2015年11月8日星期日

【親子好去處】中環 香港禮賓府 Government House

知道今日係禮賓府嘅開放日,今朝一早起身整裝待發(好老土)一行四人向住中環出發,希望可以喺禮賓府見到齊昕...哈




我哋喺港鐵中環站K出口上到地面過對面馬路

穿過滙豐總行去到聖約瑟教堂往上行

已經見到有好多慈母拎住塊牌「往禮賓府」指引巿民去禮賓府


我哋沿住下亞厘畢道去上亞厘畢道

途中經過律政司中心(幾靚,唔知有冇得開放俾人參觀呢?)



見到兩支旗干同埋警察叔叔

佢哋指示我哋往對面馬路由禮賓府嘅後花園進入







唔好以為要行好耐,其實都只係10-15分鐘嘅路程

呢條睇落好似山路嘅山路,其實行完呢條直路轉個彎就見到禮賓府

兩兄妹手拖手行上去好開心!





見到呢個寫住排隊區嘅牌就即係到咗啦

門口前要經過一個簡單嘅檢查,開一開袋俾保安人員檢查



我哋即刻係門口嚟個快閃影相先

(影嘅時侯俾職員姐姐趕話唔好阻到後面上嚟嘅人)

其實根本勁少人...我起初以為要排好耐隊先入到嚟



入到去一路上都係睇花睇花同埋睇花

早知叫埋嫲嫲嚟啦,佢咁鍾意花!

不過又真係幾靚嘅!有好多品種喺出邊都唔係咁容易見到









其實沿途有導賞服務,不過導賞員都係主要幫助公公婆婆多

一邊行一邊介紹花!

我反而想導賞講吓梁振英瞓邊間房咁

穿過花園嚟到個停車場,呢度攞放咗洋紫荊章嘅私家車喺度

仲有一個係電動車,俾Hysan知道呢架車係用電,唔會噴黑煙嘅好環保



我哋身後嘅就係禮賓府啦!我同齊昕嘅距離越嚟越近啦

(如果佢喺屋企嘅話)

轉個彎之後有個急救站(佢唔係擔心有公公婆婆行完花園會見暈卦)

之後沿住樓梯行上去就係禮賓府嘅花園啦





一上到嚟就係個噴水池,左手邊係庇理羅士女子中學學生喺度演奏樂器

右手邊都係一D冇人睇嘅展板講吓禮賓府嘅歷史咁



喺學生演奏隔離呢個咁Colorful嘅花圃好靚

不過都係真花靚過上鏡

喺呢張相睇都唔夠現場睇嗰陣咁正





我哋喺呢度聽咗佢哋演奏,佢哋兩個聽到唔願走...

但係唔知做咩拉咗首超慢嘅歌

企喺我側邊D師奶不停話「有冇攪錯,邊個幫佢哋揀首咁嘅歌拉都有,聽到人哋想瞓覺」

我心諗「咁你仲企喺度聽...仲唔走」



然後我哋開始踏入禮賓府啦

行咗幾級樓梯,轉角見到個石麒麟(我估係卦)

但係芊芊一眼見到就話佢係Fox...

芊芊你睇錯啦,係狼先啱!雖然狐狸同狼都差唔多



在禮賓府外有呢個好歐陸風嘅小亭園

感覺好舒服好悠閒!不過都欄住咗唔俾人行過去...



一入門口右手邊就係飯廳

唔知佢哋係咪真係會喺裡面食飯㗎呢?

門外放咗個展示牌可以用QRcode睇到有關呢個飯廳嘅介紹





左手邊就係會客廳

平時農歷新年嗰D短片係咪就喺度拍呢!?似係似係



再行入嚟就係禮賓府嘅大廳,不過就只限於此

周圍都欄住咗只有直入直出

叫做入嚟涼吓冷氣咁

超英式嘅建築,住喺呢度好似住咗喺博物館咁,怪怪的!



那邊廂有幾個警隊嘅交嚮樂隊坐喺度演奏

但係因為要一路向前行嘅關係,所以喺度影咗張相就出番去

(突然同芊芊玩起上嚟)







成幅清明上河圖呀...其實我唔識,只係見到有張畫咁拉長就當係...

因為又係欄住唔俾行過去,所以咩畫我都睇唔到





同支港旗影番張相先!

嚟睇嘅人好多都係港人喎,我附近聽到嘅都係廣東話





離開咗禮賓府係門口外面影番張相先

門口外都仲有兩三個展牌喺度





出到嚟見到好大個花圃,仲有用花砌成嘅GOVERNMENT HOUSE字!

呢度一望望哂所有金融大廈...中銀...匯豐...渣打...俾所有高樓大廈包圍住

其實都個View都唔係真係咁靚,好有壓逼感





最後離開前梗係要同呢個禮賓府影番張相啦

影完先見到有個牌寫住另一度先至係影相至靚位



又係喎,有D花花草草喺後面墊一墊個禮賓府係靚D喎

跟住媽咪不停叫我搵人幫我哋影番張全家幅...

但係我周圍望都見唔到後生仔,呀叔就大把....好在都搵到個,咔嚓

呢個係一個好好嘅回憶...跟住直接過對面個動植物公園進發Yeah






Photo by CANON 5D Mark III, Len | EF 24-70mm f/2.8L USM


呀劍評分: 7分


呀劍評語: 對於未去過的我,禮賓府都幾陌生,旅遊價值就冇乜㗎啦,不過未去過始終要去一去,鍾意花嘅朋友就會特別開心,我呢D龍友就只希望嚟見識吓,同埋諗住可以見到梁齊昕嘛!heee....

香港禮賓府 簡介
香港禮賓府自1968年起首次開放以來,每次都吸引很多市民和遊客前來參觀。每逢杜鵑花盛開時舉行的開放日更是盛事,參觀者除可飽覽滿園春色,還可欣賞糅合了東西方文化精粹的建築設計。

開放時間

不對外開放(除開放日外)

地址
香港島半山上亞厘畢道

交通

1. 從港鐵香港站B2出口,沿民耀街步行至中環怡和大廈,搭乘12號巴士,於香港動植物公園站下車。 
2. 於港鐵金鐘站C1出口的金鐘太古廣場外搭乘23或40號巴士,於紅棉道香港公園下車。下車後經過香港壁球中心及聖約翰大廈,再橫過花園道至美國領事館,香港禮賓府就在隔壁。 
3. 從港鐵中環站K出口出來,穿過滙豐總行大廈後,再橫過皇后大道中至花園道,沿花園道步行前往。 

網址

www.ceo.gov.hk

電話
2878 3300


(以上資料更新至文章當日)





沒有留言:

發佈留言

Related Posts Plugin for WordPress, Blogger...