2014年8月25日星期一

【親子好去處】大嶼山 貝澳

貝澳最出名就梗係摸蜆啦, 不過依家好多人都開始識得愛惜生態環境, 所以建議大家都係惜可而止, 要食都係去街巿買啦!



今次同呀仔去既地方係貝澳! 分享行程之前要提大家如果你都想去的話記住之前去天文台個web度睇吓潮退時間


今日吃過了lunch後到已經差不多2點了,原本今天想帶哥哥到貝澳玩,但係老婆唔係太舒服,

同埋如果帶埋妹妹芊芊去又太過麻煩!而且當時又已經2點幾,覺得好似有D晏...

不過最後都係決定咗剩係同哥哥2個人入去!


Shutter Speed | 1/2000 s
Aperture | f/2.8
ISO/Film | 100

其實大家往往一家大細去家都要有好多考慮,或者覺得時間不太許可,

其實當你決定咗要去,整個行程又未必係你想像中咁遠,

我哋由石狹尾MTR起程,於美孚跟老婆同妹妹say bye!

之後我同哥哥就到荔景轉東涌線直達東涌站,差唔多用咗30分鐘


由於今日打算casual去,冇咩預備,只係帶咗哥哥一條泳褲同要更換的一套衣服,

之後在東涌我先去7仔買番2支水,然後行去搵車搭,上網睇過係要轉乘3M巴士,

但係朋友俾咗2個的士call台電話我,我諗住搭的士入去,早D玩,走既時侯先搭巴士,

點知由於星期日太多人,的士call台唔接生意,叫我自己去的士站搭(其實我都唔知點解,可能D車出哂,因為得50架,又或者太塞車,的士情願唔做貝澳生意),

當我打算去搵的士站既時侯,問個巴士司機,佢都叫我放棄的士,叫我去排3M隊,

當我去到巴士站,嘩...多人度唔知龍尾係邊,個陣我問哥哥,仲想唔想入去,因為會好辛苦,排隊排好耐,又曬(我估個陣有34度),


但係佢堅持好想入去玩,但係當時都3點幾,我諗好多人可能係呢個時侯就會放棄唔去,

但係我不嬲都有種冒險精神,同埋我覺得就算最後「唔入好過入」都好,我覺得bad experience都係對小朋友係good既!

於是我在排隊過程中做好各樣預防措施,搽太陽油,入水,遮太陽...

可能因為實在太多人的原故,巴士公司安排了特別車3R(只入貝澳,原本3M係去貝澳+梅窩),

仲要去到隊頭附近,因為車還有少量位,但係排在前面的都係一班朋友,所以佢哋上唔到車,結果我哋排咗唔夠10分鐘已經上到車

上咗車之後好快就到咗啦,只需15分鐘,

跟住一路行3分鐘度就到咗士多,跟住用$5(連$20按金)租一個耙,同埋$32買咗D玩具掘沙俾哥哥!

一入到去哥哥就即刻跑到去最前個度玩泥沙,我就試吓徒手掘蜆,

原來比我想像中容易掘,最緊要快,因為我懷疑D蜆feel到有隻手掘緊佢識得走,

真係差唔多3-4分鐘就可以掘到一隻,當然唔會好大粒,如果我有著泳褲我就走出去水深處掘了,你睇吓人哋個D幾大隻



下面呢張先係我哋既 (掘完放咗佢哋啦)


跟住哥哥又好想自己掘到,但係又要我幫佢,我幫咗佢掘又話呢隻係我掘唔係佢掘,

於是我就要做戲掘到個陣要hold住隻蜆,等佢伸手過嚟拎,就當係佢掘咁!


因為有好多人掘咗唔同大細既洞而又離開咗,所以我哋就去霸佔人哋掘出既池,當自己私家泳池咁,


最後佢再玩多一陣,差唔多5點我哋就離開啦, 離開既時侯都係喺番落車個位度等,

我當時出去就大概有10-20個人排緊隊,因為當日係假日,所以佢哋都知多人就安排咗好多架車,

唔駛等太耐,10分鐘度就可以上到車啦!當然最後Hysan就攰到係全程地鐵瞓咗啦!


Shutter Speed | 1/2000 s
Aperture | f/2.5
ISO/Film | 100

Photo by CANON 5D Mark III, Len | EF 35mm f/1.4L USM

呀劍評分: 8分

呀劍評語: 又有水游又有蜆摸,正到痺,而且個灘好乾淨,當然係遠咗少少,但係今日咁多人去我都係排10﹣15分鐘就上到車,真係冇諗過,當然你可以平日去就更好!冇咩劣評

呀劍貼士: 記住做好防曬措施, 唔單止係怕係海灘玩會曬傷, 更係為咗排隊等巴士個陣曬親!

大嶼山貝澳簡介
位於大嶼山南部的貝澳,最適合初滑浪學者來試水,在夏天遊客總是絡繹不絕。沙灘附近設有多間異國風情的餐廳,外國人比本地人多,令你有置身於外地的感覺。海灣更提供了不同的水上活動,如滑浪板、獨木舟等。沙灘上有水上活動小店、更衣室及沖身處,更有政府提供的免費營地及公眾燒烤場地,共有52個營位,而且是看日落日出及星星的好地方。遊客更可帶備相機,拍攝雀鳥生態。

潮夕預報
http://www.hko.gov.hk/tide/cstation_select.htm


交通
東涌港鐵站轉乘大巴
大巴 - 3M, 3R
計程車 - Call台 2984 1368/2984 1328 (如果假日都可以唔駛諗可以Call到或截到)


(以上資料更新至文章當日)




沒有留言:

發佈留言

Related Posts Plugin for WordPress, Blogger...