2014年12月31日星期三

【親子旅遊】台北宜蘭 DAY4 菁桐 平溪 十分 蜡藝彩繪館 湯圍溝公園溫泉魚SPA 筑翫溫泉旅館

經過三日兩夜既台北行程, 我哋今日要同台北Say BYEBYE! 我哋今日包咗車, 係整個行程既第一天包車,今日我哋一早先向十分出發, 下晝再去蠟筆館玩, 然後直接到礁溪溫泉旅館!


上一站>>CLICK HERE!

[親子旅遊] 台北宜蘭 DAY3 MAJI MAJI 集食行樂


我哋在Just Sleep食過早餐後, 就帶埋行李上車, 向住十分進發,

途中經過101大樓, 番到香港先後悔點解唔叫李叔叔停一邊, 讓我們來個合照!

差不多用了一個小時我哋終於到了菁桐,

菁桐是全條平溪線的最終站,

我們打算到菁桐玩, 然後到平溪, 最後到十分點天燈!

先在景點影番幅相先!



其實大家如果冇包車, 想感受一下乘火車的經歷, 都可以到瑞芳站買飛

先於台北車站乘坐莒光號(50mins)/自強號(45mins)到瑞芳車站(NTD$62),

買平溪線一日週遊券($54)或每程計(當然全日票會比較抵)

搭30/50mins到達尾站的菁桐 (註: 平溪線每天有34班車往返)

*註「平溪線一日券」於103年7月暫停販售,改賣「平溪深澳雙支線一日周遊券」,可以當日無限次搭乘平溪線、深澳線,票價64元。

不過時間就係金錢, 如果還要排隊買飛, 又要等車, 可能沒太多時間玩,

所以我們才包車, 只乘搭平溪到十分一程火車就足夠了

平溪線的火車, 很耐先有一班, 所以小朋友們很盡情在路軌上玩!





當然我都唔會離開佢哋太遠, 因為有火車到就要快快叫佢哋行開

台鐵官網

佢哋好開心喺度玩石頭!

看見他們這麼簡單自然, 有些時侯大人也要向他們學習一下





突然見到呢棵樹好靚, 係楓葉嚟架, 喺香港好難見到咁靚, 

更重要係冇人圍住棵樹同你爭住影



行入呢條街有好多商舖, 好多地道小食, 仲好多名信片同埋都有少量天燈舖頭

不過我哋當然等到去十分先至放! 那些年嘛!



本來在菁桐有個鐵道文物館, 點知咁唔好彩佢裝修喎!

今日係2014年最後一日喎, 應該係旅遊旺季,

佢居然揀呢段時間裝修, 唔係卦!!!!

之前網上睇人哋D相, 有隻大郵差公仔可以影相架嘛...係有....殘D囉

本來有得寄木板明信片架嘛....依家又冇.....SOSAD

唯有同個郵筒影相啦! (呀芊唔肯上鏡)





你睇吓後面, 裝修喎 (好激氣所以要強調多次)

口痕.....「郵差叔叔送信順屬迅速送出......」





之後行前少少有個竹林, 係俾人許願既竹筒林!



楓葉真係好靚呵!!



又行番上條路軌度玩!

今日天氣好好, 好到好曬! 連日嚟都冇落雨,

起初未嚟之前仲諗緊如果成日落雨咁點算.....

小朋友見路軌指定動作......行路軌

無錯, 記住大個都要跟住條路軌行, 唔好學人出軌呀





一家四口影番張Shadow Selfie先



我哋選擇由菁桐站步行去平溪, 再由平溪搭一站火車去十分

李叔叔會在十分等我哋!

沿途經過好多民居


遠處見到有隻旺旺狗, 想行埋去睇, 點知狗狗真係行過嚟,

即刻驚到走夾唔抖!!!



喺香港隨咗去火車博物館之外, 好少機會可以咁瞓喺度

可以瞓D平時唔會瞓到幾地方真係有種好自由自在既感覺

但係如果俾你日日都咁瞓喺度就慘了



行行吓, 下一班火車嚟啦...哄隆哄隆, 小朋友望住好興奮!



人字合一!!!



