2015年7月11日星期六

【親子好去處】大埔滘自然護理區 大埔滘螢火蟲生態夜遊

今晚我同Hysan去探險!簡直係期待而久嘅活動,就係夜探螢火蟲,「再見螢火蟲」你就睇過,真嘅螢火蟲你又見過未!


今日除咗我同哥哥之外,

仲約埋住我哋隔離既鄰居2大1細一齊去

我哋差唔多下晝5點先出發

剛好 Hysan 上完畫畫班,

我同佢喺附近食少少嘢當晚餐

然後鄰居開車嚟接埋我哋出發

我哋差唔多用咗半個鐘頭多少少

就去到大埔滘自然護理區




因為綠色廣場負責人約了其他參加者於大埔墟站等

所以我哋就先到,喺呢度等佢哋!

小朋友梗係周圍跑跑跳跳




現場其實已經有好多其他團體,

同埋昆蟲攝影最好者喺度周圍影

跟住有人發現到一隻螳螂!

我同埋小朋友都即刻走埋去睇

嘩!佢個頭真係三角形架

其實昆蟲真係好靚

當你近距離睇,你更會發覺呢個世界好大

好多美好事物你都可能未發見過





轉過頭,又有一班人喺度影蝴蝶!

呢隻蝴蝶起初喺我哋附近飛,

我哋都唔理佢,當佢普通蝴蝶咁看待

因為佢嘅顏色唔靚

但係成班發燒友居然又趴低又瞓低咁去影佢

話佢隻翼上面有好多隻眼,

我哋睇真D...咦E!原來係真架喎



都差唔多7:10,天色開始變黑

負責人同其他參加者陸續嚟到

首先負責人同所有參加者點人數

今次活動只係每人$60,

唔似得外面旅行社 D Local Tour,

收你幾舊水成朝帶你遊山玩水食海鮮

夜晚先嚟睇螢火蟲

而且佢哋好均真,全部都係現場收費

唔會話預先入數報名


佢哋一開始同大家有簡介

負責人真係保育專家

佢字裡行間不斷重覆又重覆

呼籲大家唔好影响生態大自然

雖然我哋帶咗電筒,但係都叫我哋盡量唔好開

然後每人派一張紅色玻璃紙

包住電筒出光位置

因為佢話昆蟲對強光好敏感

如果較紅燈光會冇咁影響昆蟲活動

同場有小朋友夾住盞紅色閃閃燈係後領防止走失

有D就縛住支額頭專用電筒,

好鬼死專業!

講解完畢我哋就出發啦




越行就越黑,

最後黑到咩都見唔到,

只係靠個月光照路!

之後我哋繼續前進,

途中睇到好多唔同種類嘅昆蟲

長話短說,大家睇吓相啦!

(呀劍絕非昆蟲攝影家,只係靠 Hysan 支弱雞電筒,所以盡咗力影架喇)


見到竹節蟲喺度交配好得意呀

我發現騎喺上面個隻似係公,

但係點解隻乸咁大隻既?

唔通係「魯芬」竹節蟲?



呢隻又似草蜢又似曱甴

好流線型! 超有型



我最鍾意呢隻!

因為隻顏色好靚, 有少少晶瑩剔透, 身上甲殼有少少似犀牛皮!


呢隻飛蛾犀利啦

我哋個個望咗好耐都望唔到

佢扮樹葉樹皮扮得好似!


沿路見到小蛙蛙, 

佢貼住條木一路都唔郁, 好得意!

一定要影到番去俾芊芊睇!



用另外一支有紅玻璃紙既電筒照佢!

大家望吓佢對眼係可以掹大D

所以大家千祈唔好用強光照佢哋影響生態呀

(利申: 上面好光嗰D相係其他團友照架!)




去到荷花池, 聽到好多好多蛙蛙叫聲!

俾我哋搵到一隻青蛙!

呢隻係大D既蛙蛙

我等咗好耐先影到佢谷大個腮咋





呢度又見到另外一隻蛙喇!

佢身上既紋都好靚...

大家有冇留意到蛙蛙身後既好似烏蠅既嘢

可能佢正想逃走...如果俾青蛙見到實冇命!



呢大家繼續向上行,

領隊話要上去一個小湖度先會有多少少的螢火蟲

行行吓領隊又照到特別的昆蟲叫我哋睇

都唔明點解咁黑佢都可以睇到有昆蟲! 勁


佢話呢隻叫「長尾水青蛾」

連佢都話自己好少見到,

佢見到嗰陣都好開心!


佢話有分藍藍地同粉粉地紅色兩種

我哋之後都見到隻藍藍青青的!


最後我哋上到去小湖度都見到5-6隻螢火蟲! 

其實沿路我哋都周不時見到螢火蟲, 

不過都係一隻咁大把

原來螢火蟲分兩大類,

一類在水邊(七八月),而另一類會在草叢間飛舞(十一月)

其實睇螢火蟲好似睇緊天上星星咁

只不過係地上唔係喺天上

佢哋數量唔多

可能係剛打完風又或者生態確實俾人破壞了

負責人話好多旅行社 Local Tour

好多時就不斷用電筒照,好多人好嘈,仲有領隊要用大聲公講解,

所以真係買少見少

所以大家真係要保育

如果唔係到我哋抱孫嗰陣

呀孫仔孫女真係冇機會見到架啦!


Photo by CANON 5D Mark III, Len | EF 100mm f/2.8L Macro IS USM


呀劍評分: 9分


呀劍評語: 好多團購同旅行社攪嗰D生態團,一係就成朝帶你遊花園,去吓呢度嗰度,去流浮山食海鮮,去大棠荔枝山莊摘荔枝,一係就去根本你平時都可以自己去嘅敬輝農場同埋紅磚屋,最後夜晚先至係帶你去睇熒火蟲,仲要帶你睇嗰個唔知乜水,可能只係旅行社嘅一般卜!今次搵到綠色廣場主辦的活動,只需$60,仲有專業人員帶隊講解,仲超哂時唔怕OT咁帶你睇昆蟲,你話去邊度搵!

大埔滘自然護理區 簡介
大埔滘特別地區,在大埔滘村附近。對大自然特別有興趣的人,包括自然學者和生物學家,以及需要清靜而未受破壞環境的人,該區早已成為他們常到的地方。該區本來稱為大埔滘植林區,那是指停車場附近溪流的陡斜集水區內四百四十公頃樹木,樹林自海拔五十米伸展至海拔六百五十米的草山山頂 。


地址
大埔滘村附近

費用

$60

網頁
http://www.afcd.gov.hk/tc_chi/country/cou_vis/cou_vis_cou/cou_vis_tpk/cou_vis_cou_tpk.html

交通
於大圍鐵路站總站乘九巴72A至松仔園站,步行5分鐘即達入口

主辦團體

綠色廣場

網頁

http://hk-green.com/

(以上資料更新至文章當日)





4 則留言:

  1. 請問點樣報名?
    有無資料可以email俾我essohk1030@gmail.com

    回覆刪除
    回覆
    1. 不好意思,現在才看見你的留言
      你可以到這裡看最新的活動 http://hk-green.com/activity/08activities.htm
      (內有聯絡資料)

      刪除

Related Posts Plugin for WordPress, Blogger...