2015年10月25日星期日

【親子好去處】粉嶺 香港哥爾夫球會 第57屆「香港高爾夫球公開賽」UBS HONG KONG OPEN 2015

今次呢個行程要多謝Hysan!

因為佢個同學仔嘅媽咪有飛多送俾我哋,成全咗我哋呢個哥爾夫球之旅

今日係第57屆「香港高爾夫球公開賽」,原來呢度都有好多嘢玩㗎喎!


今日如常早上番咗主日崇拜,然後就同媽咪SAY拜拜

(因為我呢個偉大老公想俾媽咪喺屋企休息吓)

無錯就係得我一拖二去咁遠玩

我哋飯都冇食(因為食咗個好飽嘅早餐)就直接喺尖沙咀搭東鐵去上水站

落車之後我直接搭的士唔駛跳錶就去到香港哥爾夫球會


到去裡面就先派咗張咭俾我

拎住張咭可以入到去免費獲贈一頂帽

佢哋兩個第一次見到哥爾夫球車好興奮

話要同架車影番張相先






沿路嘅環境都好靚好舒服

而且周圍都係外國人

覺得自己好似變咗名「流」紳士


終於行到去入口

首先一見到嘅係一個好大嘅哥爾夫球場

原來一陣間呢度就會開始一個公開賽

不過我哋唔識欣賞住

都係快D入去睇吓有咩玩好



嘩已經離遠見到坐滿哂人

大家都喺度等開場!



後面D球星真係一個都唔識

佢哋兩個喺度扮人哋打波個姿勢真係勁攪笑



再轉個彎入穿過幾間餐廳

見到有個小小嘅球場俾大家入去參觀

裡面有俾小朋友或大人試推桿練習嘅地方

仲有多個沙地

小朋友當自己去咗海灘咁喺度玩沙


終於攞咗頂帽啦

佢哋兩個帶咗帽之後又幾靚仔靚女喎

不過帶落芊芊個頭度又真係幾大頂唔啱佢帶


呢度有個好啱Hysan玩嘅地方!

就係畫畫嘅地方一個Kid's Corner

佢哋兩個即刻坐咗喺度畫起畫上嚟

姐姐俾咗佢哋各人一張紙

可以喺上面油顏色,佢哋仲好比心機油tim...



呢度有好幾個姐姐負責,佢哋好有禮貌都安排得好好

見到有D本顏色斷咗仲會走過嚟幫手刨番好佢



係呢個藝術區隔離(即係我頭先有講嘅Golf Zone)

在入口附近就已經有一個俾小朋友試打嘅地方啦!

只係得兩個小朋友排緊隊

俾叔叔教完之後真係打得似模似樣!

但係打多兩三次之後Hysan開始又冇耐性

只係諗住希望快D打到個波

所以企位姿勢已經全錯!好似喺度掃地咁






芊芊唔想玩所以睇埋哥哥玩之後

兩個一支箭咁衝咗入去玩沙lu...





哥爾夫球場嘅草地真係好靚

直接瞓落去超好玩

於是我同佢哋兩個玩個遊戲鬥快碌過嚟我度!

但係芊芊唔夠哥哥快同埋碌到轉咗彎唔知去邊,跟住就大喊!



喺另一邊有好多贊助機構嘅攤位,有賣衫有賣車...

我哋都走過去玩吓!但係全部小遊戲都係同哥爾夫球有關








呢度呢個咁粉紅嘅攤位,原來係礦泉水嘅攤位,

幾位靚姐姐喺度教佢哋點玩呢個遊戲

最後芊芊同Hysan都分別贏咗一份小禮物

至於另外一個遊戲要拎住兩條繩

然後將個乒乓波放喺條繩上面碌落去

要中是但一個位置先算係贏

當然我落埋場都攪唔掂...真係太難玩






去到另外一個汽車攤位,遊戲係玩哥爾夫球障外賽

Hysan因為身高關係佢拎住支棍都仲係調轉手勢

好似去掃地咁樣!(亮點:職員姐姐全程都悶到捱住個牆企,好敷衍咁讚哥哥「好叻喎,再試過!)

但係因為呢度嘅禮物已早派完,所以只係玩玩冇獎品!



放喺出面嘅呢個車好靚

哥哥自己主動要求要同架車影相

影完車頭影車尾!



喺餐廳隔離仲有個直播區

有一個大電視供大家睇現場進行緊嘅公開賽

大家坐喺呢個貌似吹氣嘅梳化椅上面嘆住啤酒一路睇



穿過Canteen仔係一個超大超大超大(x N次)嘅大草坪

小朋友爆開心跑跑跳跳,瞓地碌地,執樹葉,搣樹皮是常識吧!



幸好正遇上另一個家庭要求我幫他們一家四口合照

所以我都叫佢還債幫番我哋3個影張相

點知個衰仔遮住我!好在之後都影番張好嘅用嚟做Cover!










我哋喺大草坪悠閒咗好耐!跟住最後番過去頭先個Kid's Corner度玩人體彩繪

其實只係畫大花面!呢個哥哥居然主動吹我快D番去畫面

記得佢上年我哋去台灣嘅時侯,有蠟筆館佢死都唔肯俾人畫

最後只係畫咗喺隻手度!

今次佢居然肯俾個姐姐兜口兜面咁畫落去

仲有第二個估唔到係 - 當我哋等緊畫花面貓既時侯, 因為妹妹同時又好想快D過去玩沙

跟住我就同妹妹講要等埋哥哥畫面先得

跟住哥哥居然話「你照同芊芊過去玩沙啦, 一陣我自己畫完過嚟搵番你哋咪得囉」

嘩....咩事, 突然咁大個仔!!! 我係咪可以退休啦




佢問我應該俾姐姐畫咩好

本來我諗住叫姐姐幫佢畫超人

不過我擔心佢畫得唔似,跟住諗起最近屋企多咗條波兒

所以就叫佢自己同姐姐講話要畫金魚



最後製成品 - 金魚水裏跳出來

最後兩個喺沙度玩玩玩到日落...

然後再上埋去草地上面試吓感受吓真正打Golf嘅感覺!

哥哥打極都打唔到入洞,佢眼睇好容易但係親手打嘅時侯係另一回事

正正俾佢學到好多時眼見同親身感受係兩回事















最後我哋差唔多5:00就離開

行番出去乘搭總會預備的穿梭巴士去番港鐵站


Photo by CANON 5D Mark III, Len | EF 24-70mm f/2.8L USM


呀劍評分: 9分


呀劍評語: 今日真係意外收鑊,本來還覺得有點遠而且一拖二諗住放棄,點知比我想像中舒服好玩,遊人唔多,環境幽美,小朋友可以接觸到Golf! 仲有周圍嘅人都好靚好型!真係上等人玩嘅遊戲,正正正!下年有機會要再嚟

香港高爾夫球公開賽 簡介
「香港高爾夫球公開賽」是香港體壇歷史最悠久的比賽,也是亞洲頂級的職業高球賽事之一。這項比賽始於1959年,歷屆選手猛將如雲,包括九位大滿貫賽事冠軍(九人共囊括27項重要賽事的冠軍)得主。 Source: http://www.discoverhongkong.com/tc/see-do/events-festivals/sports-and-recreation/hong-kong-open-championship.jsp#ixzz3pb7Sl9iq

地址
粉嶺香港哥爾夫球會

開放時間
日期: 2015年10月22日至25

交通
港鐵上水站有免費穿梭巴士直達

電話
3626 8604

(以上資料更新至文章當日)





沒有留言:

發佈留言

Related Posts Plugin for WordPress, Blogger...