好自在咁周圍跑, 正是小朋友要的東西! 

香港這狹小的地方, 真的很難滿足到

喺屋企跑跑跳跳就俾媽咪鬧, 其實唔係佢哋唔啱, 只係屋企太細

所以有時間要多帶小朋友到空曠地方走一走

QUALITY TIME....即使放工只有半個鐘, 我都盡量帶他們到公園走一走!



鍾情於這款電燈柱, 好有日本味道!!



越走越唔對路, 點解行咗咁耐都未到平溪...唔通行錯路

但係沿路一直都冇分叉路

之前於網上睇別人分享都係話15分鐘就可以行到平溪站!

我結果行咗差唔多30分鐘! 浪費了很多時間耶!!!!!

不過一家人這樣行行聊聊天, 卻是不錯!





終於行到嚟平溪啦! 隱約地見到條彩虹!!



行入去平溪老街前有個寫住「平溪天燈」既藝術裝置喺度,

又可以影番張相!


\

有陣時小朋友未必鍾意吓吓都企定定望住鏡頭俾你影

呢個情況下你可以叫佢跳起影或者扮鬼臉都係一個好方法



因為媽咪想同Hysan一齊寫Postcard寄番香港,

所以我哋揀咗一間舖坐低咗, 店的對面正好係賣嘢食,

係時侯醫吓個肚! 係芝士菜肉飽! 似乎在飽上放了一塊芝士

然後一同放進蒸爐裏, 再拎出嚟凍卻就凝固了!



Hysan話好好食!! 一個有芝士香味既菜肉包, 都幾得意幾好食!



我哋揀咗一間小店入去坐低寫吓明信片

裡面都有好多特色既擺設

呢個年代既小朋友都未見過要撥既電話,

我諗佢哋會問點解電話會咁大部



另外都買咗串肉腸俾呀芊食!

行咗咁耐終於有得食啦!



最意外的頭先個位滿身是塵的郵差叔叔公仔, 居然呢度都有

仲要係全部, 你睇佢條頸仲圍住啵啵膠!



媽咪好用心的寫明信片, Hysan見到都興奮地揀咗一張去寫同畫!








我同妹妹梗係周圍行吓, 原來向住火車站行上去, 都有其他寄明信片既地方, 

呢個放在度門外的郵箱好靚好得意呀, 點可以唔同佢影張相先





我同芊芊行一陣又番去睇吓媽咪佢哋, 

見佢哋未寫完又出去行一陣

如是者過咗45分鐘, 真係趕唔切下一班火車啦, 

如果趕唔切我哋要等好耐先再有

於是跑跑跑, 就跑到上去, 見到火車埋站啦!

幣啦幣啦, 趕唔切啦, 諗住打定輸數,

呢個時侯我褲袋居然穿咗個窿, D銀仔跌到一地係,

我一邊執一邊跑(都唔知點形容)

點知原來火車會停一至兩分鐘, 

於是我就即刻去買火車飛, 職員見我哋好趕,

就同我哋講上咗車先同買飛(原來可以架喎)

終於上到車, 我都未驚完! 

後尾先發覺, 其實如果真係趕唔切班車, 我可以叫李叔叔番嚟接我哋 ^^





車廂內有冷氣好舒服, 一D都唔知舊車, 

唯一特色係車廂內有個圓閧門把車座位分隔開




Photo by iPhone 5S


落車啦, 我哋到咗十分! 好多人好逼

不過離開車站後, 雖然多人, 不過都唔夠旺角多

我哋靠一邊街行, 沿途好多特色小食

中間都生咗一段小插曲, 我買咗雞捲俾Hysan食,

但係佢驚妹妹會食哂佢, 所以唔想請妹妹食

所以就俾我鬧咗一餐

估唔到除夕呢日嚟放天燈都會俾我鬧!









最後我哋揀咗一個店嚟放天燈, 

天燈有好多唔同顏色, 

每隻顏色代表著不同的運程

如健康, 學業, 財運, 愛情等等...

我哋唔迷信既, 就當然揀D顏色靚靚既嚟放啦

講到呢度, 好唔開心!! 

