2015年6月20日星期六

【親子好去處】長洲 Cheung Chau

今日係端午節,我哋一早就約好咗大舅父要到長洲睇佢比賽!

其實係近三年我哋每逢端午節嘅指定動作



今日因為呀芊發燒所以今年只有我同Hysan出發

我哋都冇特別話安排好幾點起身出門口,

因為始終係放假,都想輕鬆D

早上大舅父就話Wtsapp我知佢大概12點幾比賽

我哋10點幾就先落街食個早餐先

我哋去咗「開心小敍」,

呢間本來位於元朗雞地嗰邊既茶餐廳,

居然喺我樓下附近開咗分店,

佢哋最出名係豬扒煎蛋飯,不過我我哋嚟食早餐

就嗌咗個豬扒煎蛋通,

豬扒確實係好味,其他嘢就普通囉




Photo by iPhone 5S

食完之後我哋就到西鐵站搭西鐵

去到南昌轉東涌線到香港站,

之後就沿天橋行到去5號碼頭搭船去長洲啦



行行吓Hysan話「Daddy你電腦個蘋果呀」





我冇特別睇過船期,

真係諗住去到碼頭先算,

我一去到係11:40,職員話快船12:00開,

我哋就Do咗入去先,因為好多人

點知未到12點,就可以上船,滿座就開船了




在船上的Hysan好興奮,睇到大海大浪大船!

今日天色真係不錯,仲好熱Tim





Hysan望住個海突然問我

Hysan「Daddy, 點解D浪係白色既?」

我「...」



我哋差唔多12:20就落船了

都有一年冇嚟過長洲,

今日好熱鬧, 但人唔算太多! (可能對香港人嚟講仲早)









有大大粒魚蛋呀! 不過用電煲十吓十吓既咖喱魚蛋CircleK都食到啦

等我一陣介紹你哋喺邊度食大大粒魚蛋啦






我哋第一時間去唐記搵大舅父先

因為佢哋呢隊獅藝龍既龍舟隊,

年年都會喺呢度打「櫈」!

幸好大舅父仲未落場,

佢俾其他人玩先,自己要到2:40先比賽!





所以同舅父玩咗陣,睇吓其他隊伍比賽

跟住我哋就周圍行吓食吓嘢影吓相






沿途經過報到處, 放咗好多個獎杯喺度, 好壯觀呀!


呢個平面既戲棚牌好得意!


我哋行行吓,見到有間賣豆花的小店,

就先停下來補充吓體力先

見到佢有自家製「純鮮奶魚仔燒」,

於是買$20/4件支持吓

老細話佢哋呢部係全港唯一一部自動烤魚餅機

凍豆花$12碗,

不過唔係咁鍾意佢用膠碗,

一來冇咁有特色,二來好唔環保

我都明洗碗人工依家好貴...










之後見到一大棑檔廚房後吊住一隻隻雞,

Hysan見到好攪笑! 叫我影低一陣俾舅父睇


去到後面公園仔, 又撞番大舅父喺度熱身喎



之後一邊行一邊見到好多特色小店

如果同老婆一齊就會逐間逐間慢慢行

跟住見到有間賣自製雪條既餐廳,

賣$8/支,可惜只賣剩椰子/蜜瓜/奶茶及咖啡味,

所以Hysan揀咗支椰子,我就揀咗支奶茶

佢係用不銹鋼器皿去急凍,

好似我哋細個自己用果汁整的雪條一樣

奶茶雪條有點甜,唔知可唔可以叫佢整多款係少甜既雪條呢!

椰子味濃,真係超爽!天氣咁熱食番條止止熱都OK







最後一啖因為驚雪條跌, 所以大大啖放落口,

凍到彈起!


繼續向住沙灘方向行, 有其他特色小店,

如果冇Hysan喺度, 我諗我間間都會入去試吓



行行吓俾Hysan發現到有燕子!



喇喇喇, 嚟到呢間大大粒魚蛋啦!

