2015年10月18日星期日

【親子好去處】彩虹 恐龍主題 坪石遊樂場 Ping Shek Playground

最近朋友見我去咁多兒童遊戲室/遊樂場玩,所以推介我呢個地方 -坪石遊樂場!一個以恐龍化石為主題嘅兒童遊樂場

今日如常喺教會離開,依家轉咗番緊尖沙咀

因為又未係太肚餓所以我哋直接打的去咗坪石遊樂場


大概用咗15分鐘度我哋就到咗(差唔多$60)



呢度除咗個兒童遊樂場之外仲有網球場,足球場同藍球場!

我哋先走過嚟望一望個地圖,俾小朋友認識吓點樣睇地圖先



跟住佢就拖住妹妹一路向兒童遊樂場進發



嘩見到個遊樂場啦

佢哋兩個第一時間就跑咗入去玩

呢個時侯都係大約1:30度

遊樂場裡面只得2-3個人

周圍都有恐龍嘅裝飾

連每條柱都油上紅蕃圖案






一個人都冇佢哋任跑任跳

冇人同佢哋爭,不過係曬咗少少



呢度有架有搖搖船

芊芊坐咗上去之後

哥哥搖到佢好驚即刻要落番嚟




呢個都算係遊樂場嘅景點之一

一大條恐龍瞓咗喺度!

佢哋兩個好有耐性唔怕曬爬咗上去俾我影相





遊樂場嘅另一邊係瀡滑梯同埋一D化石設施

沿住隔離呢條施轉樓梯行去可以到其他球場





我好快咁行咗上施轉樓梯

佢哋兩個即刻搵唔到我



呢度有個大山洞

小朋友就最鍾意走入去匿埋!

但係跟住又要大嗌話番俾你知佢喺個山洞裡面

小朋友就係咁天真



山洞裡面都唔係求求其其喎

連石牆上面都有恐龍化石嘅石紋









玩完化石嚟到瀡滑梯呢邊!

呢個就係坪石遊樂場嘅焦點

傳聞大家都係為咗呢度而嚟

就係呢個小小升降台啦

個升降台會自動升到上層

然後小朋友可以企上去,按住小朋友嘅體重有唔同速度下降









過咗半個鐘頭,開始有好多其他小朋友嚟到玩

個升降台都已經開始出現人龍!



咁大粒恐龍蛋!

仲有咁大隻蚌...好多粒珠....





呢度有個超安全韆鞦!

我記之前喺鰂魚涌公園都有見過


跟住呢個仔開始玩起伏匿匿上嚟

不停叫人匿埋或者叫人捉佢

呢個地方真係好大

用嚟玩伏匿匿真係好爽

而且又唔怕小朋友會行到好遠(只要同佢講好只在這兩個範圍玩)











喺韆鞦呢一邊有一度恐龍彩蛋牆

我叫佢哋兩兄妹爬上去坐喺度俾我影相

真係超靚!



嘩嘩嘩!我叫佢哋Kiss,點知兩個同時聽我講變咗互咀!



之後同佢哋中場休息

上咗去散步行吓去吓厠所飲吓水





等緊媽咪同芊芊,哥哥手腳都係唔停

見到有咁多block喺度都要行吓跳吓爬吓!

真係冇時停,this is a boy!



跟住我哋行番頭先講嘅施轉樓梯落番去遊樂場

原來上面有咁多恐龍牙!定係角?





瀡滑梯呢度有個吊橋凸出嚟

哥哥喺度un un un又喺度整到呀妹驚驚!

真係超級衰!攪到呀妹又喊啦



之後哥哥又一尾話要玩伏匿匿

但係我同媽咪都想行去未到過嘅地方

所以佢就嬲起上嚟!然後俾我罰咗佢唔準玩要坐埋喺一邊

妹妹好天真咁走過去陪哥哥坐

跟住問「哥哥 做咩坐咗喺度?」





好啦,哥哥明白後收拾心情

我哋行多兩步過嚟呢個喇叭陣!

不過唔知係我唔識玩定係佢壞壞哋

我哋試哂咁多個喇叭又向住佢講又換過放隻耳仔過去聽

但係都係咩都冇,如果有人去過又玩過請留言請教吓小弟!





然後發現旁邊有個超大嘅鑊

成個人造衞星咁!

在大鑊嘅中央有個一個簡單嘅圖示

原來鑊有兩邊,彼此對住

只要向其中一邊的大鑊細細聲講嘢

對面的鑊會聽到對方把聲

真係好神奇,隔咁遠都可以聽到把聲





跟住最後我哋番去瀡滑梯玩同埋陪哥哥玩番一陣伏匿匿等佢滿足番

喺呢個時侯本來打算差唔多走

點知接到兩個表弟喎!超開心即刻再玩多陣又影吓相







最後我哋選擇向彩虹港鐵站方向行番落山

只係行10分鐘度就可以落番去地下

而且仲好近港鐵站A出口

呢度實在係一個世外桃源,值得再嚟!







之後我哋就搭地鐵出發去觀塘幫哥哥買個單車頭盔啦

【生活點滴】觀塘 JollyMap 快樂地圖 一站式兒童戶外玩樂、遊戲用品專門店




Photo by CANON 5D Mark III, Len | EF 24-70mm f/2.8L USM


呀劍評分: 9分


呀劍評語: 真係遊樂場中之霸!如果你話現代化嘅遊樂場已經不及當年我們的氹氹轉鐵皮瀡滑梯,咁我覺得呢度真係可以同當年遊樂場有得Fight,並唔係因為佢懷舊,而係新得嚟keep得住好玩

坪石遊樂場 簡介
坪石遊樂場佔地約3公頃,場內設有多種康樂設施,包括籃球場、七人足球場、網球場、緩跑徑及兒童遊樂場等。其中兒童遊樂場的設計以遠古恐龍時代為主題,配合仿古化石與圖騰裝飾,使兒童仿如置身於「恐龍歷險世界」,坪石遊樂場設有三個主要出入口,分別可從坪石邨、彩雲邨及彩德邨進入。


地址
粉嶺香港哥爾夫球會

開放時間
7:00-23:00


交通
港鐵彩虹站步行約7分鐘

電話
2324 4302


(以上資料更新至文章當日)





沒有留言:

發佈留言

Related Posts Plugin for WordPress, Blogger...