沿小路繼續前進





途中發現靚靚蝴蝶...




唔夠5分鐘就會見到有條小樓梯可以行落去

樓梯旁你會見到有把大間尺

佢係用嚟量度水位嘅,最高水位應該係10m

依家正值秋冬天氣雨量比較少,所以水位連1都唔到

佢哋拎住樹枝篤水底嘅泥沙,咁都有得玩一餐





水塘遠處有一個小型水壩,但係佢係分開兩邊,冇得越過去對面








繼續直行3分鐘就係頭先我哋遠處見到的那個小水壩



的確係行唔到過去,要從另一邊小路先可以行過對面,但唔明這個設計有何用







我哋冇嘗試行過對面,因為都行咗差唔多2個半鐘頭(因為之前行錯路),小朋友都好攰

所以嗱嗱淋行埋落去完成行程就走人



離遠見到九龍水塘!





落到山終於又再一次見番D馬騮啦

呢個綠色嘅大籠係用嚟捕捉馬騮㗎

點解要捉佢哋?因為怕佢哋繁植得太快,所以會捉部份去做絕育手術



在附近發現呢個咁有趣嘅雕刻!



終於嚟到九龍水塘嘅水壩

呢個水壩好特別俾Scroll Down兩張相嘅時間你諗吓特別喺邊度?




開估啦,個水塘就係彎㗎啦!多數見過嘅水壩係打直嘅,比較少數係彎曲的!




風景真係好靚!





見到呢個咁特別嘅數字一定要同老婆影番張相

但係影完佢都諗唔起個數字有咩特別!(其實係我哋結婚嘅日子10月19日)



離開水壩再行大約10分鐘,行過九龍水塘的另一個小水壩

最後就出番去大埔度見到巴士站!

我哋好快就上咗巴士,只不過係坐番4個站我哋就番到屋企lu

喺樓下嘆番個超級正下午茶先...! yeah









Photo by CANON 5D Mark III, Len | EF 24-70mm f/2.8L USM


呀劍評分: 10分


呀劍評語: 一個離巿區不遠嘅行山景點,有馬騮睇,有3、4個水塘水壩睇!只係大約要2個鐘就行畢全程,可以咁樣親親大自然!點可以唔拎滿分

路線簡介
本路線以馬騮山為起點,該處是觀看猴子的最佳地點。整條路線難度低,長度短,既可飽覽石梨貝水塘、九龍水塘、九龍副水塘及九龍接收水塘的美景,又可間中遠眺九龍的高廈,是一般人較易接受的短途行山徑之一。


路線
長源路 → 九龍副水塘水壩 → 九龍接收水塘 → 石梨貝水塘 → 金山路 → 九龍水塘水壩 → 返回大埔公路。

長度

約2.6公里

難度

★ ★ 

需時

約兩小時

起點交通
乘搭九巴路線81或72號,於石梨貝水塘站下車。

終點交通

跟起點一樣

(以上資料更新至文章當日)






2 則留言:

  1. 你既旅遊記錄真係做得好好,我睇住跟住,知道多左好多地方可以帶BB去玩!

    回覆刪除
    回覆
    1. 多謝你呀! 希望你繼續支持呀劍萬帥, 叫多D朋友like我哋個page
      www.facebook.com/kimfamilytraveltips

      刪除

Related Posts Plugin for WordPress, Blogger...