2014年8月31日星期日

【親子好去處】大埔 林村 樹屋田莊 Tree Top Cottage

今次我哋既目的地係樹屋田莊, 今日天氣好好, 仲好熱tim! 

樹屋田莊,一聽個名就估到呢度有得玩飛天繩索之類既歷奇Game啦!



其實呢個地方我之前未聽過, 我係有一次在網上撳吓撳吓, 唔知撳咗去邊, 

就發現30/8有個開放日, 佢係一年一次, 平時係要有20個人團體先可以去玩, 

所以把握今次機會, 個朝早我都想早少少起身去, 

但係因為老婆唔識去, 佢要去銀行攪少少嘢, 結果等埋佢先出發, 

在64K巴士站等埋佢先一齊搭車, 結果到達都11點幾就12點, 所以已經好多人!




今次只係帶Hysan嚟所以容易D安排, 老婆去排隊, 我帶Hysan去周圍參觀同玩D唔駛排隊既嘢, 

我哋去小賣部買咗包魚糧俾佢去餵魚, 其實同好多餵飼動物一樣, 

買既人其實好戇居, 要俾錢佢, 仲要幫佢餵埋等佢唔駛做! 

大家都係為咗俾小朋友體驗一下, 所以冇辦法!



因為太多人排隊,唯有同樹屋影番張相


之後又玩吓攀石, 又玩吓繩索咁, 

因為天氣太熱, 所以去買咗雪條同嘢飲, 順便去睇吓老婆排到未, 點知仲未....






所以再周圍影吓相, 等咗好耐好耐, 真係好耐, 終於有得玩, 

咁辛苦排到, 我哋就同職員講, 我哋2個大人排, 俾2次小朋友玩啦(其實大家都係咁), 

職員見大家咁辛苦都冇所謂, 因為小朋友都著咗威也裝, 所以順便玩多次仲好! 

Hysan開始好驚話唔玩, 點知玩完之後話好想再玩多次!









最後我同老婆嘗試分頭去排多個活動, 但係無奈條隊太慢, Hysan都好睏, 

因為佢要5:00去畫班, 所以我哋放棄咗, 

其實我對呢D排超耐隊先玩得少少既地方真係冇咩好感, 

所以我希望下次可以搵埋其他朋友組團一齊去! (下圖)睇佢個樣就瞓著!!!


Photo by CANON 5D Mark III, Len | EF 35mm f/1.4L USM

呀劍評分: 9分


呀劍評語: 呢個分數係唔計今日, 因為實在太多人, 而裡面有好多唔同既設施可以玩, 唔同一般的遊樂設施, 吊哂威也安全扣咁, 俾小朋友有另一種刺激感受, 只可惜平日只可團體訂購, 20人才能成團, 每一年只有一次開放日(即係我呢日), 每個設施要排成粒鐘先有得玩! 怕怕, 特別讚一讚, 小賣部的汽水, 雪條, 冰菠蘿等, 都唔算太貴! 只比巿區貴$1-2!

呀劍貼士: 廁所唔太方便去, 但至少唔太臭, 都係濕濕淋淋隔空去咁囉! 記住夏天去真係要做好防曬裝備, 如果要排隊等飛天真係未到你都已經曬死!

樹屋田莊簡介
是一個很原始又充滿創意的地方, 一支樹枝、一條繩索都可建構無限可能性。大埔林村「樹屋田莊」便讓大家回歸原始生活,大大間樹屋建於擎天巨樹上,爬上樹後不但可眺望優美景色,還能考驗各位膽量;同場仲有橫水渡、飛天繩索等DIY歷奇活動,玩完保證大家泰山上身!

地址
大埔林村新塘下村26A2

交通
從大埔墟鐵路站或元朗(西)總站乘64K號巴士或從大埔墟(懷仁街)乘25K號專線小巴
在林錦公路,看見「根記農場」或「新塘」巴士站下車

網址
http://www.treetopcottage.org/

特別注意
<<樹屋歷奇>> 這一項活動將於 2014 年 10 月 5 日起 進行大維修, 完工日期暫定為2015年4月初, 工程期間其餘活動均可照常進行.



沒有留言:

發佈留言

Related Posts Plugin for WordPress, Blogger...