其實喺長洲你會見到好多檔賣緊,

但係呢檔先至係最正宗的!

所以千祈唔好去錯檔,

不過我哋飽飽哋, 晏D先番嚟幫襯你!


如果唔係十番熟佢, 我真係想食吓粽應吓節!


嚟到呢度又有一間豆花刨冰, 下次要試試!


向沙灘方向行, 無端端有個好藝術既地方!



跟住再向住沙灘方向行,

當然唔少得係嚟食扭扭薯片啦,

好似嚟到長洲唔食佢唔似嚟過,

不過自己食過咁多次反而想試新嘢

所以買咗一支大薯棒再加多一支大蝦棒

都係各$20!

不過大蝦棒就有點失望,

佢其實都係炸蝦,一隻點上沙律醬,另一隻就點上泰式甜酸醬,

冇咩特別,而且炸蝦皮仲唔夠脆!好似擺咗好耐咁





每次嚟長洲都會入去睇但係唔買嘢既「棉花公司」同埋「賣藝」



經過長洲戲院, 見到佢圍哂板, 我諗係咪就嚟會拆呢?


之後睇時間都差唔多到大舅父上場,

我哋就行內街番去唐記

跟住發現一間店nitti-gritti

係我之前喺巿集認識過的,

所以入去打個招呼,

裡面賣既嘢都好有特色,

有部份物品係購至土耳其等其他國家!

所以唔會咁容易喺其他店舖見到㗎!

最近Hysan架單車撞爛咗個呤噹!

咁啱見到佢哋又有得賣

$58雖然有點貴

但係都懶得去單車舖配,

所以就買咗,等Hysan可以自己維修!











行行吓又想食冰菠蘿,

不過見到有個仲吸引,係小冰西瓜!


我哋番到去現場,見到大舅父要落場了!

準備要開始了,我同Hysan坐在碼頭邊,

要為舅父打打氣!

賽事開始了...



結果我就唔提了...因為被封口唔講得,總之冇嬴到啦!

雖然輸咗,不過唔緊要!大家至在開開心心過一個端午節

所以最後嚟張大合照!

這樣也可以讓Hysan學習,比賽輸咗都冇所謂

俾佢知道「志在參興」既道理


跟住我哋就成班一齊去東灣沙灘玩,

中間經過頭先既大大粒魚蛋

我就買咗一串再加一串龍蝦搭芝士丸食

真係好好食呀!皮脆肉厚!芝士丸爆出嚟好香,龍蝦丸落足料

總共承惠$25





去到沙灘,Hysan玩得好開心,

俾大舅父掉落水,嗌哂救命!笑死我

成班龍舟隊落哂水飲啤酒,好開心!





玩玩吓水, 同舅父走咗去摸蜆!



仲有好多靚姐姐陪Hysan玩

我都行埋一二邊等佢慢慢玩!


一個浪準備打落去Hysan塊面度!



Photo by CANON 5D Mark III, Len | EF 24-70mm f/2.8L II USM

差唔多5:30我哋就番去碼頭

買咗麥記買咗個魚柳飽餐,

邊食邊等6:00快船!好精彩既一日

番到屋企Hysan行行吓都同我講「Daddy, 我今日好開心!」


呀劍評分: 9分


呀劍評語: 去離島本身就已經係一件開心事,雖然去到都係行吓食吓,但係當你去咗一個島上面個心情係唔同咗D,今日天氣非常熱,但係有得睇大舅父爬龍舟,又有得周圍行食吓嘢!最後落埋水,係幾爽既!長洲東灣泳灘幾乾淨, 只係太多人, 如果你唔驚鯊魚, 可以行遠少少非防鯊網範圍游水, 最後我哋番埋屋企食埋粽當晚餐仲更加一流,最緊要係應哂節嘛!

(以上資料更新至文章當日)



沒有留言:

發佈留言

Related Posts Plugin for WordPress, Blogger...