(因為旅程完畢後, 記憶咭被Overwrite了,  其餘十分及蠟筆館的照片都沒有了)








話說我哋放天燈後, 到吊橋散步, 

然後就坐李叔叔車去礁溪了, 不過我們先去冬山蜡藝館

但好可惜所有照片都沒有了

只餘下少許電話拍下的短片



這張相是蜡藝館內的姨姨替我們畫的彩繪!


玩完番到去礁溪都差唔多7:00, 我哋先到旅館(筑翫) Check-in 

然後再坐李叔叔車, 佢介紹我哋去D好啱香港人口味既地方,

其實我嚟得呢度希望食地道味食, 不過唔緊要啦,

都夜了, 是但搵個地方食就是了

結果去了一間食日本嘢的地方, 貌似「五十嵐」的地方, 有拉麵烏冬刺身等!

食物價錢都尚算OK! 本來打算去樂山溫泉拉麵,

一邊浸腳一邊食拉麵

不過有朋友話好普通, 好似喺香港食味千拉麵咁,

同埋又驚多人, 話哂都係除夕

所以就冇去啦! 都係快D食完番去休息

李叔叔好好, 其實佢已經可以收工, 但係佢知道我哋想玩煙花

我哋又唔知邊度有得買, 佢載住我哋周圍搵,

最後搵咗兩三間終於買到, 仲唔駛我俾番錢,

佢話送俾我哋, 嘩! 真係咁好既包車去邊度搵,

大家一定要幫襯佢, Add 佢 Wechat 就得架啦, 佢 Account 叫「李崑玉」 


Photo by iPhone 5s


Photo by iPhone 5s

食完嘢我哋周圍附近再行吓,

食咗礁溪好出名既「花生捲冰淇淋」

好有特色! 味道都係預期中一樣

食到周圍係好呢Hea都係預期中一樣


Photo by iPhone 5s


然後去咗湯圍溝公園溫泉魚SPA

$60一位, 我期待咗好耐要嚟俾魚仔咬腳皮啦!

感覺真係好痕, 不過係忍受到的!

哥哥同芊芊真係皮膚滑滑,

所以冇咩魚過嚟咬

我就成對腳都係魚仔


Photo by iPhone 5s


Photo by iPhone 5s


我哋食完嘢番到旅館同佢哋沖埋涼就瞓覺喇

我哋兩公婆上咗去天台的露天溫泉浸一浸,

跟住一齊倒數準備迎接2015年啦

而且仲有意想不到的驚喜


下一站>>CLICK HERE!
[親子旅遊] 台北宜蘭 DAY5 農夫青蔥體驗農場 三星花海



Photo by CANON 5D Mark III, Len | EF 35mm f/1.4L USM

呀劍評分: 10分


呀劍評語: 今日係2014年最後一日, 行程揀今日放天燈真係一流, 希望大家許既願都可以實現少少...大家記住菁桐要乘搭火車, 不要選擇步行, 其實大家可以考慮唔去平溪老街! 因為很細冇咩行!
同埋最好去埋九分食嘢, 選擇全日行程會比較好! 至於蜡藝館都值得去, 不過大家最好安排於另一天的行程內, 因為我失了預算由十分到冬山也需要差不多用了2個小時, 幸好還來得及參與導賞!

蜡藝彩繪館


開放時間

8:30 ~ 17:00(毋需預約) 
逗留時間:1.5小時 
導覽時間: 09:00、10:00、11:00; 13:30、14:30、15:30 
周一至周日皆無休館 

消費

NTD$200(可抵館內消費100元) 年滿3歲入館者皆須購買門票才可入場. 

公共交通工具

1. 火車:請於冬山站 或 蘇澳新站下車後轉計程車至本館,車程時間約15分鐘。 
2. 公車:首都客運、葛瑪蘭客運、大都會客運請至羅東站下車後可租機車或轉乘計程車 ,車程約25分鐘。
3. 羅東站轉乘國光號公車,可搭往清水、岳明新村方向公車至龍德工業區站下車,步 行約10分鐘抵達本館。


(以上資料更新至文章當日)




1 則留言:

Related Posts Plugin for WordPress, Blogger...